SKÝRSLAN: Kannski skrítið að segja það en Framarar geta verið svekktir með stigið
Hvað réði úrslitum?
Gestirnir voru betri lengstum í leiknum og sérstaklega með vindi í seinni hálfleik. Jöfnunarmarkið í lok leiks var heldur betur verðskuldað og átti Fram jafnvel skilið meira en stig úr þessum leik. Valsmenn fengu sín færi en Framarar voru sterkari milli teiga. Frammistaða gestana var heilsteypt á meðan frammistaða Vals var ekki upp á marga fiska.
Bestu leikmenn
1. Frederik Schram (Valur)
Stórkostlegur í markinu, trufluð varsla frá Tiago, bjargaði ótrúlega þegar Gummi Magg komst í boltann inn á markteig. Átti svo líka vörslu frá Tiago í fyrri hálfleik.
2. Alex Freyr Elísson (Fram)
Átti góðan leik heilt yfir, bjargaði í þrígang þegar Tryggvi var að gera sig líklegan. Orka í honum allan leikinn.
Atvikið
Þegar Frederik náði einhvern veginn að verja frá Tiago og svo jöfnunarmarkið. Ótrúleg varsla og svo klaufagangur í vörn Valsmanna í bland við klókindi Framara sem skiluðu jöfnunarmarki.
Hvað þýða úrslitin?
Valsmenn elta áfram liðin þrjú fyrir ofan sig en þessi 'tvö töpuðu stig' hjálpa þeim ekkert. Framarar horfa áfram í þann möguleika að ná KR og enda þar með í efri hlutanum í lok deildarkeppninnar. Svekkelsi hjá Val með frammistöðuna og svekkelsi með stigið en heimamenn áttu ekkert meira skilið.
Vondur dagur
Tryggvi Hrafn getur nagað sig í handarbökin að hafa ekki nýtt þá sénsa sem hann fékk í leiknum.
Dómarinn - 8
Virkilega góð frammistaða.