SKÝRSLAN: Iðnaðarsigur hjá KR-ingum
Hvað réði úrslitum?
Það sem réði úrslitum var góð byrjun KR. Þær byrjuðu af krafti og náðu inn marki strax á 6. mínútu. Þær hefðu hæglega getað verið með meiri forystu í hálfleik en í seinni var planið greinilega að sigla þessu heim sem þær gerðu nokkuð vel. Augnablik fengu alveg færi en voru klaufskar fyrir framan markið.
Bestu leikmenn
1. Kristín Erla Ó Johnson
Það var enginn einn sem stóð eitthvað sérstaklega upp úr eftir leikinn en þegar ég fór að hugsa þetta betur fannst mér Kristín eiga þetta skilið. Hún var öflug í vörninni hjá KR í dag og var dugleg að stíga ofar á völlinn með boltann og koma honum í spil.
2. Hildur Björg Kristjánsdóttir
Skoraði sigurmarkið og var heilt yfir öflug. Þú færð alltaf baráttu frá Hildi og það var ekkert öðruvísi í dag.
Atvikið
Það eru ekkert sérstaklega mörg stór atvik í leiknum þannig að þetta fer á eina mark leiksins. Það var það sem skildi liðin af þegar lokaflautið gall og það var líka bara mjög vel klárað hjá Hildi.
Hvað þýða úrslitin?
Úrslitin þýða að KR sendir Augnablik á botninn í deildinni og fara sjálfar upp úr fallsæti, allavega tímabundið. Það þarf að koma í ljós hvað Fram gerir gegn Aftureldingu á miðvikudaginn en þær eru tveimur stigum á eftir þeim.
Vondur dagur
Eins og það var enginn frábær í dag að þá var enginn sem átti áberandi slæman dag. Ég ætla samt að setja þetta á Jewel Boland einungis vegna þess að mér fannst hún áhugalaus og var eina sem var ekki að berjast eins og ljón inni á vellinum. Hún sleppti því ítrekað að fara upp í skallabolta, átti kærulausar sendingar og var fljót að hengja haus. Ekki í fyrsta skipti sem ég sé þetta frá henni í sumar og mér finnst það leiðinlegt. Þarna er greinilega leikmaður sem býr yfir gæðum en hún sýnir það bara allt of sjaldan.
Dómarinn - 7
Mér fannst Natan og hans teymi leysa þetta bara ágætlega. Hann leyfði leiknum að fljóta, og var ekki að flauta mikið. Það má alveg færa rök fyrir því að hann hafi mátt vera duglegri á flautunni en það var þó engin stór ákvörðun hjá honum og teyminu í dag sem hafði áhrif á úrslitin.