Óskar Smári Haraldsson, annar af þjálfurum kvennaliðs Fram spáir í leikinn

Fram 3 - 2 KA

Það er svo sannarlega gaman að vera Framari í dag. Liðið spilar einn skemmtilegasta fótboltann í deildinni og alltaf eru mörk þegar Fram spilar. Hörkuleikur í dal draumanna, þar sem þreytan hjá KA mun segja til sín í lokin.

Gummi Magg skorar fyrsta markið, en KA svara með 2 frá Hallgrími og ein besta 6an í deildinni, Rodrigo Gomes Mateo, skorar svo gullfallegt mark. Fram gefst ekki upp og koma til baka í seinni og klára leikin. Jannick kemur inná og skorar og mun leggja svo upp annað mark á Gumma Magg sem setur þriðja og klárar leikin undir lokin fyrir Fram.

Thiago verður áfram að sýna töfra sína, hvað er hann eiginlega góður í fótbolta?

Seinkun á leiknum

Þessu leikur mun hefjast klukkan 18:00 vegna seinkunnar á flugi KA manna frá Akureyri.

Dómari leiksins

Maðurinn með flautuna verður Helgi Mikael Jónasson og honum til halds og trausts verða Kristján Már Ólafs og Eysteinn Hrafnkelsson.

Eftirlitsmaður er Halldór Breiðfjörð Jóhannsson og varadómari er Ívar Orri Kristjánsson

Innbyrðis viðureignir

Alls hafa liðin mæst 7 sinnum á síðustu 10 árum í keppnisleik. Síðast þegar liðin mættust var í 16 liða úrslitum Mjólkurbikarsins þann 26. júní síðastliðinn. Þar sigraði KA 4-1 með 3 mörkum frá Nökkva Þey Þórissyni og einu frá Hallgrími Mar Steingrímssyni á meðan Guðmundur Magnússon gerði eina mark Framara.

Niðurstaðan úr þessum 7 leikjum hefur verið þannig að Fram hefur unnið 1 leik, það hafa verið 3 jafntefli og KA hefur unnið 3 leiki.

Sameiginleg markatala úr leikjunum er Fram með 9 mörk og KA með 16 mörk. Það þýðir að Fram er að meðaltali með 1,29 mörk í leik á meðan KA er með 2,29 mörk í leik.
Nökkvi Þeyr Þórisson síðasta hetja KA í þessari viðureign.

KA menn vilja sigur í þessum leik

Akureyringar réttu megin við ána hafa átt erfiða viku. Fyrst var það 2-3 tapið gegn Víking þar sem þeir fengu sigurmakrið á sig á 90. mínútu í deildinni síðastliðinn laugardag og svo var það 2-1 tapið gegn FH þar sem sigurmarkið kom á 93. mínútu.

Því hljóta leikmenn KA að koma alveg dýrvitlausir inn í þennan leik og vilja bæta upp fyrir slæm úrslit. KA situr í 2. sæti eins og er og er 9 stigum eftir Breiðablik. Því er erfitt að segja að þeir séu í beinni titilbaráttu en ætla norðanmenn sér að komast í evrópukeppni þá er sigur gegn Fram eitthvað sem þarf að takast. Arnar Grétarsson þjálfari KA er enn í leikbanni í þessum leik og því mun Hallgrímur Jónasson aðstoðarþjálfari liðsins stýra liðinu.

Framarar sækjast eftir efri hlutanum

Eins og er sitja Framarar í 7. sæti í deildinni bara 3 stigum eftir KR í 6. sæti. Það eru aðeins 3 leikir eftir þar til deildinni verður skipt í tvennt og það væri gríðarlega sterkt fyrir nýliða að berjast við þá bestu í ofsalegum október.

Til þess að það gerist þurfa þeir að ná hagstæðum úrslitum úr næstu 3 leikjum. Eftir KA í dag eiga þeir ÍBV úti og Keflavík heima á meðan KR á leiki við ÍA, Störnuna og Víking. Samkvæmt töflunni á Fram klárlega auðveldari leiki og Jón Sveinsson þjálfari vonast væntanlega eftir því að geta byrjað atlöguna að 6. sæti strax í dag.

Góðan daginn og verið velkomin í beina textalýsingu frá leik Fram og KA í 20. umferð Bestu deildar karla.

Leikurinn hefst klukkan 17:00 og verður spilaður á heimavelli Fram í Úlfarsárdal.