Liðin eru mætt í hús og má sjá hér til hliðar. Stóru fréttir dagsins eru ekki þeir 11 menn sem byrja í hvoru liði heldur sú staðreynd að Kjartan Henry Finnbogason er ekki í leikmannahópi KR. Útvarpsþætti Fótbolta.net barst bréf er rtt var um leikinn þar sem fram kom að Kjartan væri í fínu standi og hefði æft í vikunni með liðinu en ekki hlotið náð fyrir augum Rúnars Kristinssonar sem treystir á Sigurð Bjart í fremstu víglínu og hefur Kristján Flóka á bekknum honum til halds og trausts.

Spámaðurinn

Málarinn geðþekki Hrafnkell Freyr Ágústsson, einn af sérfræðingum Dr. Football spáir í leiki umferðinnar. Um leikinn í Víkinni segir Hrafnkell.

Víkingur 4 - 1 KR
Arnar Gunnlaugsson er með Rúnar Kristinsson í læstri hliðarlegu og hefur legið með hann í gólfinu í rúmlega ár. 4-1 fyrir Víking þar sem Danijel Dejan Djuric setur 2 og leggur upp 2 og bróðir hans, Nikola verður með Grænan Tuborg ber að ofan að sveifla Víkingstreyjunni í stúkunni.

Dómarinn

Helgi Mikael Jónasson dæmir leiks dagsins í Víkinni. Honum til aðstoðar eru þeir Egill Guðvarður Guðlaugsson og Bergur Daði Ágústsson. Fjórði dómari er Jóhann Ingi Jónsson og eftirlitsmaður KSÍ Gunnar Jarl Jónsson.

Víkingur

Heimamenn í Víkingum elta Blika og verandi sex stigum á eftir þeim þurfa þeir að treysta á að grænir misstígi sig. Það þýðir það líka að Víkingar mega alls ekki við því að misstíga sig sjálfir, bæði upp á það að missa Blika ekki of langt fram úr sér sem og að missa KA uppfyrir sig en lærisveinar Arnars Grétarssonar sitja í 3.sæti deildarinnar aðeins tveimur stigum á eftir Víkingum.

KR

Gestirnir úr Vesturbæ Reykjavíkur tryggðu sæti sitt í efri riðli deildarinnar um liðna helgi með sannfærandi sigri á Stjörnunni. Vissulega jákvætt fyrir liðið að fá að keppa við bestu lið landsins en líklega eru menn í Vesturbæ ósáttir með að eiga engan raunhæfan möguleika á því að fá nokkuð út úr tímabilinu en titill er algjörlega úr myndinni og sæti í evrópukeppni eins nærri tölfræðilegum ómöguleika og hægt er.

KR getur þó huggað sig við það að liðið er í kjörstöðu til að vera áhrifavaldur um úrslit mótsins. 6 leikir eftir gegn efstu liðum deildarinnar að leiknum í dag meðtöldum og ansi mörg tækifæri til þess að skemma fyrir öðrum liðum sem eygja von á einhverju glæstu.

Heil og sæl kæru lesendur og verið hjartanlega velkomin í beina textalýsingu Fótbolta.net frá leik Víkinga og KR í lokaumferð hefðbundinnar deildarkeppni Bestu deildarinnar en að loknum leikjum dagsins verður deildinni skipt í tvo riðla eins og líklega allir eru búnir ná.