SKÝRSLAN: Íslandsmeistarnir rassskelltir af Breiðabliki
Hvað réði úrslitum?
Það hvernig Breiðablik mætti til leiks réði úrslitum hér í kvöld. Þeir tóku öll völd á vellinum strax í upphafi og það sást snemma hvort liðið var tilbúið í baráttuna.
Bestu leikmenn
1. Kristinn Jónsson
Kristinn átti stórleik í kvöld. Átti þátt í öllum mörkum Breiðabliks og var með áætlunarferðir upp vinstri væng Breiðabliks. Átti síðan í litlum vandræðum varnarlega á móti Arnari Má.
2. Oliver Sigurjónsson
Enn einn góði leikur Olivers á miðjunni hjá Blikum. Ekkert hægt að setja út á hann í kvöld. Er farinn að stjórna miðjunni hjá þeim eins og hershöfðingi. Sýndi síðan í leiknum að hann er með góðar sendingar. Gaman að sjá, að hann stenst prófið í Pepsi-deildinni og rúmlega það.
Atvikið
Atvik leiksins voru nokkur, en verðum við ekki að taka lokaflaut Þorvalds dómara. Með flautinu lauk 27 leikja sigurhryna Stjörnunnar í efstu deild. Frábær árangur en ég held að Stjörnumenn séu lítið að velta því fyrir sér þessa stundina.
Hvað þýða úrslitin?
Fyrsta tap Stjörnunnar í 28 umferðum staðreynd og það verðskuldað. Liðið er í fimmta sæti deildarinnar með 9 stig. Breiðablik eru hinsvegar komnir á flug, þriðji sigur liðsins í röð og þeir hafa safnað 12 stigum í sumar. Stigi á eftir FH og KR sem eru í efstu tveimur sætum deildarinnar.
Vondur dagur
Nánast allt Stjörnuliðið eins og það leggur sig. Mættu aldrei til leiks og það var tímaspursmál hvenær Blikarnir kæmust yfir í leiknum. Það kom líka á daginn. Stjörnumenn þurfa heldur betur að fara í naflaskoðun eftir þennan leik. Einungis þrjú stig komin í síðustu fjórum umferðum.
Dómarinn - 6
Þorvaldur sjálfur átti fínan leik. Það er hinsvegar hægt að setja spurningarmerki á tvær ákvarðanir Birkis Sigurðarsonar aðstoðardómara 1. Hann virtist hafa tekið tvær rangar ákvarðanir sem hefði getað kostað bæði lið mark.
Guðjón Pétur var ranglega dæmdur rangstæður í fyrri hálfleik. Í seinni hálfleik flaggaði Birkir síðan Blika brotlega í þann mund sem Garðar Jó. var að sleppa í gegn.