SKÝRSLAN: FH endar í sjötta sæti (Staðfest)
Hvað réði úrslitum?
FH var betra liðið á vellinum og verðskuldaði þennan sigur. Verkefnið varð ansi þægilegt eftir að FH komst yfir og var manni fleiri. Annað mark FH í raun kláraði svo bara leikinn.
Bestu leikmenn
1. Matthías Vilhjálmsson
Matti var ekki upp á sitt besta þegar FH átti erfitt uppdráttar á löngum kafla í sumar. Matti var frábær í dag líkt og í leikjum að undanförnu, skoraði tvö og lagði upp eitt. Gæði og vinnsla í honum allan leikinn, enginn afsláttur.
2. Baldur Logi Guðlaugsson
Skoraði fyrsta mark leiksins með stórkostlegu skoti úr aukaspyrnu. Baldur var besti maður vallarins í fyrri hálfleik og lagði svo upp mark í seinni. FH-liði í heild var mjög gott í dag, Jónatan Ingi og Logi Hrafn voru næstu menn á lista.
Atvikið
Aukaspyrnan og aukaspyrnudómurinn á nítjándu mínútu.
Virkaði ódýr aukaspyrna úr blaðamannaaðstöðunni en Baldri var nákvæmlega sama og smellti boltanum í nærhornið. Frábært mark.
Hvað þýða úrslitin?
FH er áfram í sjötta sæti og endar tímabilið í því sæti. Stjarnan er í sjöunda sæti og getur bara horft í það að halda því sæti.
Vondur dagur
Þorsteinn Már Ragnarsson og Hilmar Árni Halldórsson voru þeir sem reyndu hvað mest en lítið sem ekkert gekk hjá þeim.
Dómarinn - 6,5
Heilt yfir fínasta dómgæsla, rétt niðurstaða með rauðu spjöldin en ég var strax á því að Óli Valur hefði unnið boltann af Baldri Loga þegar aukaspyrna var dæmd á nítjándu mínútu.