Bergdís reynir viðstöðulaust skot út teignum eftir fyrirgjöf Dagnýjar. Hittir boltann ekki nægilega vel og skotið beint á Amber.

Síðustu mínúturnar verða hrikalega spennandi. Þetta er galopið ennþá og allt getur gerst.

Fín sókn hjá Víkingum og Sigdís skýtur rétt framhjá rétt utan vítateigs.

Enn ein hornspyrnan. Hannah tekur fyrir Tindatól. Víkingar eiga í miklu brasi með að hreinsa og sókninni lýkur á því að Aldís María á þrumuskot að marki rétt utan teigs. Skotið fast en beint á Andrea.

Önnur hornspyrna og aftur tekur Hannah fyrir Stólana. Þessi spyrna ekki eins góð og þær fyrri og Víkingar snúa vörn í sókn.

Allt í einu er Christabel komin í stórhættulega stöðu og farin að nálgast vítateig Tindastóls. Hún rennir boltanum í hlaupaleið Hafdísar Báru sem var komin með henni en Amber, sem er að eiga STÓRLEIK, er á undan í boltann!

Tindastóll fær hornspyrnu. Hannah Cade tekur og setur enn einn draumaboltann fyrir.

Mér sýnist það vera Murielle sem nær snertingu á boltann en Víkingar bjarga á línu!

Þvílíkur leikur hjá Amber!

Víkingar geysast hér upp í vel útfærða sókn. Hafdís Bára fær tíma og tekur skot úr teignum en Amber er eldsnögg út á móti henni og nær að loka!

Christabel!

Vá, reynir að klippa boltann að marki andstæðinganna eftir fyrirgjöf en hittir boltann ekki nægilega vel.

Víkingar að ógna.

Góð rispa hjá vinstri bakverðinum Kiley Norkus. Kemst inná teig og þrumar á markið. Þar er hinsvegar Amber með allt á hreinu og ver í horn!

Úff. Þetta leit ekki vel út. Emma Steinsen steinliggur eftir tæklingu Hugrúnar. Hugrún heppin að sleppa við spjald þarna en fer og biður Emmu afsökunar á brotinu.

Emma þarf að fá aðhlynningu en snýr svo aftur inná völlin stuttu síðar.

ANDREA

Andrea kemur vel út á móti og nær að verja frá Hugrúnu. Hugrún hafði komist inn í tæpa sendingu til baka frá Freyju og var komin í frábært færi!

Laglegur sprettur hjá Huldu Ösp sem dansar meðfram endalínunni og er við það að renna hættulegum bolta fyrir þegar María Dögg mætir og lokar á hana. Víkingar fá í kjölfarið horn sem Stólarnir skalla frá.

Stólarnir enn betri í seinni hálfleiknum en Víkingar eru stórhættulegar fram á við og geta alltaf búið eitthvað til. Nú mátti litlu muna að Christabel næði að koma sér í góða stöðu í vítateig gestanna.

Tindastólskonur að koma miklu kröftugri inn í síðari hálfleikinn!

Murielle var að vinna hornspyrnu. Hannah Cade setur boltann fyrir. Andrea markvörður ýtir Hugrúnu frá sér og grípur boltann.

Donni og co. á bekknum hjá Tindastól láta í sér heyra í kjölfarið. Skil það. Full vaskleg framganga þarna og Andrea heppin að sleppa við brot.

FÆÆÆÆRI!

Víkingar eiga síðasta séns fyrri hálfleiksins og hann er ekki amalegur.

Svanhildur leggur draumabolta út í skot á Töru en Tara þrumar hátt yfir!

Murielle hótar að bæta við. Á skot vel yfir rétt við vítateigslínuna.

Vinnusemin uppá 10 hjá Aldísi!

Mætir í pressu á Andrea markvörð og hjálpar til við að vinna boltann. Í kjölfarið fá Stólarnir svo stórhættulegan séns og vilja vítaspyrnu í þokkabót!

Boltinn berst inná teig og í áttina að Hugrúnu sem er mætt af krafti. Í einhverjum barningi virðist boltinn mögulega skoppa í tvær hendur, eina Víkings og eina Tindastóls áður en Murielle reynir skalla af stuttu færi sem Andrea blakar í horn!

Þarna munaði litlu en ekkert verður úr hornspyrnu Tindastóls.

Skemmtilegur leikur í gangi í Víkinni!

Víkingar að sækja hornspyrnu hægra megin frá. Hulda Ösp skokkar yfir til að taka en setur boltann beint aftur fyrir og í hliðarnetið.

Gestirnir fá sína fyrstu hornspyrnu og hún er hættuleg. Hannah Cade setur stórhættulegan bolta fyrir en Murielle rétt missir af honum á fjær.

Fín sókn hjá Víkingum. Freyja og Svanhildur ná vel saman hægra megin. Svanhildur kemur boltanum inná teig þar sem Christabel fær fullmikið pláss. Hún reynir skot en Arna nær að koma sér fyrir. Boltinn fer svo aftur út til hægri og Svanhildur á aðra fyrirgjöf en í þetta skiptið grípur Amber boltann.

Murielle er nautsterk, fer framhjá Freyju og á fast vinstri fótarskot að marki. Andrea ver örugglega en meiddi sig eitthvað við verknaðinn og þarf smá tíma til að jafna sig.

Geggjaður sprettur hjá Aldísi Maríu!

Hún hirti boltann af leikmanni Víkings og braust af stað. Stóð af sér brot og komst upp að vítateig áður en hún lagði boltann til hliðar í skot fyrir Murielle sem skaut yfir!

AMBER ER EKKERT AÐ GRÍNAST!

Aftur er Amber að sýna mátt sinn og megin.

Á hér svakalega viðbragðavörslu frá Svanhildi Ylfu sem reyndi viðstöðulaust skot af stuttu færi!

Murielle á skot utarlega úr teignum en það er kraftlítið og beint á Andrea.

Aldís María hótar að jafna leikinn fyrir Stólana. Lék inn á teig frá vinstri og lét vaða en skotið beint á Andrea.

Stólarnir í þrígang á stuttum tíma örlitlu frá því að finna menn í vítateig Víkinga. Vantar aðeins uppá.

Lið Tindastóls:

Amber

Arna - Bryndís - Kristrún

María Dögg - Hrafnhildur - Hannah - Sólveig Birta

Aldís - Murielle - Hugrún

Lið Víkings:

Andrea

Freyja - Emma - Dagbjört - Kiley

Helga Rún - Tara

Svanhildur - Dagný - Hulda Ösp

Christabel

AMBER!

Vá, geggjuð varsla hjá Amber.

Eftir hornspyrnu Víkinga barst boltinn aftur inn á teig. Þar var Christabel klár í dauðafæri. Reyndi skot en eldsnögg Amber náði að bregðast við og verja. Bætti svo um betur og henti sér á eftir frákastinu eins og köttur og kom í veg fyrir að Víkingar fengju annað horn.

Þetta byrjar skemmtilega. Bæði lið reyna hraðar sóknir. Murielle nær að setja fínan bolta fyrir Víkingsmarkið áður en heimakonur bruna í sókn hinum megin og Hulda Ösp sækir aðra hornspyrnu.