Liðin farin inn í klefa. Það styttist í upphafsflaut.

Vægast sagt skelfileg mæting í stúkuna þegar tíu mínútur eru í leik.

Pétur Pétursson, þjálfari Vals, spjallar við Örnu, sem er í láni hjá Þór/KA, við hliðarlínuna. Arna er í liðsstjórn hjá Þór/KA í dag; hún má ekki spila.

Það er enginn smá munur á meðalaldri byrjunarliðanna í dag. Það er mikil reynsla í Valsliðinu og meðalaldurinn á byrjunarliðinu þeirra 28,1 ár. Meðalaldurinn á byrjunarliði Þórs/KA 21,1 ár.

Angela Mary Helgadóttir er yngsti leikmaður vallarins en hún er fædd árið 2006.

Það er geggjað veður hér á Hlíðarenda. Það blæs aðeins, en annars algjörar toppaðstæður.

Blíða á Hlíðarenda ☀️

Topplið Vals í hefndarhug er þær mæta Þór/KA í þeirri Bestu ⚽️ Bein textalýsing hérna: https://t.co/weRQOHt9f6 pic.twitter.com/Fj6N9U6NRe

— Guðmundur Ásgeirsson (@gummi_aa) August 4, 2022

Liðin eru mætt út á völl að hita upp. Þetta verður áhugaverður leikur!

Elín Metta á bekknum
Byrjunarliðin eru komin inn. Það vekur athygli að landsliðskonan Elín Metta Jensen byrjar á bekknum hjá Val. Hún var ekki í hóp gegn Stjörnunni en er mætt aftur og byrjar á bekknum.

Elín var í landsliðshópi Íslands sem tók þátt á EM í Englandi.

Hjá Þór/KA byrjar María Catharina Ólafsd. Gros en hún kom nýverið aftur heim eftir dvöl hjá Celtic í Skotlandi. Tiffany Janea McCarty byrjar á bekknum.

Það eru fjórir aðrir leikir í Bestu deildinni í kvöld. Þeir eru allir í beinni textalýsingu hér á síðunni.

Leikir dagsins:
17:30 Selfoss-ÍBV (JÁVERK-völlurinn)
17:30 Valur-Þór/KA (Origo völlurinn)
19:15 KR-Stjarnan (Meistaravellir)
20:00 Afturelding-Þróttur R. (Malbikstöðin að Varmá)

Spáir þægilegum sigri Vals
Ég fékk Telmu Hjaltalín Þrastardóttur, leikmann FH, til þess að spá í leiki umferðarinnar í Bestu deild kvenna. Hún spáir þægilegum sigri Vals í kvöld.

Valur 3 - 0 Þór/KA (17:30 í dag)
Það hefur vantað upp á stöðugleika hjá Þór/KA í sumar og þær eru eflaust ekki sáttar með stöðuna á töflunni. Það breytist hins vegar ekki í kvöld gegn sterku liði Valsstelpna sem ætla sér ekki að missa toppsætið úr höndunum. Hörkuleikur fyrstu mínúturnar en Elín Metta verður Þór/KA erfið í kvöld og nær inn fyrstu þrennunni sinni í sumar.

Ég hvet fólk til þess að taka þátt í umræðunni í kringum leikinn á Twitter undir kassamerkinu #fotboltinet. Það gerir leikinn bara skemmtilegri!

Spilar eflaust ekki
Varnarmaðurinn Arna Eiríksdóttir hefur spilað stórt hlutverk í liði Þórs/KA í sumar. Ég ætla að giska á að hún verði í stúkunni í kvöld þar sem hún er á láni frá Val og það tíðkast að lánsmenn spili ekki gegn félögunum sem þeir eru í láni frá. Það er mikill missir fyrir Þór/KA.

Sandra María komið sterk inn
Hjá Þór/KA er Sandra María Jessen markahæst með sex mörk. Hún hefur komið gríðarlega sterk heim úr atvinnumennsku.

Sandra María sneri aftur heim á Akureyri fyrir tímabilið eftir að hafa leikið í þrjú tímabil með Bayer Leverkusen í Þýskalandi. Hún eignaðist sitt fyrsta barn á síðasta ári.

Hún á að baki 31 A-landsleik fyrir Ísland og í þeim hefur hún skorað sex mörk.

Ásdís komið að flestum mörkum
Það er líka Valsari sem hefur komið að flestum mörkum í deildinni í sumar.

Deildin er rúmlega hálfnuð og það er athyglisvert að skoða það hvaða leikmenn hafa komið að flestum mörkum í sumar, það er að segja þegar mörk og stoðsendingar eru teknar saman.

Á toppi listans er Ásdís Karen Halldórsdóttir, leikmaður Vals, en hún er búin að koma að níu mörkum í sumar. Hún er stoðsendingahæst í deildinni með sex talsins og þá er hún jafnframt búin að gera þrjú mörk.

Næst á eftir koma Brenna Lovera úr Selfossi, Birta Georgsdóttir úr Breiðabliki og Katrín Ásbjörnsdóttir úr Stjörnunni en þær eru allar búnar að koma að átta mörkum.

Þær sem hafa spilað flestar mínútur
Það er athyglisvert að skoða það að þær tvær sem hafa spilað flestar mínútur af öllum leikmönnum í Bestu deildinni í sumar, þær koma báðar úr Val.

Landsliðskonurnar Sandra Sigurðardóttir og Elísa Viðarsdóttir hafa báðar 1044 mínútur í sumar, meira en allir aðrir leikmenn.

Ég ætla að giska á að þær muni báðar byrja og spila allan leikinn í dag.

Dómari í dag er Guðmundur Páll Friðbertsson. Óska honum og hans aðstoðarfólki góðs gengis!

MJÖG óvænt úrslit þegar þessi lið mættust síðast
Það er óhætt að segja að úrslitin hafi verið mjög óvænt þegar þessi lið mættust síðast.

Sandra María Jessen og Margrét Árnadóttir skoruðu þá mörk Þórs/KA í 2-1 sigri.

Valur ætlar sér eflaust að ná fram hefndum í kvöld.

Þetta er annar leikurinn sem Valur spilar eftir EM pásuna en sá fyrsti sem Þór/KA leikur. Valur er á leið í Meistaradeildina og lék því gegn Stjörnunni í síðustu viku. Sá leikur endaði með 1-1 jafntefli.

Staðan?
Fyrir þennan leik er Valur á toppi deildarinnar með tveggja stiga forskot á Breiðablik sem er í öðru sæti. Þór/KA hefur verið í nokkru basli í sumar og er í áttunda sæti með tíu stig eftir tíu leiki.

Góðan og gleðilegan daginn! Í kvöld mætast Valur og Þór/KA í Bestu deild kvenna. Ég verð á Origo-vellinum og mun segja ykkur frá gangi mála.

Endilega fylgist með!