Liðin ganga hér inn á völlinn, það gekk vel. Fremur napurt hérna, hiti um 7 gráður og gola inn fjörðinn.

Byrjunarliðin eru klár. Sýnist Vestri skipta yfir í 5-3-2 til þess að reyna að stoppa í götin. Daði Freyr og Loic Ondo eru að koma aftur á sinn gamla heimavöll auk Hákons Inga sem er á bekknum. Athyglisvert að meðal varamanna Kórdrengja er Heiðar Helguson. Sverrir Páll Hjaltested er að koma tilbaka úr meiðslum og er einnig á bekknum, spurning hvort hann sé klár í eitthvað af mínútum í dag.

Það góða við landsleikjahléð er að Lengjudeildin fær afnot af bestu dómurum landsins á meðan. Pétur Guðmundsson dæmir þennan leik og vonandi ferst honum vel úr hendi.

Í síðustu umferð gerðu Kórdrengir 1-1 jafntefli við Grindavík en Vestri fór í Árbæinn í leik sem gat dottið hvoru megin sem er fyrstu 10 mínúturnar en þetta féll á endanum til Fylkismanna sem unnu 5-0. Varnarleikur og markvarsla Vestra hefur verið vandamál en Kórdrengir að ströggla við að skora mörk.

Fyrri leikir milli þessara liða eru fáir enda saga Kórdrengja stutt. Í fyrra unnu Kórdrengir 2-0 í Breiðholtinu en liðin skildu jöfn hér fyrir vestan í lok september, 3-3. Vestramenn eru því á höttunum eftir fyrsta deildarsigrinum gegn þessu félagi.

Liðin hafa bæði leikið 5 leiki í sumar og eru væntanlega bæði með færri stig en þau bjuggust við. Kórdrengir eru búnir að vinna einn leik og sitja í 7. sæti með 6 stig, Vestri einnig búnir að næla í einn sigur og eru í 9. sæti með 5 stig.

Komiði heil og jafnvel sæl og verið velkomin á beina textalýsingu af leik Vestra og Kórdrengja í Lengjudeildinni.