Patrik Johannesen er að snúa aftur í lið Keflavíkur eftir að hafa glímt við meiðsli í nokkurn tíma undir lok fyrri hluta mótsins. Gleðiefni fyrir Keflavík að sjá að hann er orðinn heill heilsu en Patrik hefur verið burðarás í sóknarleik Keflavíkur í sumar.

Þá gleður það mig sömuleiðis að sjá Viktor Jónsson í byrjunarliði ÍA. Hann hefur verið meiðslum hrjáður á þessu tímabili og lítið spilað. Geturn hann orðið örlagavaldur í baráttu Skagamanna að halda sér uppi?

Byrjunarliðin eru mætt í hús

Keflavík gerir þó nokkrar breytingar á liðinu sem vann Fram fyrir um hálfum mánuði síðan. Dagur Ingi Valsson, Sindri Þór Guðmundsson og Ernir Bjarnason víkja úr byrjunarliðinu fyrir Dani Hatakka, Sindra Snæ Magnússon og Patrik Johannesen.

Skagamenn gera sömuleiðis breytingar á liðinu sem laut í lægra haldi fyrir Leikni á dögunum. Wout Droste, Hlynur Sævar Jónsson og Haukur Andri Haraldsson detta út fyrir þá Tobias Stagaard, Aron Bjarka Jósepsson og Viktor Jónsson.

Kjartan Kári spáir

Kjartan Kári Halldórsson, markahæsti leikmaður Lengjudeildarinnar í ár, spáir í leiki umferðarinnar sem framundan er. Leikmaðurinn sem átti gott tímabil með Gróttu er sterklega orðaður við Bestu deildina á næsta tímabili og mjög líklegt að landsmenn fái að sjá hann spreyta sig þar. Um leik Keflavíkur og ÍA sagði hann.

Keflavík 2 - 1 ÍA
Þetta verður baráttuleikur en Keflavík mun taka þetta með mörkum frá Adam Ægi og Joey Gibbs. ÍA mun reyna allt til að koma til baka en þeir seldu Gumma Tyrfings sem bjargaði þeim í Kef í fyrra þannig þeir ná bara einu marki sem kemur frá Sigurði Hrannari.

Tríóið

Einar Ingi Jóhannsson flautar leik dagsins hjá okkur. Honum til aðstoðar eru þau Bryngeir Valdimarsson og Rúna Kristín Stefánsdóttir. Egill Arnar Sigurþórsson er fjórði dómari og eftirlitsmaður KSÍ er Sigurður Hannesson.

Keflavík

Heimamenn í Keflavík settu markið á efri hluta deildarinnar og voru í séns fram í lokaumferð venjulegrar deildarkeppni. Ótrúlegur sigur í miklum markaleik gegn Fram dugði þó skammt þar sem Stjarnan lagði FH á sama tíma og tryggði sæti sitt í efri hlutanum og Keflvíkingar þurfa að gera sér neðri hlutann að góðu þetta árið. Staða þeirra er þó góð og erfitt að sjá að liðið geti fallið verandi 9 stigum frá fallsæti. Það er þó spurning hvernig Sigurði Ragnari þjálfara Keflavíkur mun ganga að blása mönnum baráttu í brjóst því að ansi litlu er að keppa fyrir liðið þannig séð.

ÍA

Gestirnir frá Akranesi eru í vondum málum á botni deildarinnar með 15 stig og 5 stigum frá öruggu sæti. Breytingin á keppnisfyrirkomulagi kom þeim vel i þetta sinn en lærisveinar Jón Þórs Haukssonar hafa nú 5 leiki til að rétta sinn hlut og bjarga sæti sínu í deildinni og þarf sú vegferð að hefjast í Keflavík. Það í sjálfu sér er ágætt fyrir Skagamenn sem eiga góðar minningar af HS Orkuvellinum. Þar björguðu þeir sér á ævintýralegan hátt í fyrra og unnu sömuleiðis sigur á dramatískan hátt í deildarleik liðanna á dögunum þar sem þeir skoruðu sigurmark leiksins í uppbótartíma.

Besta deildin part tvö rúllar af stað

Heil og sæl kæru lesendur og verið hjartanlega velkomin í þessa beinu textalýsingu Fótbolta.net frá Leik Keflavíkur og ÍA í fyrstu umferð (eða ætti ég að segja umferð númer 23?) neðri hluta Bestu deildarinnar.