Það er gríðarlega þéttsetið í stúkunni og fólk hvatt til þess að þjappa sér saman til að skapa meira pláss. Gestunum fylgdi flott stuðningsfólk þannig að það má eiga von á glimrandi góðri stemningu í dag.

Sömuleiðis er Stöð 2 Sport teymið mætt að sunnan og Guðmundur Benediktsson ætlar að lýsa leiknum af sinni alkunnu snilld.


Gummi Ben lætur sig ekki vanta í veisluna.

Leikbönn

Rodri og Elfar Árni Aðalsteinsson taka út leikbann í dag og þurfa því Arnar Grétarsson og Hallgrímur Jónasson að gera allavega tvær breytingar á liðinu sem að vann í Garðabænum gegn Stjörnunni.

Víkingar eru með hreinan skjöld aftur á móti.


Rodri skoraði tvívegis gegn Víkingum í 2-2 jafntefli á síðasta tímabili. Hann tekur út leikbann í dag ásamt Elfari Árna Aðalsteinssyni.

Dómarinn

Erlendur Eiríksson er á flautunni í dag. Hann fékk kaldar kveðjur frá Arnari Gunnlaugssyni í fyrri leik þessara liða, en Arnar var þó fljótur að biðjast afsökunar á hegðun sinni og kallaði hann "Ella, vin sinn".

Jóhann Gunnar Guðmundsson og Eysteinn Hrafnkelsson eru aðstoðardómarar. Varadómari er Aðalbjörn Heiðar Þorsteinsson og eftirlitsdómari er enginn annar en Þóroddur Hjaltalín.


Erlendur er einn af reynslumestu dómurum landsins og býður vonandi ekki uppá flautukonsert.

Síðustu fimm

Gengi KA: WLWWW

KA hefur verið á frábæru skriði og unnið fjóra af síðustu fimm deildarleikjum sínum með markatöluna 13-4. Eini tapleikurinn kom í umtöluðum leik gegn KR á KA vellinum. Þar fékk Arnar Grétarsson rautt spjald eftir samskipti sín við varadómarann Svein Arnarsson og uppskar 5 leikja bann í kjölfarið. Síðan þá hafa allir leikir unnist og sóknarmenn liðsins verið iðnir við kolann, þá sérstaklega Nökkvi Þeyr Þórisson. Þá hefur Hallgrímur Mar Steingrímsson farið vaxandi og virðist vera að nálgast toppform á flottum tímapunkti fyrir KA.

Gengi Víkings: WDDDD

Gestunum hefur gengið illa að ná sigrum í ágústmánuði og hafa gert hvert jafnteflið á fætur öðru. Nú síðast gerðu þeir 2-2 jafntefli í bráðfjörugum leik þar sem að Sigurður Steinar Björnsson hefði getað tryggt Víkingum sigurinn á lokamínútu leiksins. Arnar Gunnlaugsson sagði eftir leikinn við Val að staðan væri erfið, en ekki ómöguleg.

,,Eins og staðan er í dag þá virka bara lið í betri málum heldur en við, en við munum svo sannarlega ekki gefast upp og þetta er fljótt að breytast. Við þurfum að þrauka fram að úrslitakeppni og vera ekki meira en helst fimm stigum á eftir toppliðinu og þá getur allt gerst.''


KA er á miklu skriði og eiga heitasta leikmann deildarinnar, Dalvíkinginn Nökkva Þey Þórisson.

Fyrri leikur liðanna: Víkingur R. 2-1 KA

Liðin mættust 29. maí í Fossvoginum og leikurinn bauð uppá alvöru drama. Ari Sigurpálsson kom heimamönnum í Víkingi yfir á 54. mínútu, áður en Nökkvi Þeyr Þórisson jafnaði metin rúmum 10 mínútum fyrir leikslok.

Rétt fyrir mark KA hafði Arnar Gunnlaugsson, þjálfari Víkings, ætlað sér að gera tvöfalda skiptingu en fékk ekki að framkvæma hana. Eftir jöfnunarmarkið reiddist Arnar mjög og fékk að líta rauða spjaldið.

Það kom þó ekki að sök þar sem að Víkingur átti ás uppí erminni í formi Viktors Örlygs Andrasonar. Lúmskt skot hans skilaði sér í netið á 92. mínútu og reyndist sigurmark leiksins.

Þjálfararnir voru auðvitað í misgóðu skapi eftir leik.

Arnar Gunnlaugsson sagði leikinn hafa verið skrítinn og bera þess merki að liðin væru þreytt eftir leikjaálagið snemma móts. Varðandi rauða spjaldið sagði hann: ,,Auðvitað missi ég bara stjórn á skapi mínu og á auðvitað ekki að gera það og mér þykir það bara mjög leiðinlegt.''

Kollegi hans KA megin, Arnar Grétarsson, sagði að Íslands- og bikarmeistararnir hafi verið talsvert sterkari í fyrri hálfleik en var ánægður með seinni hálfleikinn og augljóslega svekktur að missa leikinn í tap. ,,Það var svekkjandi að hafa komið til baka og náð að jafna, en ná ekki að halda.''


Varadómarinn í fyrri leik liðanna, Erlendur Eiríksson, fær kaldar kveðjur frá þjálfarateymi Víkings. Arnar Gunnlaugsson fékk rauða spjaldið í kjölfarið, en Víkingar unnu þó leikinn.

Í dag mætast liðin í 2. og 3. sæti deildarinnar. Heimamenn í KA hafa nælt í 36 stig eftir 18 umferðir, á meðan að gestirnir úr Fossvoginum eru með 32 stig og eiga leik til góða. KA getur með sigri breikkað bilið á milli sín og Víkings og um leið sett pressu á Breiðablik sem að tróna á toppi deildarinnar með 42 stig. Blikar fá Leikni R. í heimsókn kl. 19:15 í kvöld.

Þá eru liðin bæði komin í undanúrslit Mjólkurbikarsins en þar mæta Víkingar í Kópavoginn og spila gegn toppliði Breiðabliks, á meðan að KA fékk útileik gegn FH.


Daníel Hafsteinsson og Davíð Örn Atlason í fyrri leik liðanna í sumar.

Góðan daginn! Hér mun fara fram textalýsing á stórleik KA og Víkings R. í Bestu-deild karla.