SKÝRSLAN: Klúður í Keflavík
Hvað réði úrslitum?
Agaður varnarleikur Keflavíkur réði þar líklega mestu en þegar á reyndi hjálpuðu aðstæður þeim líklega talsvert. Fátt verður rætt um annað eftir þennan leik en dauðafærið sem Klæmint Olsen fékk en víkjum að því síðar.
Bestu leikmenn
1. Gunnlaugur Fannar Guðmundsson
Kollektívt val á varnarlínu Keflavíkur sem átti góðan leik í dag heilt yfir, Gunnlaugur, Frans, Oleksii sem og fleiri vörðust vel og unnu vel fyrir stiginu.
2. Höskuldur Gunnlaugsson
Fyrirliði Blika var mikið að reyna að skapa fyrir liðsfélaga sína í dag og átti nokkur skot að marki að auki. Fékk ekkert fyrir það á endanum en menn fiska sem róa.
Atvikið
Færi aldarinnar hjá Klæmint Olsen sem setur boltann yfir af örstuttu færi fyrir opnu marki er klippa sem mun á endanum skila sér í eitthvað bloober myndband á Youtube. Honum til varnar þá voru aðstæður vissulega erfiðar en er ekki sanngjarnt á sama hátt að gera þá kröfu á leikmann með á þriðja hundrað marka í meistaraflokki og 56 A-landsleiki að skora af færi sem mælist í sentimetrum?
Hvað þýða úrslitin?
Breiðablik fellur niður í 3. sæti deildarinnar og situr þar með 22 stig 5 stigum á eftir toppliði Víkinga en þau lið mætast næstkomandi föstudag. Keflavík lyftir sér úr botnsætinu upp í það 11. með 6 stig.
Vondur dagur
Klæmint Olsen mun sennilega aldrei vilja sjá þetta færi sitt sem hann brenndi af aftur á lífsleiðinni. Ótrúlegt atvik sem ég er bara ekki búinn að átta mig á til fulls. Hann mun þó ekki hengja haus enda sannur fagmaður.
Dómarinn - 7
Til að hrósa Gunnari þá reyndi hann sitt allra besta til að fá leikinn til að fljóta eins og hægt var. Sleppti mörgum smábrotum sem hann mátti alveg flauta á en leikurinn hefði orðið enn verri fyrir vikið ef hann hefði flautað um of. Auðvitað eitt og eitt atvik sem má tína til en það sem Blikar eru sennilega ósáttastir með er lokaflautið. Gísli Eyjólfsson var að sleppa einn í gegn þegar lokaflautið gall og voru Blikar langt í frá sáttir. Einhverjir gætu sagt að tíminn sé búinn þegar hann er búinn og aðrir sagt að menn eigi að fá að klára augnablikið. Hvort er réttara ætla ég mér ekki að dæma um heldur halda mig við mitt hrós.