Rétt eins og gegn Bosníu erum við alhvítir í þessum leik. Liechtenstein í bláum treyjum, rauðum stuttbuxum.

Ekki bara byrjað að rigna heldur mætti rok skyndilega líka. Fyrir hálftíma var prýðisveður. Jæja þjóðsöngvarnir.

Liðin eru mætt í göngin og það er byrjað að rigna.

Þetta er að bresta á

Tólfan kemur!

Miðasala gengið herfilega Á leikvangnum eru fjórar stúkunni en það verður aðeins setið í einni af þeim og hún verður langt frá því að vera full. Sagt er að um 20 Íslendingar verði viðstaddir leikinn.

Jæja þá eru það spámenn fréttamannastúkunnar Sjálfur spái ég 3-0 sigri. Alfreð, Hákon og Sævar Atli með mörkin.

Valur Páll Eiríksson á Sýn spáir 4-0 sigri Íslands.

Afmælisbarnið Helgi Sigurðsson á Torgi spáir 3-0.

Pakkað í vörn - Liechtenstein í fimm manna vörn

Leikmenn eru búnir að taka hinn hefðbundna göngutúr um völlinn

Helgi Kolviðs mættur, glæsilegur að vanda

Tvær breytingar Stefán Teitur Þórðarson kemur inn á miðsvæðið í stað Arnórs Ingva Traustasonar. Aron Einar Gunnarsson fyrirliði er kominn úr leikbanni og byrjar í hjarta varnarinnar. Daníel Leó Grétarsson fær sér sæti á bekknum.

Þórir Jóhann Helgason er veikur og er ekki í hóp.

Byrjunarliðið hefur verið staðfest

Íslandsvinur á svæðinu Leikvangurinn tekur 6.127 í sæti en samkvæmt því sem við höfum heyrt verður afskaplega fámennt á vellinum og mörg tóm sæti.

Styrktarþjálfari Liechtenstein er Sebastian Boxleitner.

Hinn þýski Boxleitner tók við sem styrktarþjálfari íslenska landsliðsins 2016 og var í því starfi til 2019. Hann var þá rekinn frá KSÍ eftir að Erik Hamren gerðist þjálfari liðsins.

Rínarvöllurinn í Vaduz

Rínarvöllurinn í Vaduz þar sem Liechtenstein og Ísland mætast klukkan 16:00 #fotboltinet pic.twitter.com/yuFcfbATZP

— Fótbolti.net (@Fotboltinet) March 26, 2023

Stefnan er enn sett á EM þrátt fyrir tapið slæma í Bosníu

Eins og lesendur vita þá tapaði Ísland 3-0 fyrir Bosníu í liðinni viku. Á sama tíma fór fram leikur Slóvakíu og Lúxemborg í sama riðli en hann endaði með markalausu jafntefli. Mikil reiði er vegna þessara úrslita í Slóvakíu.

„Þetta er rosalega opinn riðill," sagði Arnar Þór Viðarsson landsliðsþjálfari á fréttamannafundi í gær þegar hann var beðinn um að segja hvað úrslitin í Slóvakíu segja honum.

„Ef það er eitthvað sem ég hef lært á þessum fimm árum sem ég hef þjálfað landslið, fyrst U21 landsliðið og svo í undankeppninni fyrir HM, að riðlarnir hafa verið opnir og mörg lið svipuð að styrkleika."

„Það hefur enginn verið að tala um Lúxemborg hingað til en þessi úrslit sýna að þeir eru vel skipulagðir og gott lið. Þeir eru komnir með leikmenn á fínum stöðum í Evrópu. Strax þarna missir Slóvakía af stigum heima."

„Ég hef sagt það að í þessum riðli þurfum við að vinna fjóra heimaleiki og tvo til þrjá útileiki. Við fórum inn í þennan leik gegn Bosníu með það í huga að það væri frábært að ná sigri, það hefði verið mjög gott að ná jafntefli. Mótið er ekki búið þrátt fyrir tap og þessi úrslit, 0-0 hjá Slóvakíu og Lúxemborg sýna okkur að liðin eiga eftir að taka stig hvert af öðru," segir Arnar.

„Ef við náum í þessi stig verðum við mjög nálægt þessu en þá þurfum við að bæta leik okkar á ákveðnum sviðum. Ég les það úr þessum úrslitum, þetta verður rosalega opið og er langt maraþon."

Liechtenstein með bráðabirgðastjóra Liechtenstein er með bráðabirgðastjóra. Martin Stocklasa sem hafði verið landsliðsþjálfari Liechtenstein frá 2020 rifti samningi sínum í byrjun þessa mánaðar.

Hann sagði upp til að taka við félagsliðinu Vaduz í Liechtenstein en það tekur þátt í svissnesku deildakeppninni og er í níunda sæti B-deildarinnar. Það er ekki deild í Liechtenstein en sjö lið frá landinu spila í svissnesku deildakeppninni.

Stocklasa var fyrsti þjálfarinn sem er frá Liechtenstein sem stýrði landsliði þjóðarinnar

Austurríkismaðurinn Rene Pauritsch, sem er yfirmaður fótboltamála hjá Liechtenstein, tók við landsliðinu til bráðabirgða og stýrði því gegn Portúgal og svo gegn Íslandi í dag.

Þrettán leikmenn í landsliðshópi Liechtenstein spila með félagsliðum frá Liechtenstein en níu með liðum í Austurríki og Sviss. Sá sem sker sig úr er Dennis Salanovic, vængmaður CF Talavera í spænsku C-deildinni. Landsleikjahæstur í hópnum er bakvörðurinn Seyhan Yildiz sem hefur leikið 60 landsleiki en hann spilar fyrir Eschen/Mauren.

Nokkrar myndir frá æfingu í gær

Liechtenstein vann síðast leik 2020 Ef allt er eðlilegt vinnur Ísland sannfærandi sigur í dag gegn einu lélegasta landsliði heims. Liechtenstein hefur ekki skorað í sex síðustu landsleikjum. Liðið er án sigurs í síðustu 26 leikjum sem er næstversta skrið landsliðs í Evrópu, á eftir San Marínó.

Meðal tapleikja eru ósigrar gegn Andorra, Gíbraltar, Færeyjum og 6-0 tap gegn Grænhöfðaeyjum. Þjálfarar eru ekki hrifnir af orðinu skyldusigur en það orð á afskaplega vel við varðandi leikinn í dag.

Aftur fjögur íslensk mörk í dag? Þessi lið mættust 2021 í undankeppni HM. Ísland vann heimaleikinn 4-0 á Laugardalsvelli og útileikinn 4-1.

???? Guðjohnsen ?? Guðjohnsen last time we met Liechtenstein!#AfturáEM pic.twitter.com/efoNu0WcrU

— Knattspyrnusambandið (@footballiceland) March 26, 2023

Danskir og pólskir dómarar Danski dómarinn Jakob Kehlet er með flautuna í þessum leik. Dómaratríóið í dag og fjórði dómarinn eru allir frá Danmörku en Pólverjar sjá hinsvegar um VAR myndbandsdómgæsluna. Pawel Pskit er VAR dómari.

Velkomin á Rínarvöllinn

Ísland mætir Liechtenstein í undankeppni EM 2024 í Liechtenstein.

Leikurinn fer fram á Rínarvellinum í Vaduz, þjóðarleikvangi gestgjafanna í Liechtenstein.

Bæði Ísland og Liechtenstein töpuðu fyrsta leik sínum í undankeppninni, Ísland gegn Bosníu-Hersegóvínu 3-0 og Liechtenstein tapaði 4-0 gegn Portúgal.