Fyrir leik
Útsending frá leiknum er hafin. Íslenska liðið spilar í bláum búningum í nótt.
Eyða Breyta

Fyrir leik
Dómarateymið í kvöld kemur frá Brasilíu. Edina Ales Batista heldur um flautuna í leiknum.
Eyða Breyta

Fyrir leik
Það er kalt í Dallas í kvöld. Hiti við frostmark, eitthvað sem ætti að henta íslenska liðinu ágætlega.
Eyða Breyta

Fyrir leik
Byrjunarliðið hefur verið opinbert!

Þorsteinn Halldórsson, þjálfari liðsins, gerir tíu breytingar á liðinu. Einungis Karólína Lea Vilhjálmsdóttir heldur sæti sínu í liðinu. Þorsteinn gerði einnig tíu breytingar frá fyrsta leiknum fyrir leikinn gegn Tékklandi á sunnudag.

Sandra Sigurðardóttir ver íslenska markið í fyrsta sinn á mótinu!
Eyða Breyta

Fyrir leik
Landsliðsþjálfarinn Þorsteinn Halldórsson á blaðamannafundi fyrir leik

Hvernig líst þér á þennan úrslitaleik og hversu skemmtilegt er að vera í þessari stöðu?

,,Mér líst bara vel á leikinn og frábært að vera í þessari stöðu. Þetta var markmiðið okkar. Það er frábært að fara inn í þennan leik og vera í þeirri stöðu að eiga möguleika á að gera eitthvað gott," sagði Steini.

Hvaða þýðingu hefði það að vinna mótið sem haldið er á heimavelli heimsmeistaranna?

,,Það gefur okkur sjálfstraust og sýnir að við erum að gera eitthvað gott. Þetta er búið að vera hörku strembið, tveir erfiðir leikir búnir og framundan leikur gegn heimsmeisturunum. Það er bara spennandi að mæta þeim og sjá hvað við getum gert."

Leikmannahópurinn: Verða margar breytingar á liðinu frá síðasta leik?

,,Þið megið eiga von á töluverðum breytingum, myndi ég segja, þó að ég sé ekki búinn að ákveða alveg byrjunarliðið. Það er það stutt á milli leikja, við vorum líka að ferðast í gær. Bandaríkjamennirnir seinkuðu fluginu okkar þannig að við erum enn þreyttari eftir að hafa bara komist upp á hótel um miðnætti. Þeir eru að gera allt til að stoppa okkur," sagði Steini léttur.

,,Sú eina sem er tæp fyrir morgundaginn er Sandra [Sigurðardóttir] markvörður. Það tóku sig upp smámeiðsli á æfingu um daginn og hún er tæp, en við tökum stöðuna á henni síðar í dag [í gær]. Þetta kom upp fyrir leik eitt, sem hún átti svo sem ekki að byrja, og hún hefur því ekki verið leikfær fyrstu tvo leikina. Við tökum ákvörðun í dag með framhaldið."

Hversu sterkt er bandaríska liðið?

,,Bandaríska liðið er mjög sterkt, þær hafa úr mörgum frábærum leikmönnum að velja og líta bara vel út. Það á kannski einhver endurnýjun á liðinu sér stað en þær sem eru að koma inn eru hörkugóðar og við þurfum að eiga alvöru leik til að eiga einhvern möguleika á móti þeim."

Hverjar finnst þér vera jákvæðustu breytingarnar sem þú hefur náð að koma í gegn á þessu ári sem þú hefur verið með liðið?

,,Ég veit það ekki. Liðið var komið á ágætis ról þegar ég tók við. Mér finnst ég hafa náð að halda því áfram, liðið var að vinna fullt af leikjum og gera vel. Ég hef kannski náð að þróa leik liðsins að einhverju leyti fram á við en mér finnst sóknarleikurinn hafa verið að lagast. Það er erfiðara að búa til góðan sóknarleik, það tekur lengri tíma heldur en að búa til varnarleik. Mér finnst við hafa náð að samræma þetta betur, getum varist lágt niðri, pressað hátt og líka haldið í boltann þegar þannig liggur við. Mér finnst ég hafa náð ágætis jafnvægi í liðið."

Hvernig sérðu fram á að leikurinn spilist?

,,Ég á von á því að þær muni koma til með að pressa okkur hátt, þær hlaupa mikið og við þurfum að vera tilbúin að mæta því. Svo þurfum við líka að þora að vera með boltann, við þurfum líka að geta stýrt tempóinu í leiknum svo þetta verði ekki bara einhver eltingarleikur."

Steini sagði að það væri búið að selja um ellefu þúsund miða en hann gerði ekki ráð fyrir að mikið fleiri miðar yrðu seldir þar sem spáð væri tveggja stiga frosti, skítaveðri" á meðan leik stendur. Íslensku fjölmiðlamennirnir báðu Steina vinsamlegast um að vera ekki að tala um skítaveður við sig eftir síðustu daga á Íslandi. Allt á léttu nótunum.
Eyða Breyta

Fyrir leik
Fyrirliðinn Gunnhildur Yrsa Jónsdóttir á blaðamannafundi fyrir leik

Hvernig hefur þér fundist mótið hingað til og frammistaða íslenska liðsins?

,,Þetta er stór­glæsi­legt mót, risastórt og það er gam­an að fá að taka þátt í þessu, sér­stak­lega rétt fyr­ir EM. Við höf­um ekki spilað sam­an síðan í des­em­ber og sum­ar eru ekki á keppnistíma­bili en ég er ánægð með spilamennsk­una og fightið" sem liðið hefur gefið í báðum leikjum. Það hafa allar fengið að spila og gott að hafa góða sam­keppni. Heilt yfir mjög ánægð með mótið til þessa," sagði Gunnhildur.

Það vantar einhverja leikmenn í bandaríska liðið. Hversu sterkt er liðið þeirra þrátt fyrir það?

,,Þær eru flest­ar að spila í deild­inni hjá okk­ur. Þær eru með svo mikið af leik­mönn­um og þótt stærstu nöfn­in séu ekki koma aðrar frá­bær­ar í staðinn. Við verðum að eiga góðan leik til að vinna og ég hef fulla trú á því. Ég vil að við ein­beit­um okk­ur að okk­ur og spil­um okk­ar leik. Ef við gerum það þá getur allt gerst.

Það er titill í boði, þið hljótið að vera sólgnar í að vinna titil eða hvað?

,,Við förum auðvitað í alla leiki til að vinna og það væri auðvitað gaman að vinna titil. Við viljum þróa okkar leik og vonandi kemur sigur með því. Bandaríska liðið er heimsmeistari og það myndi gefa okkur ákveðna innspýtingu að spila vel á móti þannig þjóð. "

,,Það er því mikilvægt að við komum inn í þennan leik fullar sjálfstrausts, vitandi að við höfum engu að tapa og ef við vinnum, sem við ætlum okkur, þá væri það geggjað."

Þú ert leikmaður Orlando í Bandaríkjunum. Ertu búin að fá mikið af skilaboðum út af þessum stóra leik?

,,Já, maður fær skilaboð. Ég held að fyrir fram hafi þessi leikur verið líklegur úrslitaleikur. Ég held að Bandaríkin búist við því að vinna leikinn, þær eru bara þannig, við þurfum að láta þær hafa fyrir því og vonandi lendir þetta okkar megin."

Eru mikil læti þegar Bandaríkjamenn fjölmenna á leiki? Steini sagði að um ellefu þúsund miðar væru seldir á leikinn.

,,Já, það er mjög skemmtilegt. Það góða við kvennaknattspyrnuna hér er að hún er mjög stór. Það eru alltaf að mæta fleiri og fleiri áhorfendur á leiki í deildinni sem er stemning. Kvennaknattspyrna á skilið að fá svona marga áhorfendur. Vonandi verður þetta góður leikur sem áhorfendur hafa gaman af. Leikurinn er líka sýndur í beinni í sjónvarpinu í Bandaríkjunum."

Samkvæmt spánni á að vera frost á leikdegi, íslenska aðstæður ef svo mætti kalla.

,,Það á að vera frost á morgun [í dag] en mér finnst það henta okkur mjög vel. Við þekkjum allar kuldan og vonda veðrið, þá kannski kemur íslenski víkingurinn" enn meira inn í þetta. Ég held að veðrið hafi engin áhrif á okkur. Það á að vera einhver slydda, snjór og frost sem er bara gaman."
Eyða Breyta

Fyrir leik
Í beinni á RÚV
Fyrstu tveir leikir íslenska liðsins voru í beinni útsendingu á Viaplay en leikurinn í nótt er í beinni útsendingu á RÚV.
Eyða Breyta

Fyrir leik
Landsliðsþjálfarinn Þorsteinn Halldórsson sagði við fjölmiðlamenn í gær að þeir mættu eiga von á því að sjá mikið breytt lið frá síðasta leik gegn Tékklandi. Karólína Lea Vilhjálmsdóttir er eini leikmaðurinn sem hefur byrjað báða leikina og sú eina sem er tæp fyrir leikinn í kvöld er Sandra Sigurðardóttir.
Eyða Breyta

Fyrir leik
Bandaríkin eru ríkjandi heimsmeistarar og hafa unnið þetta æfingamót i síðustu tvö skipti og fjórum sinnum af þeim sex skiptum sem mótið hefur verið haldið.

Ísland er að taka þátt í mótinu í fyrsta sinn.

Þetta verður í fimmtánda sinn sem þjóðirnar mætast, en Íslandi hefur aldrei tekist að sigra Bandaríkin. Tveir leikir hafa endað með jafntefli og 12 með sigri Bandaríkjanna. Síðast mættust þjóðirnar í riðlakeppni Algarve æfingamótsins árið 2015 og endaði sá leikur með markalausu jafntefli.

The lovely Toyota Stadium, Frisco, Texas. Home of @FCDallas. We play @USWNT here on Wednesday. #dóttir pic.twitter.com/bu0pLtQHYJ

� Knattspyrnusambandið (@footballiceland) February 23, 2022

Eyða Breyta

Fyrir leik
Næturvaktin er hafin hjá stuðningsmönnum íslenska kvennalandsliðsins hér heima á Íslandi og mögulega annars staðar. Liðið mætir Bandaríkjunum í úrslitaleik á SheBelieves æfingamótinu í nótt og hefst leikurinn átta mínútur yfir tvö á íslenskum tíma.

Leikurinn fer fram á Toyota Stadium í Frisco sem er úthverfi í Dallas. FC Dallas, sem er í MLS-deildinni, spilar heimaleiki sína á vellinum.

Íslandi dugir jafntefli í leiknum til að vinna mótið því fyrir leikinn er Ísland með sex stig eftir tvo leiki og Bandaríkin fjögur. Ísland lagði Nýja-Sjáland 1-0 í fyrsta leik sínum og svo Tékkland 2-1 í leik númer tvö. Bandaríkin gerðu markalaust jafntefli í sínum fyrsta leik, gegn Tékklandi, og völtuðu svo yfir Nýja-Sjáland, 5-0, í leik tvö.

#SheBelievesCup final coming up tonight! #dóttir pic.twitter.com/9xtLp50wX7

� Knattspyrnusambandið (@footballiceland) February 23, 2022

Eyða Breyta