Flautað af. Ísland fékk svo sannarlega tækifæri til að jafna en tap niðurstaðan í þessum umdeilda vináttulandsleik.

Hákon með flotta markvörslu! Skot við vítateigsbogann.

Það skapaðist hætta inn á teignum hjá Sádum þarna en Sádarnir ná að koma boltanum frá.

Höskuldur er orðinn fyrirliði eftir að Aron Einar fór út af.

Viktor Karl á skot sem fer í Ísak og aftur fyrir endamörk.

Tíu mínútur eftir af venjulegum leiktíma.

Jason Daði stingur sér inn fyrir vörnina og reynir að finna Ísak í teignum en varnarmaður Sáda hindrar það.

Vatnspása.

Bjarki Steinn með skot sem fer hátt yfir markið.

Ísak í fínni stöðu en Sádar verjast vel. Svo á Logi skot sem fer í varnarmann. Þetta er betra.

Leikmaður Sáda liggur eftir í kjölfarið á tæklingu hjá Damir. Varnarmaðurinn sterki segir honum að standa upp, en tæklingin var fullkomlega lögleg. Dómarinn stöðvar leikinn svo læknateymið komist inn á.

Núna eru sex leikmenn úr Íslandsmeistaraliði Blika inn á vellinum. Róbert Orri Þorkelsson, fyrrum leikmaður Blika, er líka inn á.

Íslenska liðið að byrja þennan seinni hálfleik betur en Sádarnir.

ÞVÍLÍKT FÆRI!!!
Rúnar með flottan bolta fyrir og Jónatan leggur boltann út í teiginn. Þar er Óttar Magnús í algjöru dauðafæri en hann skóflar boltanum yfir markið.

Þarna átti hann að gera betur!

Ísland fær sína fyrstu hornspyrnu í leiknum. Höskuldur með hornspyrnuna en það er brot dæmt í teignum. Markvörðurinn ansi verndaður í þessu atviki. Ætti að vera önnur hornspyrna.

Rúnar Þór með langt innkast sem er skallað frá.

Sádarnir eru næstum því komnir í dauðafæri á fyrstu 20 sekúndum seinni hálfleiks. En lokasendingin fer í hælinn á leikmanninum sem hefði sloppið í gegn.

Sádar leiða í hálfleik, 1-0. Klaufalegt mark sem íslenska liðið fékk á sig en þessi staða er nokkuð sanngjörn. Leiðinlegur leikur heilt yfir. Ekkert sérlega mark jákvætt sem Ísland getur tekið úr þessum hálfleik.

Ísland átti tilraun að marki! En ekki var hún hættuleg.

Það er allt að verða vitlaust við hliðarlínuna. Keflvíkingurinn Rúnar Þór er dreginn burt en hann ýtti við Al-Muwallad.

Þessi Al-Muwallad er greinilega mikið fífl þar sem hann reyndi að sparka í Dag Dan eftir að hann var stiginn út. Rúnar Þór kom og ýtti við Al-Muwallad eftir að hann reyndi að sparka í Dag og við það varð allt vitlaust.

Tölfræðin hingað til:

Ísland hefur ekki enn átt skottilraun í þessum leik.

Sádarnir við það að búa til hættulega stöðu en þá kemur Damir og á frábæra tæklingu.

"Við verðum að láta finna fyrir okkur núna," heyrist af bekknum hjá Íslandi.

Arnar nýtir pásuna til að fara yfir málin með leikmönnum.

Það er vatnspása á vellinum. Spilað í hitanum í Abú Dabí.

Höskuldur með bolta fyrir en Valdimar missir af honum.

Þetta mark verður að teljast sanngjarnt. Ekki verið fjörugur leikur en Sádarnir eina liðið sem hefur skapað sér færi hingað til. Það hættulegasta sem Ísland hefur gert var þegar Ísak var við það að sleppa í gegn en varnarmaður Sáda leysti það vel.

Hafa verið frekar mikið bragðdaufar fyrstu 20 mínútur. Sádarnir verið talsvert hættulegri í sínum aðgerðum og fengu langbesta færi leiksins en Hákon Rafn varði mjög vel.

Ísland er að stilla svona upp:

Hákon Rafn

Höskuldur - Damir - Róbert Orri - Rúnar Þór

Aron Einar

Jónatan - Dagur Dan - Ísak - Valdimar

Óttar Magnús

Hákon Rafn með geggjaða vörslu! Besta færi leiksins til þessa sem Sádar fá hérna. Boltinn fyrir markið en Hákon ver stórkostlega!

Ísak Snær við það að sleppa í gegn en varnarmaður Sáda leysir mjög vel úr þessu. Ísak fellur til jarðar, en það var ekkert á þetta að mínu mati.

Þetta fer býsna rólega af stað. Sádar hafa stjórnað ferðinni til þessa.

Aron Einar Gunnarsson, fyrirliði, er í dag að leika sinn 100. landsleik. Stór áfangi hjá honum.

Leikurinn er hafinn!

Jæja, það er komin mynd!

Það er komið hljóð en engin mynd.

Það eru tæknilegir örðugleikar hjá Viaplay og því spurning hvort við munum yfir höfuð sjá leikinn. Við bíðum frekari frétta!

Það eru um fimm mínútur í að leikurinn muni hefjast.

BYRJUNARLIÐ ÍSLANDS
Fjórir Blikar fá sæti í byrjunarliðinu en það eru þeir Damir Muminovic, Höskuldur Gunnlaugsson, Dagur Dan Þórhallsson og Ísak Snær Þorvaldsson.

Dagur Dan, Ísak Snær og Róbert Orri Þorkelsson eru allir að spila sinn fyrsta landsleik.

Þá er Rúnar Þór Sigurgeirsson einnig í liðinu en hann lék með Keflavík í sumar. Aron Einar Gunnarsson er fyrirliði liðsins.

Byrjunarlið A karla gegn Sádi Arabíu.

Leikurinn hefst kl. 12:00 og er í beinni útsendingu á Viaplay.

Our starting lineup for the friendly against Saudi Arabia.#fyririsland pic.twitter.com/8X9I1Ndo18

— Knattspyrnusambandið (@footballiceland) November 6, 2022

Warming up in warm Abu Dhabi.
🇸🇦⚽️🇮🇸 pic.twitter.com/2JDLeXjkgP

— Knattspyrnusambandið (@footballiceland) November 6, 2022

Players arriving at match stadium in Abu Dhabi. 🇸🇦⚽️🇮🇸 pic.twitter.com/RRgsCV1J4E

— Knattspyrnusambandið (@footballiceland) November 6, 2022

Hvítþvottur
KSÍ hefur talað fyrir því að koma skilaboðum á framfæri. Borghildur Sigurðardóttir, varaformaður KSÍ, er með í för og mun hitta fulltrúa knattspyrnusambands Sádí-Arabíu í dag. Einnig ætlar KSÍ að funda síðar í mánuðinum í Katar.

"Þar ætlum við meðal annars að ræða um kvennaknattspyrnu og bjóða okkar stuðning. Við höfum einnig tekið málið upp á vettvangi UEFA, þá sérstaklega um jafnrétti og mikilvægi samtalsins. Við hyggjumst því halda samtalinu áfram með jafnrétti að leiðarljósi," sagði Vanda Sigurgeirsdóttir, formaður KSÍ.

Sádí-Arabía er eitt versta land í heimi þegar kemur að mannréttindum og réttindum kvenna. Að Ísland sé að spila vináttulandsleik við þessa þjóð er í raun skammarlegt. KSÍ segist ætla að taka samtalið, en ég held að það sé óhætt að fullyrða að það muni ekki breyta miklu hvað varðar stjórnarhætti í Sádí-Arabíu.

Sádí-Arabía er að undirbúa sig fyrir HM en landsliðið notar einnig þennan leik fyrir hvítþvott í gegnum íþróttir. Hægt er að lesa meira um 'sportwashing' með því að smella hérna. Sádar eru að borga okkur til að hjálpa sér í þessu.

Hópurinn:
Fótboltinn fellur vægast sagt í skuggann á hvítþvættinum í dag. Það þarf ekki að fara í felur með það.

Þessi leikur fer fram fyrir utan landsleikjaglugga og er hópurinn svona:

Frederik Schram (m) - Valur - 5 leikir
Hákon Rafn Valdimarsson (m) - IF Elfsborg - 2 leikir
Sindri Kristinn Ólafsson (m) - Keflavík
Viktor Örn Margeirsson - Breiðablik
Róbert Orri Þorkelsson - CF Montreal
Damir Muminovic - Breiðablik - 2 leikir
Júlíus Magnússon - Víkingur, 1 leikur
Rúnar Þór Sigurgeirsson - Keflavík - 1 leikur
Logi Tómasson - Víkingur R.
Hörður Ingi Gunnarsson - Sogndal IL - 1 leikur
Höskuldur Gunnlaugsson - Breiðablik - 5 leikir
Ísak Snær Þorvaldsson - Breiðablik
Dagur Dan Þórhallsson - Breiðablik
Viktor Karl Einarsson - Breiðablik - 2 leikir
Daníel Hafsteinsson - KA
Viktor Örlygur Andrason - Víkingur R. - 2 leikir
Aron Einar Gunnarsson - Al Arabi - 99 leikir, 2 mörk
Bjarki Steinn Bjarkason - Venezia FC
Valdimar Þór Ingimundarson - Sogndal IL - 1 leikur
Jónatan Ingi Jónsson - Sogndal IL
Jason Daði Svanþórsson - Breiðablik - 1 leikur
Danijel Dejan Djuric - Víkingur R.
Óttar Magnús Karlsson - Oakland Roots - 9 leikir, 2 mörk



Ísland og Sádi-Arabía hafa fimm sinnum áður mæst, fyrst árið 1984 og síðast árið 2002. Íslenska liðið hefur unnið einu sinni, tvisvar hafa liðin skilið jöfn og tvisvar hafa Sádar unnið sigur.

"Sádarnir eru með sterkt lið, hafa verið með besta liðið á þessu svæði síðustu áratugina og hafa reglulega komist í lokakeppni HM. Þeir eru með mjög flinka leikmenn, flestir að spila í Sádi-Arabíu," segir Arnar Þór Viðarsson landsliðsþjálfari við miðla KSÍ.

Sádi-Arabía tekur þátt í HM í Katar sem hefst síðar í þessum mánuði. Liðið er með Argentínu, Mexíkó og Póllandi í riðli.

"Þeir eru að fara að æfa sitt upplegg fyrir HM, þeir vilja vera agaðir og spila lokaða leiki, eins og þeir gerðu gegn Bandaríkjunum fyrir stuttu síðan, svo spiluðu þeir á móti Vensúela, sem við þekkjum vel, þannig að þetta hafa verið lokaðir leikir og ekki mikið af færum."

Góður gluggi til að sýna sig
"Þessi leikur verður spennandi og verðugt verkefni fyrir okkar leikmenn og það eru einmitt þannig verkefni sem við erum að leitast eftir. Þetta er frábær möguleiki fyrir okkar leikmenn, sem eru margir að koma beint úr Bestu deildinni, að sýna sig og sanna á þessu leveli," segir Arnar.

"Margir af okkar leikmönnum ef ekki allir, sem eru ekki atvinnumenn nú þegar, hafa áhuga á því að komast í atvinnumennsku, og þessir leikir geta verið góður gluggi fyrir þá."

"Þetta er alvöru verkefni og þó þetta sé vináttuleikur, þá erum við staðráðnir í að spila góðan leik og ná í úrslit. Ef við náum að sýna góða liðsframmistöðu, þá er alltaf möguleiki á einstaklingsframmistöðum hjá einhverjum leikmönnum, sem leiða þá til einhvers stærra og betra."

Upphæðin sem KSÍ fær frá Sádum er trúnaðarmál
Sögusagnir eru um að KSÍ hafi fengið umtalsverðar fjárhæðir frá fótboltasambandi Sádi-Arabíu fyrir að taka þennan leik.

Ómar Smárason, samskiptastjóri KSÍ, staðfestir að Sádarnir greiði allan kostnað við leikinn og greiði að auki ákveðna upphæð í 'match fee' til KSÍ en sú upphæð sé trúnaðarmál.

Valtýr Björn Valtýrsson talaði um það í hlaðvarpsþætti sínum - Mín skoðun - að hann hefði heyrt að upphæðin sem KSÍ fái greitt fyrir að leika þennan leik sé allt að 100 milljónir króna.

Þetta er vægast sagt umdeildur vináttulandsleikur.

Sjá einnig:
Mikill meirihluti á móti vináttulandsleiknum gegn Sádí-Arabíu

Það hefur verið talsvert gagnrýnt að KSÍ hafi samþykkt að spila vináttuleik við Sáda í ljósi mikilla mannréttindabrota í landinu.

Síðastliðinn föstudag var ritaður pistill á Vísi þar sem farið var yfir það sem er í gangi í Sádí-Arabíu.

Sádi-Arabía er gjarnan á meðal þeirra landa sem taka flesta af lífi á ári hverju, ásamt Kína, Íran og Egyptalandi... Á meðal glæpa sem geta kallað á dauðarefsingu í landinu fyrir utan morð, landráð og hryðjuverk eru eiturlyfjasmygl, framhjáhald, samkynhneigð og fjölkynngi (e. witchcraft). Þremur mismunandi aðferðum er beitt til að taka fólk af lífi í ríkinu; fólk er hálshöggvið, stillt upp framan við aftökusveitir eða grýtt til dauða," skrifaði Valur Páll Eiríksson í pistli sínum.

Þá eru auðvitað ótaldar pyntingar sem fólki er beitt, heft tjáningarfrelsi og víðtæk mismunun gegn konum." Einnig er vert að benda á morðið á fjölmiðlamanninum Jamal Khashoggi sem hefur verið bendlað við stjórnvöld í Sádí-Arabíu.

Valur kemur einnig inn á það að Ísland sé fyrsta Norðurlandaþjóðin til að spila við Sádí-Arabíu síðan 2006, og erum við að gera það sjálfviljug. Um leið erum við að hjálpa þeim í hvítþvætti sínum í gegnum íþróttir.

Góðan daginn kæru lesendur og verið velkomin í beina textalýsingu frá vináttulandsleiks Sádí-Arabíu og Íslands í Abú Dabí.

Stuðst verður við beina útsendingu frá Viaplay í þessari lýsingu.