Frægir á vellinum. Gaupi er með gleðina að vopni og Höddi Magg er líka á svæðinu. Ólíklegt að þeir verði báðir glaðir eftir leikinn í kvöld. Njáll Eiðsson fær sér sæti og hér er einnig Jón Rúnar Halldórsson og sonur hans Frikki Dór. Stjörnufans í stúkunni.

Í viðtali fyrir leikinn á Stöð 2 Sport sagði Heimir Guðjónsson að Tryggvi Hrafn Haraldsson sé klár í að koma inná. Hann hafi æft vel fyrir leikinn og segist Heimir búast við því að hann muni koma við sögu í kvöld.

Vængjum þöndum!


Í Fjósinu er verið að hita upp fyrir leikinn. Kaldur á krana og gómsætir Fálkaborgarar. Þá eru fagmennirnir í Vængjum þöndum í þráðbeinni í gegnum Fésbókina og gleðin við völd.

Einar Gunnarsson vallarþulur spáir því að leikurinn endi 1-1 ef Andri Adolphsson kemur ekkert inná. Annars 4-1 ef Andri mætir af bekknum.

Guðmann Þórisson snýr aftur eftir leikbann og kemur inn í lið FH.

Tryggvi Hrafn gekk í raðir Vals í vetur en hann fótbrotnaði í æfingaleik fyrir mót og hefur ekkert spilað. Fagnaðarefni að þessi skemmtilegi fótboltamaður sé að snúa til baka. Byrjar á bekknum í kvöld eins og áður sagði.

Byrjunarliðin eru komin inn


Patrick Pedersen og Haukur Páll Sigurðsson fyrirliði eru ekki með Val í kvöld en þeir eru að glíma við meiðsli. Tryggvi Hrafn Haraldsson er á meðal varamanna Vals en hann er í hóp í fyrsta sinn. Tryggvi meiddist á undirbúningstímabilinu.

Sverrir Páll Hjaltested fær tækifæri í byrjunarliðinu.

Ágúst farinn til DK


Ágúst Eðvald Hlynsson var á láni hjá FH frá Horsens en er farinn til baka og spilar ekki meira með Hafnfirðingum á tímabilinu. Lánsamningurinn var til 1. júlí en FH-ingar ætluðu að reyna halda honum lengur hjá sér. Ágúst undirbýr sig nú fyrir komandi átök í B-deildinni í Danmörku.

FH er í sjöunda sæti


Hið gríðarlega vel mannaða lið FH hefur alls ekki náð sér á strik í þessu móti og er aðeins með 12 stig, þrjá sigra. Liðið sýndi vilja og baráttu gegn KA í síðasta leik en það dugði þó aðeins til jafnteflis, 1-1. Björn Daníel Sverrisson krækti í vítaspyrnu og Steven Lennon skoraði en KA náði að jafna þrátt fyrir að hafa misst mann af velli með rautt spjald.

Egill Arnar dæmir


Egill Arnar Sigurþórsson sér um flautuleikinn í kvöld. Jóhann Gunnar Guðmundsson, kjötiðnaðarmaðurinn frá Hvolsvelli, heldur á flaggi eins og Eysteinn Hrafnkelsson. Frosti Viðar Gunnarsson er eftirlitsmaður og Ívar Orri Kristjánsson varadómari.

Gagnrýndir fyrir skort á skemmtun


Valur er með fimm stiga forystu á toppnum en liðið gerði 1-1 jafntefli gegn Fylki í síðutu umferð. Árbæingar jöfnuðu leikinn í blálokin. Valsmenn fengu gagnrýni í Innkastinu í vikunni fyrir að bjóða ekki upp á meira skemmtanagildi í leikjum sínum.

Hvernig fer leikurinn?

Við báðum lesendur um að leggja fram sína spá í könnun á forsíðu. 54% spá sigri Vals, 18% spá jafntefli og 28% sigri FH. Alls kusu 1.046.

Óli Jó mætir Val... og Heimi


Ólafur Jóhannesson er að stýra FH í þriðja sinn eftir endurkomuna, annar deildarleikurinn eftir 1-1 jafntefli gegn KA í síðustu umferð.

Ólafur gerði Val að Íslandsmeisturum 2017 og 2018 og mætir fyrrum lærisveini sínum hjá FH, Heimi Guðjónssyni, í leik kvöldsins.

Velkomin á Origo völlinn


11. umferð Pepsi Max-deildarinnar hefst klukkan 19:15, með leik Vals og FH. Stórleikur framundan í þessari skemmtilegu deild.