Þrjár og þrjár - Enginn Tryggvi
Byrjunarliðin hafa verið opinberuð og gerir Óskar Hrafn Þorvaldsson, þjálfari Breiðabliks, þrjár breytingar á sínu liði frá leiknum gegn Víkingi á fimmtudag. Viktor Karl Einarsson, Mikkel Qvist og Davíð Ingvarsson taka sér sæti á bekknum. Inn koma Kristinn Steindórsson, Viktor Örn Margeirsson og Andri Rafn Yeoman.

Ólafur Jóhannesson, þjálfari Vals, gerir þrjár breytingar frá leiknum gegn Fram síðasta mánudag. Patrick Pedersen tekur út leikbann, Tryggvi Hrafn Haraldsson er ekki í hóp og Guðmundur Andri Tryggvason tekur sér sæti á bekknum. Inn koma þeir Birkir Heimisson, Arnór Smárason og Orri Hrafn Kjartansson.

Tryggvi glímir við meiðsli eftir því sem ég best veit.

Ísak og Jason kólnað
Ísak Snær Þorvaldsson byrjaði mótið frábærlega og var fyrstu mánuði þess besti leikmaður deildarinnar. Hann var kominn með ellefu mörk í júní en hefur einungis skorað eitt mark síðan og það kom í 3-1 sigri gegn ÍA fyrir rúmlega mánuði síðan. Hann hefur misst út leiki vegna meiðsla og til að gæta allrar sanngirni hefur hann haldið áfram að koma að mörkum, eitthvað lagt upp, en aðeins misst dampinn þegar kemur að markaskoruninni.

Það sem minna hefur verið talað um er að Jason Daði Svanþórsson, sem hefur skorað sjö mörk í sumar, hefur ekki skorað síðan í júní. Hann hefur ekki virkað í sama takti og hann var upp á sitt besta.

Það má segja að það sé mikið styrkleikamerki hjá Breiðabliki að vera þrátt fyrir minnkandi markaskor þessara tveggja leikmanna langefst í deildinni.

Viktor Örn snýr úr banni - Lasse Petry og Patrick í banni
Viktor Örn Margeirsson hefur misst út síðustu tvo leiki vegna leikbanns. Hann snýr til baka í dag og er líklegur til þess að byrja.

Hjá Val verða þeir Lasse Petry og Patrick Pedersen fjarri góðu gamni þar sem þeir taka út leikbann.

Byrjunarliðin verða opinberuð klukkutíma fyrir leik.

Óskar Smári spáir þrennur frá Jasoni
Óskar Smári Haraldsson er spámaður Fótbolta.net þessa umferðina. Hann spáir heimasigri í kvöld.

Breiðablik 3 - 1 Valur
Hvað gera góð lið þegar þau fá kjaftshöggið? Óskar kom þessu vel frá sér eftir leikinn gegn Blikunum: "þetta snýst ekki um höggið sjálft, heldur hvernig þú bregst við því" og það sem Blikarnir munu gera er að bregðast við því með því að sigra Val sannfærandi í stórleik umferðarinnar.

Jason Daði var vægast sagt slakur í leiknum gegn Víkingi, ég man ekki eftir 2 slökum leikjum í röð frá honum þannig ég set þrennu á hann. Arnór Smára fær 5 min undir lokin og setur mark á þeim tíma, enda er það svosem það sem hann gerir þegar hann fær að spila - kemur með impact.

Ívar Orri með flautuna
Ívar Orri Kristjánsson er með flautuna í leiknum í kvöld og honum til aðstoðar eru þeir Birkir Sigurðarson og Jóhann Gunnar Guðmundsson.

Þorvaldur Árnason er varadómari og Kristinn Jakobsson er eftirlitsmaður KSÍ.

Ívar Orri

Staðan í deildinni og síðustu leikir:
Breiðablik er á toppi deildarinnar og hefur unnið tvo síðustu deildarleiki sína. Liðið vann Leikni örugglega í síðustu umferð, 4-0. Síðasti leikur liðsins var þó í undanúrslitum Mjólkurbikarsins þar sem liðið tapaði 0-3 gegn Víkingi, úrslit sem eflaust svíða talsvert. Forskot Breiðabliks á KA, liðið í 2. sæti, fyrir leikinn í kvöld er átta stig.

Valur er í fjórða sæti deildarinnar, þrettán stigum á eftir Breiðabliki. Liðið er taplaust í síðustu sex leikjum en hefur gert tvö jafntefli í röð. Síðasti leikur endaði með 1-1 jafntefli gegn Fram þar sem Fram jafnaði undir lokin.

Fyrri leikur liðanna í sumar endaði með 3-2 sigri Vals á Origo vellinum og var það fyrsta tap Breiðabliks í sumar.
Pedersen skoraði sigurmark Vals í uppbótartíma í fyrri leiknum

Umferðinni lýkur með risaleik!
Góða kvöldið lesendur góðir og veriði velkomnir í beina textalýsingu frá leik Breiðabliks og Vals í lokaleik 20. umferðar í Bestu deild karla.

Leikurinn hefst klukkan 19:15 og fer fram á Kópavogsvelli, heimavelli Breiðabliks.