Meðal leikmanna Færeyja er Brandur Olsen sem spilar í dag fyrir Helsingborg í Svíþjóð. Hann lék fyrir FH 2018-2019.

Byrjunarlið Færeyja er komið inn.

Jóan Símun Edmundsson er skærasta stjarna færeyska liðsins. Þessi 29 ára framherji spilar með Arminia Bielefeld í Þýskalandi og varð á liðnu tímabili fyrsti færeyski leikmaðurinn til að skora í Bundesligunni.

Byrjunarliðið er klárt. Það er sama miðvarðapar og gegn Mexíkó en aðrir bakverðir.

Ögmundur Kristinsson kemur inn í markið, en Aron Einar Gunnarsson, Jón Daði Böðvarsson, Birkir Bjarnason, Ísak Bergmann Jóhannesson og Kolbeinn Sigþórsson halda sæti sínu.

Vinstri bakvörðurinn Valgeir Lunddal byrjar sinn fyrsta A-landsleik í kvöld.

Eiður Smári Guðjohnsen, aðstoðarþjálfari, var í viðtali við RÚV:

"Þeir eru með sænskan þjálfara sem leggur mikið upp úr 4-4-2. Þeir eru með þétt lið, ágætlega spilandi, reyna að spila boltanum. Við þekkjum auðvitað nokkra einstaklinga, Íslandsvini ef við megum kalla þá svona, spiluðu í Pepsi-deildinni. En sem liðsheild líta þeir bara nokkuð vel út og við þurfum að vera á tánum," segir Eiður.

Eiður segir að leikurinn í kvöld verði frábrugðnari en leikur Íslands gegn Mexíkó. Þar var varnarleikurinn í fyrirrúmi en Eiður telur að Ísland verði meira með boltann í kvöld.

"Í þessum leik verða áherslur okkar kannski öðruvísi. Við munum leggja aðeins meira upp úr hápressunni. Við búmst við því að stjórna þessum leik meira, ef ekki mun meira, heldur en á móti Mexíkóum. Við munum leggja meiri áherslu á sóknarleik þar sem varnarleikurinn var númer eitt í síðasta leik og halda áfram þeirri frammistöðu sem við sýndum í Dallas. Hún var mjög góð, liðið var mjög þétt, við nýttum okkur boltann vel þegar við unnum hann. Við byggjum ofan á það."

"Það verða einhverjar breytingar á byrjunarliðinu og svo munum við nýta allar þær skiptingar sem að í boði eru. Við viljum sjá sem flesta og gefa sem flestum mínútur og sjá hvernig leikmenn passa inn í þessa uppstillingu hjá okkur. Það verða einhverjar breytingar á byrjunarliðinu og við munum nýta skiptingarnar."

Leikið án áhorfenda
Nú er ljóst að leikurinn fer fram án áhorfenda en stefnt hafði verið að því að hleypa fólki í stúkurnar.

Bakslag í baráttu Færeyinga við Covid-19 veiruna gerir það að verkum að áhorfendabann verður á næstu leikjum.

Færeyjar
Enginn leikmaður í færeyska hópnum spilar á Íslandi. Landsliðsþjálfari Færeyja, hinn sænski Hakan Ericson, ákvað að nota þennan glugga til að láta Teit Gestsson, markvörð Færeyjameistara HB spila og Gunnar Nielsen fékk frí. Ericson talaði um að hann viti allt sem hann þarf að vita um Gunnar.

Kaj Leo í Bartalsstovu, leikmaður Vals, var upphaflega valinn í hópinn en hann dró sig síðan úr honum.

Smelltu hér til að sjá færeyska hópinn

Ericson hefur verið að láta Færeyjar spila 4-4-2, kerfi sem við Íslendingar þekkjum nú ansi vel.

Ísak Bergmann Jóhannesson sat fyrir svörum á fréttamannafundi í vikunni en hann lék virkilega vel í 2-1 tapinu gegn Mexíkó í Bandaríkjunum um næstu helgi.

"Fyrst og fremst fyrir mig er að standa mig vel í næsta leik. Það er bara næsta verkefni sem tekur við, gegn Færeyjum. Mitt hugarfar snýst alltaf um að standa mig á næstu æfingu og í næsta leik," segir Ísak.

Þessi 18 ára leikmaður býst við því að Ísland muni stjórna leiknum í kvöld.

"Við höfum þróað okkar leik og vonandi getum við sýnt það gegn Færeyjum að við getum stjórnað leikjum því við erum með gæði innanborðs. Við erum að þróa okkar leik þannig að við erum betri með boltann," segir Ísak Bergmann.

Heil og sæl! Verið velkomin í beina textalýsingu frá vináttulandsleik Færeyja og Íslands. Leikurinn hefst kl. 18:45 að íslenskum tíma og er í beinni útsendingu á RÚV 2.

Þetta er annar leikurinn af þremur hjá Íslandi í þessum glugga. Um síðustu helgi var spilað gegn Mexíkó og eftir leikinn í kvöld verður haldið til Póllands og leikið gegn heimamönnum á þriðjudag.



Það er 24 leikmenn íslenska landsliðsins í þessu verkefni. Fjórir leikmenn úr Pepsi Max deildinni eru í hópnum en það eru þeir Brynjar Ingi Bjarnason (KA), Gísli Eyjólfsson (Breiðablik), Þórir Jóhann Helgason (FH) og Ísak Óli Ólafsson (Keflavík).

Markmenn:
Elías Rafn Ólafsson - Fredericia
Rúnar Alex Rúnarsson - Arsenal
Ögmundur Kristinsson - Olympiacos

Varnarmenn:
Alfons Sampsted - Bodö Glimt
Brynjar Ingi Bjarnason - KA
Guðmundur Þórarinsson - New York City FC
Hjörtur Hermannsson - Bröndby IF
Ísak Óli Ólafsson - Keflavík
Kolbeinn Þórðarson - Lommel SK
Valgeir Lunddal Friðriksson - Häcken

Miðjumenn:
Andri Fannar Baldursson - Bologna
Aron Einar Gunnarsson - Al Arabi
Aron Elís Þrándarson - OB
Birkir Bjarnason - Brescia
Gísli Eyjólfsson - Breiðablik
Ísak Bergmann Jóhannesson - IFK Norrköping
Jón Dagur Þorsteinsson - AGF
Mikael Neville Anderson - FC Midtjylland
Stefán Teitur Þórðarson - Silkeborg IF
Þórir Jóhann Helgason - FH

Sóknarmenn:
Albert Guðmundsson - AZ Alkmaar
Jón Daði Böðvarsson - Millwall
Kolbeinn Sigþórsson - IFK Göteborg
Sveinn Aron Guðjohnsen - OB