SKÝRSLAN: Líkt og meistaraefni væru að spila við Lengjudeildarlið
Hvað réði úrslitum?
KR-ingar voru bara miklu betri frá byrjun og það var í raun aldrei spurning um það hvort liðið væri að fara þennan leik. Fylkismenn virkuðu hræddir og þeir komu sér aldrei í gang gegn KR-liði sem litu út eins og meistarakandídatar. Stór orð - kannski - en ef KR spilar áfram svona þá verða þeir í baráttunni um þann stóra til enda.
Bestu leikmenn
1. Stefán Árni Geirsson (KR)
Stórhættulegur þegar hann keyrir á varnir andstæðingana. Hann skoraði ekki en hann gerði allt annað gríðarlega vel. Frábær leikmaður sem á að spila meira en hann hefur gert.
2. Atli Sigurjónsson (KR)
Alltaf hætta í kringum Atla. Með frábærar fyrirgjafir og hann byrjaði þessa veislu KR-inga með stórkostlegu marki snemma leiks.
Atvikið
Fyrsta mark Atla Sigurjónssonar. Geggjað mark og það setti tóninn fyrir KR-inga. Það var gott fyrir KR að ná fyrsta markinu snemma og létti á þeim fyrir framhaldið.
Hvað þýða úrslitin?
KR er enn með í titilbaráttunni. Það er alla vega ekki hægt að útiloka þá. Þeir eru fimm stigum frá Val og það er allt hægt í þessu ef þeir spila áfram svona. Fylkir er í bullandi fallbaráttu og þjálfararnir verða að fara vel yfir málin með mönnum eftir þessa ömurlegu frammistöðu. Fylkir leit út eins og falllið í kvöld, Lengjudeildarlið.
Vondur dagur
Það er í raun hægt að skrifa þetta á allt Fylkisliðið og þjálfara þeirra. Menn mættu ekki tilbúnir til leiks og lágpressan virkaði engan veginn. Guðmundur Steinn Hafsteinsson var að spila sinn fyrsta leik fyrir Fylki og það leit þannig út. Hann var ekki alveg að finna sig og tengdi ekki við nýju liðsfélaga sína. Þetta var slakt frá aftasta manni til þess fremsta hjá gestunum úr Árbæ.
Dómarinn - 8
Virkilega vel dæmdur leikur. Ekkert út á Sigurð Hjört að setja.