Þjóðsöngurinn hefur ómað og Páll Sævar Guðjónsson vallarþulur les upp byrjunarlið liðanna.

Á meðan fer Einar Ingi dómari yfir málin með fyrirliðunum Elísu Viðarsdóttur og Natöshu Anasi.

Þetta er að skella á!

Leikmenn eru mættar til vallar og ungir leikmenn beggja liða standa þar heiðursvörð.

Heiðursgestir leiksins eru formenn knattspyrnudeilda félaganna, Halldóra Arnardóttir, markaðsstjóri MS, og frá sittvoru félaginu, þær Ingibjörg Hinriksdóttir og Laufey Ólafsdóttir.

Magnaðar konur sem hafa látið svo gott af sér leiða í þágu knattspyrnu kvenna.

Það er enn rúmt korter í leik og ég hvet ÖLL til að drífa sig niður í Laugardal og horfa á tvö bestu lið landsins takast á.

Aðstæður gætu ekki verið betri, þvílíkur dagur!

Það er bongóblíða í Laugardalnum og styttist í stórleik ársins.

Það er búið að hita vel upp fyrir hann en í morgun fór fram bikarúrslitaráðstefna KÞÍ og KSÍ.

Þar byrjuðu landsliðsþjálfararnir Þorsteinn Halldórsson og Ásmundur Haraldsson á að gera upp frammistöðu Íslands á EM áður en hin írska Clare Conlon, starfsmaður írska knattspyrnusambandsins, hélt afar áhugavert erindi um "Æfingar og keppni kvenkynsleikmanna, með tilliti til tíðahrings".

Ráðstefnunni lauk svo með því að Bára Kristbjörg Rúnarsdóttir, aðstoðarþjálfari Selfoss, leikgreindi liðin tvö, Val og Breiðablik.

Frábært framtak sem kom fólki heldur betur í gírinn fyrir stórleikinn!

Byrjunarliðin hafa verið opinberuð!

Landsliðskonan Elín Metta Jensen er áfram á bekknum hjá Val og byrjar Cyera Mackenzie Hintzen fremst hjá Hlíðarendafélaginu.

Pétur Pétursson, þjálfari Vals, heldur sig við það lið sem hann hefur verið að tefla fram í síðustu leikjum. Það hefur verið að virka vel.

Það hafa margar breytingar orðið á liði Blika á síðustu viku og margir lykilmenn annað hvort meiddir eða farið annað. Þetta er samt sem áður úrslitaleikur og það getur allt gerst.

Agla María Albertsdóttir er meidd hjá Breiðabliki og er ekki með. Birta Georgsdóttir, Helena Ósk Hálfdánardóttir og Vigdís Lilja Kristjánsdóttir eru fremstar hjá Blikum í dag.

Guðmundur Aðalsteinn og Sæbjörn Steinke fóru á Laugardalsvöll á fimmtudag og ræddu við þjálfara og fyrirliða þessara tveggja liða. Hér fyrir neðan má skoða þau viðtöl.

Ásmundur Arnarsson, þjálfari Blika

Natasha Anasi, fyrirliði Blika

Elísa Viðarsdóttir, fyrirliði Vals

Pétur Pétursson, þjálfari Vals

Einar Ingi Jóhannsson verður með flautuna í þessum úrslitaleik í dag. Aðstoðardómarar verða Oddur Helgi Guðmundsson og Jakub Marcin Róg og fjórði dómari Egill Arnar Sigurþórsson. Hjalti Þór Halldórsson verður eftirlitsmaður KSÍ.

Verður metið slegið?
Þetta verður svo sannarlega áhugaverður leikur. Það er vonandi að fólk fjölmenni í stúkuna og búi til mikla stemningu á þessum leik - það er langskemmtilegast þannig.

Það verður fróðlegt að sjá hvort áhorfendametið á bikarúrslitaleik kvenna verði slegið, en það var sett árið 2015 þegar Stjarnan og Selfoss áttust við. Þá mættu 2,435 áhorfendur á Laugardalsvöll.

Það hefur verið mikil sókn í kvennaboltanum síðustu ár og var áhuginn á EM í sumar mikill. Það er kominn tími á að þetta met sé slegið.

Við fengum nokkra góða álitsgjafa til að rýna í þennan leik. Hægt er að skoða þá frétt með því að smella hérna.

Breiðablik er ríkjandi bikarmeistari en það eru tíu ár liðin síðan Valur komst síðast í úrslitaleik! Valur þykir sigurstranlegri aðilinn fyrir þennan leik í dag.

View this post on Instagram

A post shared by Heimavollurinn (@heimavollurinn)

Miðasala fer fram á Tix.is. Fólk er hvatt til þess að kaupa sér miða áður en það kemur á völlinn.

Hvort félagið verður það sigursælasta?
Þetta eru tvö sigursælustu liðin í bikarnum og hafa þau bæði unnið keppnina 13 sinnum. Í dag skýrist það hvaða félag verður það sigursælasta í sögu bikarkeppni kvenna.

Þetta verður í sjötta sinn þar sem þessi tvö lið mætast í sjálfum úrslitaleiknum frá árinu 1994. Síðast gerðist það 2009 og þá hafði Valur betur, 5-1, eftir framlengdan leik. Kristín Ýr Bjarnadóttir og Laufey Ólafsdóttir gerðu báðar tvennu fyrir Val í þeim leik.

Valur hefur farið með sigur af hólmi í síðustu þrjú skiptin sem þessi tvö lið hafa mæst en þar áður vann Breiðablik tvisvar.

Þetta eru tvö bestu lið landsins þessa stundina og er um að gera að skella sér á völlinn í dag.

Hvernig fer leikurinn?
1.790 tóku þátt í skoðanakönnun á forsíðu.

45% Breiðablik vinnur
55% Valur vinnur

ÞAÐ ER KOMIÐ AÐ ÞVÍ
Í dag fer fram úrslitaleikurinn í Mjólkurbikar kvenna. Breiðablik og Valur eigast við í leik sem hefst klukkan 16:00.

Þetta eru tvö sigursælustu liðin í bikarnum og hafa þau bæði unnið keppnina 13 sinnum. Í dag skýrist það hvaða félag er það sigursælasta í sögu bikarkeppni kvenna.

Þetta eru tvö bestu lið landsins þessa stundina og er um að gera að skella sér á völlinn!