Verið velkomin í beina textalýsingu frá Vestmannaeyjum.
Hér blæs sterkri austanátt sem á mjög líklega eftir að hafa mikil áhrif á leikinn.

ÍBV hefur verið duglegt á félagaskiptamarkaðnum síðan Gary Martin var rekinn frá félaginu í byrjun maí. Framherjinn Stefán Ingi Sigurðarson kom á láni frá Breiðabliki, Seku Canneh sem er 25 ára framherji frá Líberíu kom einnig til félagsins sem og Atli Hrafn Andrason frá Breiðabliki. Þá er orðrómur um að félagið hafi reynt að fá Bjarna Ólaf Eiríksson til að taka fram skóna að nýju. Bjarni Ólafur lék með liðinu í fyrra og hefur því leikheimild með liðinu ef hann ákveður að snúa aftur.

Atli Hrafn Andrason kom frá Breiðabliki á lokadegi félagaskiptagluggans.

Rúnar Þór Sigurgeirson, leikmaður Keflavíkur, spáir í 2. umferð deildarinnar. Hann á ekki von á mikilli skemmtun að þessu sinni.

ÍBV 0 - 0 Fram
Þessi leikur mun valda vonbrigðum og endar 0-0, lítið um færi en gætu verið nokkur spjöld í þessum leik.
Rúnar Þór í leik gegn ÍBV á síðustu leiktíð.

Liðin mættust aðeins einu sinni í Lengjudeildinni á síðustu leiktíð en það var 14. ágúst í Safamýrinni. Leikurinn var mjög fjörugur og endaði með 4 - 4 jafntefli.

Ellefu dögum síðar mættust þau svo í Mjólkurbikarnum í Vestmannaeyjum. Þá vann ÍBV leikinn 2 - 1 með sigurmarki Róberts Arons Eysteinssonar í uppbótartíma.

Liðin áttu svo að mætast í lokaumferðinni í Lengjudeildinni í fyrra 14. nóvember síðastliðinn en leiknum var aflýst þar sem mótið var flautað af vegna Covid-19 faraldursins.

ÍBV og Fram eru þau lið sem menn telja best í deildinni í sumar en þrátt fyrir það hófu þau keppni í Lengjudeildinni á mismunandi hátt þetta sumarið.

ÍBV fór til Grindavíkur og tapaði þar 3 - 1 og er því stigalaust fyrir leikinn í dag. Framarar byrjuðu hinsvegar á heimasigri gegn Víkingi Ólafsvík í Safamýrinni, 4 - 2.

Danny Guthrie sem hefur mikla reynslu úr ensku úrvalsdeildinni með Liverpool, Newcastle og Reading gekk í raðir Fram í upphafi mánaðarins. Hann fær leikheimild með liðinu í dag en þó er ólíklegt að hann spili leikinn. Samkvæmt okkar upplýsingum losnar hann úr sóttkví í dag og nær því ekki leiknum.

Góðan daginn og verið velkomin í beina textalýsingu frá viðureign ÍBV og Fram í 2. umferð Lengjudeildar karla.

Leikurinn hefst klukkan 18:00 á Hásteinsvelli í Vestmannaeyjum.