Liðin eru mætt í hús

Hjá Keflavík tekur Kian Williams út leikbann, þá fer Ernir Bjarnason á bekkinn. Inn í liðið koma þeir Dagur Ingi Valsson og Frans Elvarsson.

Hjá Skagamönnum fer Oliver Stefánsson á bekkinn fyrir Tobias Stagaard.

Reynist Jasmín sannspá?

Jasmín Erla Ingadóttir leikmaður Stjörnunar í Bestu deild kvenna sér um að spá fyrir um þessa 19.umferð fyrir okkur hér á Fótbolta.net að þessu sinni. Um leikinn í Keflavík sagði hún.

Keflavík 1 - 2 ÍA
,,Þar sem ég á hálfan skagamann vil ég að þeir haldi sér uppi, þeir mæta jafn peppaðir og í fyrra. Adam verður að sjálfsögðu með markið fyrir Keflavík.´´

Tríóið

Dómari leiksins er í toppstandi líkamlega svo mikið er víst en um flautuna heldur Sigurður Hjörtur Þrastarson. Honum til aðstoðar eru þeir Sveinn Þórður Þórðarson og Patrik Freyr Guðmundsson. Fjórði dómari er Gunnar Oddur Hafliðason og eftirlitsmaður KSÍ er Frosti Viðar Gunnarsson.

Leikurinn hér í fyrra

Skagamenn hugsa með hlýju til 25.september 2021 þegar liðin mættust í síðustu umferð Pepsi Max deildarinnar sálugu. Skagamenn sem þurftu sigur til þess að halda sæti sínu í deildinni. Það blés ekki byrlega fyrir ÍA þegar rúmur klukkutími var liðin af leiknum og staðan 2-0 Keflavík í vil en á ótrúlegum sjö mínútna kafla frá 68. mínútu til þeirrar 75. skoruðu Skagamenn þrjú mörk höfðu sigur af hólmi 3-2. Hetja þeirra sem skoraði þriðja markið var hinn hárprúði Sindri Snær Magnússon sem söðlaði einmitt um í vetur og gekk til liðs við Keflavík. Stemmingin í stúkunni var vægast sagt stórkostleg hjá gulum þennan dag þótt grindverkið fyrir framan stúkuna hafi eflaust fengið full mikið að kenna á gleði þeirra.

Skagamenn eins og áður sagði minnugir þessa dags og hlaða í rútuferð frá Jaðarsbökkum fyrir stuðningsmenn sína og á ég því ekki von á öðru en að stemmingin verði góð á HS Orkuvellinum í dag.

Keflavík

Heimamenn í Keflavík eiga í harðri baráttu við Fram og KR um 6.sæti deildarinnar og þar með sæti í efri hluta hennar við skiptingu eftir 22 leiki. Gengi liðsins að undanförnu hefur verið helst til brokkgengt og hefur liðið aðeins náð í einn sigur í síðustu 5 leikjum. Það má þvi til sanns vegar færa að Keflavík þurfi þrjú stig í dag ætli þeir sér að eiga einhvern raunhæfan möguleika á að vera í efri hluta deildarinnar og fá að vera hluti af 6 bestu liðum landsins.

ÍA

Eins og venja er skulum við fara aðeins yfir liðin sem mætast hér í dag og byrja á liði ÍA.

Skagamenn sitja á botni deildarinnar fyrir þennan leik og hafa satt best að segja verið í nokkuð vondum málum í allt sumar. 11 stig eru í pokanum að loknum 18 leikjum en það gefur þó kagamönnum ákveðna von að hafa sótt sigur í síðasta leik gegn ÍBV sem fram fór 21.ágúst síðastliðin. Sigurinn markaði enda á langri leit ÍA að sigri en fyrir sigurinn á ÍBV unnu þeir síðast deildarleik 24.apríl!

Það er því ekki seinna að vænna fyrir Skagamenn að fara að setja stig á töfluna að alvöru þar sem senn líður að lokum venjulegu deildarkeppninar og úrslitakeppnin að hefjast.

Heil og sæl kæru lesendur og verið hjartanlega velkomin í þessa beinu textalýsingu Fótbolta.net frá leik Keflavíkur og ÍA í 19.umferð Bestu deildar karla.