Áhorfendur að fá sér sæti meðan leikmenn eru á lokametrum upphitunar fyrir leikinn Einhverjir líklega fengið að fara fyrr úr vinnu til að geta notið leikdagsupplifunar. 17:00 á virkum degi seint talinn ákjósanlegur tími fyrir leik sem þennan. Vonandi fara að vaxa flóðljós hér í Krikanum.

Einhver hópur KA manna hefur lagt á sig bíltúr um þennan leik. Ég veit allavega um einn vel mannaðan bíl sem einnig var vel byrgður upp af góðum drykkjum.

Ég er kominn með einn rjúkandi kaffibolla og tel nú bara niður í leikinn. Tómas Meyer fjölmiðlafulltrúi FH er búinn að hella uppá og draga fram úrvals veitingar fyrir fréttamannastúkuna. Hann er bjartsýnn fyrir hönd síns lið og er með þá tilfinningu að FH taki þennan leik.

67% lesenda eru ósammála, samkvæmt könnun sem við vorum að loka fyrir á Twitter. Þeir spá KA sigri í dag.

Ég vonast sjálfur bara eftir framlengingu og stuði.

Skiljanlega þá munu flestir þeir sem fylgjast með þessum leik beina sjónum sínum sérstaklega að Nökkva Þey Þórissyni sem hefur verið algjörlega óstöðvandi í sumar. Er farinn að lykta af markametinu í Bestu deildinni þar sem hann hefur skorað 17 mörk, í bikarnum hefur hann skorað 5 mörk.

Byrjunarlið FH er einfaldlega alveg eins og í markalausa jafnteflinu gegn KR. Haraldur Einar Ásgrímsson tekur út leikbann og er ekki í hópnum hjá FH.

Byrjunarlið KA er komið inn

Miðvörðurinn öflugi Dusan Brkovic fór meiddur af velli í tapi KA gegn Víkingi í Bestu deildinni og er ekki með í dag. Þá tekur Þorri Mar Þórisson út leikbann hjá KA og Steinþór Freyr Þorsteinsson og Andri Fannar Stefánsson setjast á bekkinn.

Rodrigo Gomes Mateo og Elfar Árni Aðalsteinsson tóku út leikbann gegn Víkingi en koma inn í byrjunarliðið. Gaber Dobrovolj og Hrannar Björn Steingrímsson koma líka inn í byrjunarliðið. Fjórar breytingar hjá KA.

Ég er búinn að koma mér fyrir í Kaplakrikanum. Skýjað og logn, hiti kringum 10 gráðurnar. Gylfi Þór Orrason eftirlitsmaður valsar um völlinn og heilsar sérstaklega vel upp á Steinar Stephensen starfsmann FH.

Í kvöld kemur í ljós hvort það verður FH eða KA sem leikur úrslitaleik gegn Víkingi í Mjólkurbikarnum.

Ákaflega mikilvægur leikur fyrir KA


Flestir búast við útisigri. Ef KA vinnur þá fer það langt með að tryggja að þriðja Evrópusætið verður í boði í deildinni. Sigur Akureyrarliðsins eykur möguleika þess á Evrópusæti verulega. Svo ekki sé nú talað um bikarmeistaratitilinn sjálfan.

Arnar Grétarsson verður á hliðarlínunni í dag en leikbann hans gildir ekki í bikarnum.

Bjargar bikarinn tímabilinu?


FH-ingar eru aðeins einu stigi fyrir ofan fallsæti í Bestu deildinni. Þetta hefur verið mjög erfitt sumar hjá FH og liðið aðeins unnið þrjá deildarleiki. Það myndi gera mikið fyrir tímabil FH að koma sér í úrslitaleikinn, vera á skrefi nær bikar og Evrópusæti.

Lögregluvarðstjórinn með flautuna


Lögregluvarðstjórinn Pétur Guðmundsson dæmir leikinn. Aðstoðardómarar verða Jóhann Gunnar Guðmundsson og Oddur Helgi Guðmundsson og Elías Ingi Árnason verður fjórði dómari.

Leið FH í undanúrslitin


FH hefur aðeins mætt liðum úr neðri deildum. 3-0 sigur vannst gegn Kára frá Akranesi í 32-liða úrslitum, 6-1 sigur gegn ÍR í 16-liða úrslitum og svo 4-2 útisigur gegn Kórdrengjum í hörkuleik í 8-liða úrslitum.

Steven Lennon er markahæsti leikmaður FH í bikarnum en þar er hann kominn með sex mörk.

Leið KA í undanúrslitin


KA vann Reyni Sandgerði 4-1 í 32-liða úrslitum og lagði Fram svo með sömu markatölu í 16-liða úrslitum. Í 8-liða úrslitum vannst svo 3-0 sigur gegn 2. deildarliði Ægis. KA hefur því unnið alla bikarleiki sína með þriggja marka mun.

Nökkvi Þeyr Þórisson skoraði tvö mörk gegn Ægi og er kominn með fimm mörk í bikarnum.

Góðan og gleðilegan daginn! - Í Kaplakrikanum mætast FH og KA í undanúrslitum Mjólkurbikarsins klukkan 17:00. Leikið verður til þrautar um sæti í sjálfum úrslitaleiknum sem verður á Laugardalsvelli þann 1. október.



Ef einhver er að velta leiktímanum fyrir sér þá eru ekki flóðljós á Kaplakrikavelli og því ekki hægt að leika seinna en þetta!