SKÝRSLAN: Hið fullkomna svar frá U21 landsliðinu
Hvað réði úrslitum?
Vinnuframlag Íslands var til fyrirmyndar og Írunum gekk erfiðlega að skapa sér færi, það fór vel í taugarnar á gestunum. Íslenska liðið lék ákaflega vel sem ein heild og leikurinn var vel upplagður af þjálfurunum.
Bestu leikmenn
1. Alex Þór Hauksson
Stjörnumaðurinn með stjörnuframmistöðu á miðjunni. Var hrikalega drjúgur og vinnusamur. Nýtti sitt tækifæri frábærlega.
2. Jón Dagur Þorsteinsson
Fyrirliðinn reyndist Írum mjög erfiður og þeir áttu oft í miklum vandræðum með hann.
Atvikið
Vítaspyrnudómurinn eftir tæpan hálftíma. Dæmd var hendi á Lee O'Connor og Sveinn Aron Guðjohnsen fór á punktinn og skoraði af miklu öryggi, sigurmarkið í leiknum.
Hvað þýða úrslitin?
Svona á að svara! Ísland fékk skell gegn Svíþjóð á laugardaginn en strákarnir okkur voru staðráðnir í að sýna að það var slys. Írarnir voru ósigraðir á toppi riðilsins með 10 stig fyrir leikinn en Ísland er nú komið með 9 stig.
Vondur dagur
Stephen Kenny, þjálfari írska liðsins, var algjörlega ráðalaus. Írarnir voru hugmyndasnauðir í sóknarleiknum og maðurinn í brúnni vissi ekki hvernig ætti að bregðast við. Þær breytingar sem hann gerði skiluðu litlu gegn vel skipulögðu íslensku liði.
Dómarinn - 7
Á heildina lítið hægt að setja út á frammistöðu Íslandsvinarins Dumitri Muntean en hann kom hingað til lands fyrr á árinu og dæmdi leik Stjörnunnar og Espanyol.