Verið er að leika þjóðsöngvana. Byrjað á Venesúela og svo er það þjóðsöngur Íslendinga, lofsöngurinn. Ó, guð vors lands.

Þessi leikur verður algjörlega áhorfendalaus... minnir fullmikið á Covid tímann drepleiðinlega.

Það er ansi notalegt hérna á vellinum. Ég er jú eini fjölmiðlamaðurinn sem hér er staddur svo menn eru lítið að stressa sig á hlutunum. Milt og gott veður. Hálfskýjað og 15 gráður. Völlurinn mjög góður að sjá.

676 dagar síðan Alfreð spilaði síðast fyrir landsliðið
Það var leikur í Þjóðadeildinni í nóvember 2020.

Aron Einar spilar sinn 98. landsleik í dag. Síðast spilaði hann fyrir landsliðið í júní í fyrra, í 2-2 jafntefli gegn Póllandi í vináttulandsleik. Birkir Bjarnason á landsleikjamet Íslands og heldur áfram að smyrja ofan á það í dag. Hans 111. landsleikur, takk fyrir túkall.

Búið að kveikja á flóðljósunum og okkar menn mættir í upphitun. Það má reikna með því að byrjunarlið Íslands gegn Albaníu verði það sama og í þessum leik. Lyktar af því að þetta sé algjörlega notað sem æfing fyrir þann mögulega úrslitaleik.

Byrjunarlið Venesúela er komið inn og hægt er að sjá það hér til hliðar. Jose Pekerman er þjálfari Venesúela. Reyndur Argentínumaður sem var með kólumbíska landsliðið 2012-2018, áður en hann tók við Venesúela seint á síðasta ári. Hann er 73 ára og var með argentínska landsliðið 2004-2006.

Strákarnir okkar eru búnir að taka göngutur um völlinn hér í Austurríki. Það verður einmitt heimamamaður sem heldur um flautuna. Sebastian Gishamer heitir dómarinn.

Arnar Þór Viðarsson landsliðsþjálfari hefur opinberað byrjunarliðið.

Rúnar Alex Rúnarsson heldur stöðunni í markinu þrátt fyrir að Elías Rafn Ólafsson sé kominn aftur. Aron Einar Gunnarsson landsliðsfyrirliði kemur beint inn í byrjunarliðið og spilar sem miðvörður en hann hefur verið að leika þá stöðu með félagsliði sínu, Al Arabi í Katar.

Guðlaugur Victor Pálsson leikur sem hægri bakvörður og Alfreð Finnbogason er í fremstu víglínu.

Klefinn er klár á Motion Invest Arena!

Flestir í leikmannahópi Venesúela spila í Suður-Ameríku eða í bandarísku MLS-deildinni. Þar eru þó nokkur nöfn úr evrópska fótboltanum sem fólk ætti að þekkja.

Þar á meðal er Salomon Rondon, sóknarmaður Everton í ensku úrvalsdeildinni. Hann er markahæsti landsliðsmaður Venesúela frá upphafi með 35 mörk í 89 leikjum.

Fyrirliði Venesúela heitir Tomas Rincon og spilar fyrir Sampdoria á Ítalíu. Hann er 34 ára og hefur spilað 118 landsleiki.

Islandia en el horizonte…

Ultima práctica antes del juego de mañana. Los dirigidos por José Pekerman realizaron trabajos físicos, tácticos y de definición de cara al encuentro ante los europeos. #SomosVinotinto 💪🏼🇻🇪 pic.twitter.com/Rd3iWTADBW

— La Vinotinto (@SeleVinotinto) September 21, 2022

Hluti af gamla bandinu er mættur aftur. Þar á meðal Alfreð Finnbogason. Ég spjallaði við Alfreð á þriðjudag og viðtalið er hér:

Á þriðjudag fór ég og heimsótti hótel íslenska landsliðsins í Vínarborg og ræddi þar við nokkra leikmenn. Þar á meðal Jón Dag Þorsteinsson sem færði sig um set í sumar og er kominn í belgíska boltann.

Geggjað að fá Alfreð, Aron og Guðlaug Victor aftur í hópinn - „Þeir eru til staðar fyrir alla" https://t.co/DJNVbjutXc

— Fótbolti.net (@Fotboltinet) September 20, 2022

Hér má sjá landsliðshóp Íslands fyrir þennan glugga. Arnar Þór Viðarsson landsliðsþjálfari þurfti að gera eina breytingu á upprunalegum hóp. Alfons Sampsted datt út vegna meiðsla og inn kom fyrirliði Breiðabliks, Höskuldur Gunnlaugsson.

Markverðir:
Rúnar Alex Rúnarsson - Alanyaspor
Elías Rafn Ólafsson - Midtjylland
Patrik Sigurður Gunnarsson - Viking

Varnarmenn:
Daníel Leó Grétarsson - Slask Wroclaw - 10 leikir
Hjörtur Hermannsson - Pisa - 25 leikir, 1 mark
Hörður Björgvin Magnússon - Panathinaikos - 41 leikur, 2 mörk
Davíð Kristján Ólafsson - Kalmar FF - 7 leikir
Guðlaugur Victor Pálsson - D.C. United - 29 leikir, 1 mark
Höskuldur Gunnlaugsson - Breiðablik - 5 leikir

Miðjumenn:
Aron Einar Gunnarsson - Al Arabi - 97 leikir, 2 mörk
Hákon Arnar Haraldsson - FC Köbenhavn - 3 leikir
Ísak Bergmann Jóhannesson - FC Köbenhavn - 13 leikir, 1 mark
Þórir Jóhann Helgason - Lecce - 12 leikir, 2 mörk
Stefán Teitur Þórðarson - Silkeborg IF - 12 leikir, 1 mark
Birkir Bjarnason - Adana Demirspor - 110 leikir, 15 mörk
Aron Elís Þrándarson - OB - 14 leikir, 1 mark
Mikael Neville Anderson - AGF - 14 leikir, 1 mark
Jón Dagur Þorsteinsson - OH Leuven - 21 leikur, 4 mörk
Mikael Egill Ellertsson - Spezia Calcio - 6 leikir
Arnór Sigurðsson - IFK Norrköping - 21 leikur, 2 mörk

Sóknarmenn:
Alfreð Finnbogason - Lyngby BK - 61 leikur, 15 mörk
Andri Lucas Guðjohnsen - IFK Norrköping - 9 leikir, 2 mörk
Sveinn Aron Guðjohnsen - IF Elfsborg - 16 leikir, 1 mark

Heil og sæl, velkomin með okkur til Austurríkis!

Hér á Motion Invest Arena í úthverfi Vínar fer fram vináttulandsleikur Venesúela og Íslands. Leikurinn hefst 18 hér að staðartíma en 16 að íslenskum tíma.

Ísland hefur aldrei áður mætt Venesúela í landsleik. Lið Venesúela er sem stendur í 56. sæti á styrkleikalista FIFA en Ísland er í 63. sæti.

Ísland leikur tvo leiki í þessum glugga, aðalmálið er leikur við Albaníu í B-deild Þjóðadeildarinnar fer fram í Tirana þriðjudaginn 27. september og gæti endað sem úrslitaleikur um sæti í A-deildinni.



Á myndinni má sjá Aron Einar Gunnarsson, sem er mættur aftur í landsliðið, á æfingu í Vín á mánudaginn. Aron er tekinn aftur við fyrirliðabandinu.