Það er gríðarlega góð mæting í stúkuna. Gaman að þessu!

Upphitun í gangi. Það styttist í þetta!

Hef það samkvæmt góðum heimildum að Dóri Gylfa og Gunni Helga séu mættir hérna að skemmta börnunum. Það er skemmtileg stemning að myndast fyrir þennan leik.

Sigríður Lára byrjar djúp á miðsvæðinu hjá FH. Það gefur FH-liðinu rosalega mikið. Hún verður að eiga góðan leik til þess að FH eigi möguleika.

Dani Rhoades, nýi leikmaður Þróttar, byrjar á bekknum.

Edda Garðarsdóttir, fyrrum landsliðskona, er varamarkvörður Þróttar í leiknum. Hún var nú miðjumaður á sínum ferli en hún kemur inn í markið ef Íris Dögg meiðist eða fær rautt.

BYRJUNARLIÐIN:
Bæði lið gera eina breytingu á sínu liði frá síðasta leik.

Þróttur gerir eina breytingu á liði sínu frá sigrinum á Tindastóli. Elísabet Freyja Þorvaldsdóttir kemur inn í liðið fyrir Leu Björt Kristjánsdóttur.

FH gerir eina breytingu frá jafnteflinu gegn Haukum í vikunni. Andrea Marý Sigurjónsdóttir fer á bekkinn og inn kemur Maggý Lárentínusdóttir kemur inn.

Endilega takið þátt í umræðunni á Twitter undir kassamerkinu #fotboltinet og þitt tíst gæti birst hér í lýsingunni!

Stærsti leikur í sögu kvennaliðsins
Fréttaritari Fótbolta.net spurði Nik Anthony Chamberlain, þjálfara Þróttar, út í leikinn gegn FH í viðtali eftir sigur gegn Tindastóli síðasta sunnudag.

Fréttaritari kom inn á að leikurinn í kvöld væri mögulega stærsti leikur í sögu félagsins í kvennaflokki. Hvernig líst Nik á verkefnið?

Eins og þú segir þetta er stærsti leikur í sögu félagsins í kvennaflokki og þetta verður erfitt. FH er mjög gott lið, býr yfir mikilli orku og krafti; þannig að þetta verður alls ekki auðvelt

Þróttur hefur aldrei komist í undanúrslitin áður og þetta er því risastór leikur fyrir bæði lið. Fjölmennum á völlinn!!

Ég var að skoða þetta á vefsíðu KSÍ. Árið 2001, síðast þegar FH komst í undanúrslit, þá unnu þær 7-0 sigur á Þrótti í 8-liða úrslitunum. Maður lærir eitthvað nýtt á hverjum degi.

Tuttugu ár frá því FH fór síðast í undanúrslit
Það eru liðin 20 ár frá því FH komst síðast í undanúrslitin í bikarkeppni kvenna. Þá tapaði liðið gegn Val á Kaplakrikavelli, 1-4. Það var í fyrsta og eina skiptið sem FH komst í undanúrslit - þangað til núna.

Fimleikafélagið á möguleika á því að komast í fyrsta sinn í úrslitaleikinn með sigri hér í kvöld.

Þess má geta að Guðbjörg Gunnarsdóttir, landsliðsmarkvörður, var í markinu hjá FH í leiknum gegn Val fyrir 20 árum. Dóra María Lárusdóttir lék með Val, en hún spilar enn með Val.

Frumsýnir Þróttur nýjan leikmann?
Þróttur var að semja við bandaríska framherjann Dani Rhoades. Hún kemur til Þróttar frá Chicago Red Stars í atvinnumannadeildinni í Bandaríkjunum. Þar áður var hún í háskólaboltanum hjá Wisconsin þar sem hún skoraði 38 mörk í 85 leikjum.

Það má segja núna að T. J. Watt sé tengdasonur Laugardals. Rhoades og Watt trúlofuðu sig nefnilega á dögunum. Watt er einn besti varnarmaður NFL-deildarinnar í Bandaríkjunum.

Rhoades mun mögulega spila sinn fyrsta leik fyrir Þrótt hérna í dag. Nik Chamberlain, þjálfari Þróttar, er frábær í að finna leikmenn erlendis frá og því má gera ráð fyrir því að þarna sé um öflugan leikmann að ræða.

Leikmenn sem þarf að hafa góðar gætur á:

Þróttur: Katie Cousins
Algjörlega frábær miðjumaður. Það er eiginlega ekki hægt að ná boltanum af henni. FH þarf að passa vel upp á hana. Hefur sjö sinnum verið í liði umferðarinnar í Pepsi Max-deild kvenna og það segir eiginlega allt sem segja þarf um hana.



FH: Selma Dögg Björgvinsdóttir
Gríðarlega öflugur leikmaður sem hefur skorað fjögur mörk í Mjólkurbikarnum í ár og er þar með markahæstu leikmönnum bikarsins. Virkilega hæfileikarík og getur búið til eitthvað upp úr engu.

Í hinum undanúrslitaleiknum er sannkallaður stórslagur. Þar mætast Valur og Breiðablik.

Smelltu hérna til að fara í beina textalýsingu frá þeim leik

Spáir sigri Þróttar hér í kvöld
Ég fékk Orra Rafn Sigurðarson, lýsanda á Viaplay og fyrrum fréttaritara Fótbolta.net, til að spá í spilin fyrir þennan leik. Hann fylgist vel með kvennaboltanum hér á Íslandi.

Föstudagur og við elskum öll góð bikarævintýri, og bæði þessi lið eru að upplifa bikarævintýri í dag.

Þróttur með Cousins og Ólöfu á eldi ættu að klára þennan leik og gleðja Köttarana sem verða liklegast í 2-3 mjólkurglösum ef ég þekki þá rétt.

Það má hins vegar ekki vanmeta FH-liðið. Þær eru með sterka vörn og mjög öflugan markmann í Talbert. En ráða þær við Pepsi Max sóknarlínu?

Þróttur á alltaf að klára þennan leik; Pepsi Max lið vs Lengjudeildar lið. Þetta verður geggjaður leikur með fullt af mörkum.

3-1 sigur Þróttar

FH er í þriðja sæti Lengjudeildarinnar. Ég sá þær gera jafntefli gegn nágrönnum sínum í Haukum á þriðjudag. Þar voru þær miklu betri í leiknum heilt yfir en sofnuðu aðeins á verðinum í uppbótartíma. Ef þær spila eins og þær gerðu í þeim leik hér í dag, þá eiga þær held ég góðan möguleika á að ná í góð úrslit.

Þróttur situr í fjórða sæti Pepsi Max-deildarinnar og kemur inn í þennan leik með sigurleik á bakinu. Þær lögðu Tindastól að velli, hér á Eimskipsvellinum, síðasta sunnudag. Þar voru lokatölur 2-0; Katie Cousins og Ólöf Sigríður Kristinsdóttir skoruðu mörkin.

FH hefur slegið tvö Pepsi Max-deildarlið úr leik. Verður Þróttur það þriðja í röðinni?

Leiðin á Laugardalsvöll
Allra augu beinast að Laugardalsvelli þar sem úrslitaleikurinn fer fram.



Þróttur byrjaði sína vegferð í bikarnum á því að vinna 1-7 sigur gegn Fjarðab/Hetti/Leikni í Fjarðabyggðarhöllinni. Þær unnu svo frábæran 1-4 sigur á Selfossi í átta-liða úrslitunum.



FH hefur þurft að spila tveimur lekjum meira í bikarnum til að komast á þennan stað. FH kom inn í 2. umferð og vann þar 10-1 sigur á ÍR, já 10-1! Selma Dögg Björgvinsdóttir skoraði þar þrennu fyrir FH. Fimleikafélagið vann svo 1-0 sigur á Víkingi í þriðju umferð.

Þær mættu Þór/KA úr Pepsi Max-deildinni í 16-liða úrslitunum og tókst að vinna þær í vítaspyrnukeppni. FH-ingar slógu svo annað Pepsi Max-deildarlið úr leik í átta-liða úrslitunum, Fylki. FH vann þar frábæran 1-4 sigur.

Halló, halló! Verið velkomin í beina textalýsingu frá leik Þróttar og FH í undanúrslitum Mjólkurbikars kvenna.

Sæti í sjálfum úrslitaleiknum í boði.