Stórleikur KA og Stjörnunnar hefst kl. 17:00 á Greifavellinum. Strákarnir eru klárir, hvað með þig? Áfram KA! #LifiFyrirKA @bestadeildin pic.twitter.com/bS6HIp8am8

— KA (@KAakureyri) August 18, 2024

Dagur Ingi á bekknum - Þrír í banni hjá Stjörnunni Dagur Ingi Valsson byrjar á bekknum hjá KA í dag og það gerir Þorlákur Breki Þ. Baxter sömuleiðis, en Stjarnan kallaði hann til baka úr láni en þessi sóknarsinnaði miðjumaður var fyrri hluta tímabilsins á láni hjá Selfyssingum.

Þá er fyrirliði KA, Ívar Örn Árnason, í banni og því verður Hallgrímur Jónasson að finna lausnir á því. Sömuleiðis vantar Hans Viktor Guðmundssson, en hann hefur spilað virkilega vel fyrir KA í hjarta varnarinnar. Þá er Viðar Örn Kjartansson meiddur.

Í liði Stjörnunnar taka Emil Atlason, Örvar Eggertsson og Guðmundur Kristjánsson út leikbann. Þar munar um minna, en allir hafa þeir leikið mikilvægt hlutverk í liði Garðbæinga í sumar.


Emil Atla skoraði tvívegis í fyrri leik liðanna, en tekur nú út leikbann.

KA krækti í Fáskrúðsfirðing á gluggadeginum Það var greint frá því stuttu fyrir miðnætti á gluggadegi að KA hefði gengið frá samningum við Dag Inga Valsson, leikmann Keflavíkur. Þessi 24 ára gamli Fáskrúðsfirðingur hefur spilað 15 leiki fyrir Keflavík á tímabilinu og skorað tvívegis. Hann hafði verið settur á sölulista eftir síðasta leiktímabil þar sem að hann tjáði Fótbolta.net að hann væri reiðubúinn að taka næsta skref á sínum ferli. Hann hélt þó kyrru fyrir í Keflavík og hefur spilað fyrri hluta sumars þar. Nú verður breyting á.

Magnús Þórir Matthíasson, fyrrum leikmaður Keflavíkur og lýsandi á Stöð 2 Sport, segir á X að KA hafi borgað fimm milljónir króna fyrir Dag Inga.

„Rennur út á samning eftir sex vikur og enginn áhugi á að framlengja. Er þetta tilboð of gott til að geta hafnað því? Já. Kaupa leikmann á gluggadegi á 5 mkr og semja til 1,5 árs finnst mér örvæntingarfullt," skrifaði Magnús á X.

Í viðtali við Fótbolta.net sagðist Dagur Ingi alltaf hafa viljað spila við KA - eða frá því að hann spilaði með Leikni frá Fáskrúðsfirði í Kjarnafæðismótinu gegn þeim gulklæddu.

Dagur sagði erfitt að flytja frá vinum og fjölskyldu, en það var einróma álit þeirra sem að hann ræddi við að hann ætti að taka skrefið norður.

„Já ég talaði við nokkra góða og það var ekkert sérlega auðvelt að ákveða að flytja frá fjölskyldu og vinum í bænum en það voru allir á því að taka skrefið,“ sagði Dagur Ingi.


Spilar nú í gulu og bláu.

Helgi Fróði til Hollands Miðjumaðurinn efnilegi, Helgi Fróði Ingason, skrifaði nýverið undir hjá hollenska B-deildarliðinu Helmond Sport. Helgi, sem er uppalinn hjá Stjörnunni, hefur leikið 30 leiki í efstu deild og skorað í þeim tvö mörk.

„Það er alltaf ánægjulegt þegar við sjáum unga uppalda leikmenn stíga skrefið í atvinnumennsku en Helgi Fróði er níundi leikmaðurinn sem félagið selur erlendis frá árinu 2020 er við ákváðum að breyta um áherslur og mörkuðum þá stefnu að ætla okkur bæði árangur inná vellinum ásamt því að búa til grundvöll fyrir unga leikmenn til að skína, sem við höfum sannarlega gert," segir Helgi Hrannarr Jónsson formaður meistaraflokksráðs Stjörnunnar í tilkynningu frá félaginu.

Helgi Fróði sagði í viðtali við Fótbolta.net að hann væri ótrúlega spenntur, en gerði sér jafnframt grein fyrir því að fyrsta skrefið væri að komast inn í hlutina og venjast nýju landi - og nýju félagi.

„Það er eitthvað sem ég hef stefnt að í langan tíma og ég er ótrúlega spenntur. Fólkið hérna tekur vel á móti manni og bærinn er þægilega stór. Þetta er engin stórborg en kannski 100 þúsund manna bær og ég hlakka til að koma mér fyrir hérna," sagði Helgi.


Helgi Fróði skrifar undir hjá Helmond Sport.

Dómarinn Það er Ívar Orri Kristjánsson sem að dæmir leik dagsins á Akureyri. Honum til aðstoðar eru Birkir Sigurðarson og Eysteinn Hrafnkelsson. Valdimar Pálsson er eftirlitsdómari og ef að Ívar Orri lendir í hremmingum er Sigurður Hjörtur Þrastarson klár sem varadómari.


Ívar Orri í hrókasamræðum við Jason Daða Svanþórsson, leikmann Grimsby.

Stórbætt gengi KA KA liðið hefur verið á mikilli uppleið, en þeir gulklæddu hafa ekki tapað leik síðan 19. júní og hafa í millitíðinni komið sér í úrslitaleik Mjólkurbikarsins - annað árið í röð.

Liðið hóf ágústmánuð á góðum sigri á Valsmönnum, en liðið gerði svo 1-1 jafntefli við Fylki í Árbænum, þar sem að heimamenn voru hreinlega óheppnir að ná ekki öllum stigunum eftir að hafa jafnað leikinn.

,,Ég er svekktur með frammistöðuna, ánægður með að fara héðan með eitt stig. Við höfum verið á flottu rönni og ekki tapað í langan tíma og í rauninni er ég mjög ánægður með að fara héðan með eitt stig því frammistaðan var bara því miður ekki góð,'' sagði Hallgrímur Jónasson í viðtali eftir leikinn.


Haddi var alls ekki sáttur með sitt lið eftir Fylkisleikinn.

Breytingar á byrjunarliðsvali í umræðunni Sæbjörn Þór Þorbergsson Steinke, fréttaritari Fótbolta.net, drap niður penna og bað Jökul Elísabetarson, þjálfara Stjörnunnar, vinsamlegast að hætta að hrófla í liðsvali sínu eftir að staðfest byrjunarlið hefur verið gefið út.

Þetta gerðist fyrir leik Stjörnunnar gegn Breiðabliki og er ekki um einangrað atvik að ræða. Liðið gerði þetta fyrst vorið 2023 og svo var þetta aftur uppi á teningnum þegar að liðið mætti Víkingum í apríl.

,,Ég einfaldlega bið Stjörnuna að hætta þessu. Leikjapennar Fótbolta.net á leikjum Stjörnunnar vanda sig við það að lesa í byrjunarliðsval þjálfara, skrifa um það frétt og fá svo í andlitið að fréttin er svo gott sem ónýt nokkrum mínútum síðar,'' skrifar Sæbjörn.


Verða breytingar á byrjunarliði Stjörnunnar á elleftu stundu í dag?

Þegar liðin mættust síðast Það var lítið um spennu og dramatík þegar að þessi lið mættust seint í maí á Samsungvellinum í Garðabæ. Þá unnu heimamenn í Stjörnunni síst of stóran 5-0 sigur á andlausum KA mönnum.

Haraldur Örn Haraldsson, fréttaritari Fótbolta.net, var eðlilega ekki yfir sig hrifinn af spilamennsku gestanna.

,,Mig langar næstum að telja upp hvern einasta mann í KA liðinu í dag, starfsmenn á hliðarlínu með. Liðið varðist hörmulega sem heild, þeir voru alltaf á eftir í 50/50 boltum og náðu aldrei seinni boltanum. Það var síðan rosalega oft sem sendingar voru að klikka illa, og þegar liðið komst í góðar stöður var lítil sem engin ákefð í að drulla boltanum yfir línuna.''

Sagði hann að Stjörnumenn hefði mætt til leiks og eiginlega unnið hann sjálfkrafa. Voru ákveðnari í öllum sínum aðgerðum og leyfðu KA liðinu ekki að anda. Svör KA voru engin og því fór sem fór.

Mörk Stjörnunnar skoruðu Örvar Eggertsson, Emil Atlason (2), Helgi Fróði Ingason og Róbert Frosti Þorkelsson.


Yfirburðir Stjörnunnar voru algjörir í fyrri leik liðanna í deildinni.

Góðan daginn! Hér mun fara fram textalýsing á leik KA og Stjörnunnar í Bestu-deild karla. Leikurinn er liður í 19. umferð deildarinnar og mætast hér liðin í 7. og 8. sæti. Stjarnan er sæti ofar en KA í deildinni með 24 stig, en KA menn eru með stigi minna.