Krefjandi Óskar Hrafn Þorvaldsson þjálfari Breiðabliks spurður að því á Stöð 2 Sport hvernig honum líst á aðstæður. 'Krefjandi' er svarið.

Arnór Sveinn, Andri Yeoman og Jason Daði eru á bekknum, allir eru þeir tæpir að sögn Óskars. Stefán Ingi Sigurðarson er meiddur.

Liðin eru mætt í hús. Heimamenn gera eina breytingu frá liði sínu sem gerði jafntefli við Val á dögunum. Edon Osmani fær sér sæti á bekknum í stað Jordan Smylie sem byrjar.

Blikar gera fjórar breytingar á sínu liði frá sigrinum gegn Val. Arnór Sveinn Aðalsteinsson, Jason Daði Svanþórsson, Stefán Ingi Sigurðarson og Andri Rafn Yeoman detta út. Inn í þeirra stað koma þeir Kristinn Steindórsson, Klæmint Olsen, Ágúst Eðvald Hlynsson og Davíð Ingvarsson

Spáum í spilin
Máni Austmann Hilmarsson er næstur til þess að reyna fyrir sér sem spámaður hjá okkur á Fótbolti.net. Máni er leikmaður Fjölnis sem situr á toppi Lengjudeildarinnar. Máni samdi við Fjölni í lok félagaskiptagluggans eftir að hafa leikið með FH árið á undan. Hann er jafnmarkahæsti leikmaður Lengjudeildarinnar með fjögur mörk skoruð í fjórum leikjum.

Um leik Keflavíkur og Breiðabliks sagði Máni.

Keflavík 0 - 3 Breiðablik

Keflavík eru ekki uppá sitt besta í ár þannig ég held að Breiðablik eigi eftir að ógna sífellt með hraða sínum og kraft þar sem Gísli Eyjólfs skorar 2, Viktor 1 og Davíð Ingvars leggur öll upp. 0-3 Blix.

Dómarinn
Gunnar Oddur Hafliðason sér um dómgæslu í leik kvöldsins. Hann er ungur dómari sem hefur verið að klífa stigann hjá KSÍ á undanförnum árum og dæmdi sinn fyrsta heila leik í efstu deild í lokaumferð mótsins í fyrra.

Gunnari til aðstoðar eru þeir Egill Guðvarður Guðlaugsson og Ragnar Þór Bender. Twana Khalid Ahmed heldur mönnum rólegum á hliðarlínunni sem fjórði dómari og eftirlitsmaður KSÍ er Frosti Viðar Gunnarsson.

Völlurinn Líkt og aðrir grasvellir á suðvesturhorni landsins kom HS Orkuvöllurinn illa undan vetri. Hann hefur þó óðum verið að taka við sér síðustu vikur og býr að því að fyrsti leikur á honum fór fram ekki fram fyrr en síðastliðinn laugardag þegar kvennalið Keflavíkur tryggði sig í átta liða úrslit Mjólkurbikarsins.

Völlurinn er þó nokkuð gisinn og í vætunni sem hefur verið undanfarin sólarhring og spáð er í kvöld má alveg búast við að hann verði nokkuð skrautlegur á köflum. Það er bara vonandi að það bjóði upp á áhorfendavænan leik með tæklingum og mistökum á báða bóga.

Keflavík
Eftir fjögur töp í röð börðu Keflvíkingar í brestina í síðasta leik þegar liðið mætti Val og sótti sterkt stig á Origovöllinn. Stigið bara hlýtur að færa liðinu aukna trú og sjálfstraust á verkefni kvöldsins þótt verkefnið sé vissulega verðugt í meira lagi.

Talsvert hefur verið um meiðsli í herbúðum Keflavíkur á þessum fyrsta þriðjungi mótsins en vonir standa til að einhverjir af þeim leikmönnum sem fjarverandi hafa verið líkt og Sami Kamel séu klárir og verði með í kvöld.

Breiðablik
Það má alveg segja að Blikar séu hættir að haltra á eftir toppliði Víkinga heldur fylgja þeir í humátt á eftir þó forysta Víkinga sé vissulega sex stig. Sex sigurleikir í röð segja manni að eftir brokkgenga byrjun á mótinu eru Blikar svo sannarlega búnir að finna taktinn og eru til alls líklegir.

Leikurinn í kvöld kann þó að reynast ögn flóknari en margur annar, enda leikinn á grasi sem líkt og á flestum öðrum völlum á landinu hefur séð betri daga. Ofan á það bætist að rignt hefur síðasta sólarhring og gisinn HS Orkuvöllurinn kann að vera nokkuð þungur yfirferðar eftir vætuna. Blikar eru þó öllu vanir eftir heimsóknir á Hásteinsvöll og Meistaravelli fyrr í mótinu og ætti þetta ekki að hafa of mikil áhrif á leik þeirra.

Verið velkomin til leiks. Heil og sæl kæru lesendur og verið hjartanlega velkomin líkt og ávallt í þessa beinu textalýsingu Fótbolta.net frá leik Keflavíkur og Breiðabliks í níundu umferð Bestu deildar karla.


Það eru litlar líkur á því að Guðjón Árni og Nenad mætist á vellinum í kvöld en myndin er góð fyrir því.