Liðin ganga hér inn á. Afar fáir mættir á völlinn en vonandi skánar það brátt, Ísfirðingar þekktir fyrir að mæta mátulega seint. Vestri leika í sínum alkunnu dökkbláu og rauðu treyjum en Selfyssingar eru í hvítum og ljósbláum búning.

Veðrið eins og best verður á kosið. Þurrt, nánast logn hiti um 10 gráður.

Liðin eru klár. Enginn Tokic hjá Selfoss en Gary Martin treystir sér á völlinn þrátt fyrir fráfall drottningar. Hjá Vestra er liðið nálægt sínu sterkasta en Friðrik Hjaltason varnarmaður er ekki með í dag, grunar að hann þurfi lengri tíma að jafna sig á fréttunum frá Bretlandi.

Þórður Þorsteinn Þórðarson er dómari í dag. Verður áhugavert að fylgjast með þessum unga dómara sem er með talsverða reynslu sem leikmaður á efsta stigi íslenskrar knattspyrnu.

Fyrri leikur liðanna í júlíbyrjun endaði með 1-0 sigri Ísfirðinga. Deniz Yaldir var þá allt í öllu, skoraði sigurmarkið og var rekinn út af.

Selfoss er stigi fyrir ofan Vestra í sjötta sæti. Eftir góða byrjun misstu þeir af lestinni í toppbaráttunni og Fylkir og HK stungu af. Selfyssingar unnu 5-3 sigur á Grindavík í síðustu umferð, ég sá þann leik ekki en grunar að það hafi verið mikill markaleikur.

Vestri er í níunda sæti með 27 stig en einvörðungu tvö stig eru upp í Aftureldingu í fimmta sæti. Vestri gerði jafntefli við fallna KV menn í síðustu umferð.

Komið heil og jafnvel sæl á leik Vestra og Selfoss í 21.umferð Lengjudeildar karla. Það er við hæfi að þessi leikur fari fram þar sem lognið á lögheimili þar sem þau sigla bæði lygnan sjó nú þegar tvær umferðir eru eftir í mótinu.