Liðin eru mætt í göngin á þessum nýja og flotta leikvangi í Litháen. Hörður Magnússon lýsir þessum leik á RÚV 2 og segir frá því að Aron Einar Gunnarsson, sem er skráður meðal varamanna, hefur verið eitthvað veikur síðustu daga.

Ísland er í 62. sæti heimslistans en Litháen í 144. sæti.

Arnar Þór Viðarsson hefur valið byrjunarlið sitt og má sjá það hér að ofan. Rúnar Alex Rúnarsson og Jón Dagur Þorsteinsson verða ekki með íslenska liðinu í seinni leik mótsins.

Það vekur athygli að Valgeir Lunddal Friðriksson er í byrjunarliðinu, leysir stöðu hægri bakvarðar og Alfons Sampsted er á bekknum. Valgeir varð sænskur meistari með Häcken fyrr í þessum mánuði. Þá lítur út fyrir að Hákon Arnar Haraldsson sé fremsti maður. Fyrirliði landsliðsins, Aron Einar Gunnarsson, byrjar á bekknum. Birkir Bjarnason ber fyrirliðabandið í dag.

Jóhann Berg Guðmundsson og Sverrir Ingi Ingason komu inn í hópinn fyrir þetta verkefni eftir að hafa verið töluvert lengi frá hópnum. Þeir byrja báðir í dag. Rúmt ár er frá síðasta landsleik Jóhanns og Sverrir lék sinn síðasta landsleik í mars í fyrra. Arnór Sigurðsson, sem hefur spilað á hægri kanti í síðustu leikjum, tekur sér sæti á bekknum.

Ekki í neinni keppni við Birki
Aron Einar Gunnarsson landsliðsfyrirliði var spurður út í landsleikjafjöldann á fréttamannafundi í gær. Aron spilaði sinn 100. landsleik fyrr í þessum mánuði þegar Ísland lék gegn Sádí-Arabíu.

Hvernig er að ná þessum leikjafjölda og er áætlunin að ná Birki Bjarnasyni sem er leikjahæstur?

"Ég er stoltur af því að hafa náð þessum áfanga. Það er ekki á hverjum degi sem leikmaður nær hundrað leikjum fyrir þjóð sína. Margir fleiri leikir framundan. Ég er stoltur af þessu, er einbeittur á framtíðina og að bæta liðið. Ég er hér til að miðla reynslu minni til yngri leikmanna sem eru að komast í gegn," sagði Aron.

"Ég er ekki í neinni keppni við Birki. Við höfum átt góðar stundir saman og þetta snýst ekki um að keppa við hann," sagði Aron og brosti. Birkir hefur spilað 112 landsleiki, tólf leikjum meira en Aron. Birkir er einnig í hópnum sem er í Litháen.

Landsliðsþjálfarinn Arnar Þór Viðarsson fór í viðtal við miðla KSÍ.

"Það er alltaf skemmtilegra að fá keppnisleiki, þrátt fyrir að þetta sé vináttuleikjagluggi fyrir okkur. Við ætlum okkur að vinna á miðvikudag og komast í úrslit í þessu Baltic Cup. Við viljum að sjálfsögðu vinna mótið."

"Við verðum að líta á andstæðinga okkar á þessu móti þannig að við eigum að vera sterkari aðilinn og eigum að geta stýrt þessum leikjum. En þetta verður alls ekki auðvelt, þó að við setjum stefnuna á sigur þurfum við að hafa mjög mikið fyrir þessu.

Arnar segir að það verði einhverjar breytingar á milli leikja hjá liðinu. "Jón Dagur (Þorsteinsson) og Rúnar Alex (Rúnarsson) munu bara spila fyrri leikinn. Þetta er ekki hefðbundinn FIFA gluggi, er tengt HM í Katar og við þurftum að ná lendingu með sumum félögum. Jón Dagur er dæmi um það, þurfti að semja við þjálfara hans hvað væri best fyrir leikmanninn sjálfan upp á frí. Rúnar Alex ferðast svo til Íslands eftir fyrri leikinn þar sem hann fer í jarðarför."

"Það verða einhverjar tilfærslur milli leikja og við munum að sjálfsögðu nota báða leikina í að skoða og gera síðustu tilraunir fyrir undankeppnina sem hefst í mars á næsta ári. Þetta er mót sem við viljum nota til að klára undirbúning fyrir undankeppnina 2023."

Arnar var spurður hvort hann sæi fyrir sér að þetta, landsliðshópurinn sem var valinn fyrir verkefnið, yrði kjarninn sem kæmi til með að mynda hópinn í undankeppninni sem byrjar í mars.

"Þetta er kjarninn. Að mínu mati er kjarninn orðinn stór og góður, það er samkeppni í þessum hóp. Það eru nokkrir leikmenn sem eru ekki hérna með okkur sem koma að sjálfsögðu til greina fyrir marsgluggann. Það er það jákvæða við það sem hefur gerst árið 2022, við höfum náð að hnoða saman kjarnann af þessum hópi en hann er ekki 23 leikmenn. Þettu eru svona 30 leikmenn sem ég er ánægður með og þetta er sterkur hópur. Það er mikil samkeppni að komast í íslenska landsliðið í dag."

Viðtalið í fullri lengd má sjá hér að neðan.

Dómarar dagsins koma frá Lettlandi:


Dómari: Andris Treimanis
Aðstoðardómari 1: Aleksejs Spasjoikovs
Aðstoðardómari 2: Deniss Sevcenko
Fjórði dómari: Vitlijs Spasjoikovs

Íslenski hópurinn
Rúnar Alex Rúnarsson - Alanyaspor - 19 leikir
Patrik Sigurður Gunnarsson - Viking FK - 1 leikur
Elías Rafn Ólafsson - FC Midtjylland - 4 leikir
Alfons Sampsted - Bodo/Glimt - 13 leikir
Hörður Björgvin Magnússon - Panathinaikos - 43 leikir, 2 mörk
Daníel Leó Grétarsson - Slask Wroclaw - 11 leikir
Aron Einar Gunnarsson - Al Arabi - 100 leikir, 2 mörk
Davíð Kristján Ólafsson - Kalmar FF - 9 leikir
Sverrir Ingi Ingason - PAOK - 39 leikir, 3 mörk
Valgeir Lunddal Friðriksson - BK Häcken - 3 leikir
Aron Elís Þrándarson - OB - 15 leikir, 1 mark
Arnór Sigurðsson - IFK Norrköping - 23 leikir, 2 mörk
Stefán Teitur Þórðarson - Silkeborg IF - 13 leikir, 1 mark
Ísak Bergmann Jóhannesson - FC Köbenhavn - 15 leikir, 2 mörk
Þórir Jóhann Helgason - Lecce - 14 leikir, 2 mörk
Jón Dagur Þorsteinsson - OH Leuven - 23 leikir, 4 mörk
Hákon Arnar Haraldsson - FC Köbenhavn - 5 leikir
Birkir Bjarnason - Adana Demirspor - 112 leikir, 15 mörk
Mikael Neville Anderson - AGF - 16 leikir, 2 mörk
Mikael Egill Ellertsson - Spezia Calcio - 8 leikir
Jóhann Berg Guðmundsson - Burnley - 81 leikur, 8 mörk
Sveinn Aron Guðjohnsen - IF Elfsborg - 16 leikir, 1 mark
Andri Lucas Guðjohnsen - IFK Norrköping - 11 leikir, 2 mörk

Jóhann Berg Guðmundsson, leikmaður Burnley á Englandi, er mættur aftur í hópinn eftir nokkra fjarveru vegna meiðsla. Hann er spenntur fyrir þessu móti.

"Það er gaman að koma aftur. Það er langt síðan ég var hér síðast," segir Jóhann Berg í samtali við KSÍ TV.

"Mér líst mjög vel á þetta mót. Það er alltaf skemmtilegra þegar það er eitthvað undir. Æfingaleikir geta verið leiðinlegir og það er skemmtilegra þegar það er eitthvað undir eins og í Baltic Cup. Við viljum komst í úrslitaleikinn."

Það kryddar upp á þetta að það sé verðlaunagripur í boði fyrir sigurliðið.

"Við viljum lyfta Baltic Cup, það er klárt mál. Vonandi vinnum við Litháen og komum okkur í næsta leik."

Hægt er að sjá viðtalið í heild sinni hér fyrir neðan en þar ræðir Jói Berg um stöðuna á sjálfum sér. Hann segist vera á mjög góðum stað.

Velkomin til leiks!

Ísland mætir Litháen á Darius & Girenas leikvanginum í Kaunas í dag, miðvikudag, í undanúrslitaleik í Eystrasaltsbikarnum. Leikurinn hefst kl. 17:00 að íslenskum tíma og er í beinni útsendingu á RÚV 2.

Íslenska liðið mætir síðan annað hvort Eistlandi eða Lettlandi 19. nóvember (í Tallinn eða Riga), sem er þá annað hvort leikur um 3. sætið í mótinu eða úrslitaleikur um sigur á mótinu. Ef jafnt er eftir 90 minútna leik fer fram vítaspyrnukeppni.

Þetta er í fyrsta sinn sem Ísland tekur þátt í þessu æfingamóti, sem hefur verið haldið reglulega frá árinu 1991. Mótið var sett á laggirnar fyrst árið 1928 og var það haldið nánast árlega til ársins 1940, en frá 1940-1991 fór það ekki fram í ljósi hernáms Sovétríkjanna á svæðinu. Ísland er aðeins fimmta gestaþjóðin sem tekur þátt í mótinu, en Finnland hefur tekið tvisvar sinnum þátt.

Lettland hefur unnið keppnina oftast, eða 13 sinnum. Eistland fagnaði sigri í mótinu árið 2021.

Ísland og Litháen hafa fjórum sinnum áður mæst í A landsliðum karla. Ísland hefur unnið tvo sigra, Litháen einn og einu sinni hafa liðin gert jafntefli. Liðin mættust síðast árið 2003, þegar þau voru saman í riðli í undankeppni EM 2004.