Virkilega góð úrslit í þessu einvígi! Vel klárað, KA er einfaldlega betra en Dundalk. Næst á dagskrá í Evrópu er Club Brugge, fyrri leikurinn eftir viku í Belgíu! Áfram íslenskur fótbolti!

Staðan í einvíginu er 5-3, KA í vil.

Kristinn Kjærnested að greina frá því á Stöð 2 Sport að leikur Vals og KA í Bestu deildinni mun fara fram á mánudaginn, á frídegi verslunarmanna, klukkan 16:00. Átti að vera á miðvikudaginn.

3. umferðin verður leikin 10. og 17. ágúst og KA leikur fyrri leikinn utan landsteinana.

Gjörsamlega geggjað, eru að fara að mæta Club Brugge í næstu umferð.

KA að fá hornspyrnu. Hallgrímur Mar með sendingu inn í teiginn, Ívar í baráttunni og hann tekinn niður!!! VÍTIIIII!!!!!!

Heyrist vel í stuðningsmönnum KA í útsendingunni. Gott ef þetta var ekki Halli BK að garga þarna?

KA SLEPPUR MEÐ SKREKKINN! John Martin í ROSALEGU dauðafæri en þrumar í þverslána af stuttu færi!

Jajalo markvörður KA þarf aðhlynningu. Stendur stutt yfir. Áfram gakk.

Eftir nokkuð þunga sókn Dundalk á Conor Malley skot vel yfir.

Dundalk miklu meira með boltann en agaðir KA menn gefa fá færi á sér. Eftir skyndisókn átti Jakob Snær svo skot í varnarmann og svo slána og yfir.

Dundalk fékk óvænt dauðafæri. Skyndilega barst boltinn á John Martin sem var beint fyrir framan Jajalo markvörð en móttakan hrikaleg og þetta rennur út í sandinn.

Belgarnir fara áfram samanlagt 3-1 gegn AGF. Ef KA klárar verkefni sitt í kvöld er það Belgía sem bíður KA. Afar erfitt verkefni en við trúum!

Ásgeir Sigurgeirsson með skot fyrir utan teig sem dempast af varnarmanni. Eins og leikurinn er að spilast þá nær Dundalk afar lítið að skapa sér. Megi það haldast þannig!

Hallgrímur Mar með aukaspyrnuna. Þéttingsfast en beint í fangið á Shepperd.

Birgir Baldvins fær aukaspyrnu rétt fyrir utan vítateiginn. Sýnir klókindi.

Fyrirgjöf frá hægri sem Jajalo handsamar örugglega.

Hrannar Björn brotlegur og Dundalk fær aukaspyrnu með fyrirgjafarmöguleika. KA nær að koma boltanum frá.

Ívar Örn með góðan varnarleik, skýlir boltanum afturfyrir.

Fékk mér Guinness í hálfleik, vel við hæfi held ég. Heimamenn hófu seinni hálfleikinn. Engar breytingar á liðunum.

Marktilraunir: 4-2 Hornspyrnur: 4-3 Gul spjöld: 2-1

Nálgun Akureyrarliðsins sú að einbeita sér að því að halda forystunni. Er algjörlega í skotgröfunum. Dundalk verið meira með boltann án þess að skapa sér mjög mikið.

KA leggur allt kapp á að halda þessari forystu sem liðið hefur í einvíginu. Conor Malley með skot fyrir utan teig sem Jajalo ver.

KA fær hornspyrnu. Sveinn Margeir með fyrirgjöf sem fer í varnarmann Dundalk og afturfyrir. Kallað eftir hendi og víti en horn niðurstaðan. KA nær ekki að skapa sér marktilraun eftir hornið.

Ógnandi, Rodri kemst fyrir sendingu hans. Hornspyrna.

Það sést vel í sjónvarpsútsendingunni að þetta gervigras er algjört drasl. Virðist sem það séu nánast engar kröfur frá UEFA á þessu stigi keppninnar. Skrítið miðað við þetta undirlag að KA hafi hreinlega ekki mátt spila á Greifavellinum.

Sending fram og Ívar í smá brasi, Daniel Kelly kemur sér í dauðafæri en hikar aðeins á meðan boltinn skoppar á gervigrasinu. Skýtur svo framhhjá.

Archie Davies reynir fyrirgjöf frá hægri en varnarmenn KA öflugir og hleypa heimamönnum ekki í nein færi.

Birgir Baldvinsson með frábæran varnarleik og vinnur boltann. KA er hinsvegar ekki mikið að ná að halda boltanum innan liðsins þessa stundina.

Dundalk fékk aukaspyrnu með fyrirgjafarmöguleika. Slök spyrna beint á Jóan Simun. Dæmd aukaspyrna, brot í teignum.

Útlitið heldur betur gott! En við byrjum ekki að syngja sigursöngva strax.

Það má sjá á leik KA að varfærnin er algjörlega að vopni. Akureyringar eru 3-1 yfir í einvíginu og það upplegg því skiljanlegt.

Jóan Símun átti skot framhjá áðan. Annars hafa þessar upphafsmínútur einkennst af þreifingum. Í þessari stöðu má segja að engar fréttir séu góðar fréttir fyrir KA.

Afskaplega róleg byrjun á leiknum. Kristinn Kjærnested lýsandi er að rifja upp viðureign Dundalk við Fram á sínum tíma, í Evrópukeppni bikarhafa.

Áfram KA!

17 gráðu hiti og léttskýjað, létt gola. Rakastig: 75%.

Biggi meðal byrjunarliðsmanna KA og miðað við þessa mynd er ekki annað að sjá en að hann sé fullur tilhlökkunar. Hér að neðan má svo sjá völlinn umtalaða. Einn af gamla skólanum.

Hallgrímur Jónasson, þjálfari KA, gerir tvær breytingar á sínu liði milli leikja. Ívar Örn Árnason kemur inn í leikinn eftir að hafa glímt við meiðsli á öxl. Þá kemur Jóan Símun Edmundsson inn í liðið fyrir Pætur Petersen sem tekur sér sæti á bekknum. Bjarni Aðalsteinsson meiddist í síðasta leik en er á bekknum. Við endurkomu Ívars í liðið færist Rodri inn á miðsvæðið.

Heimavöllur Dundalk er með gervigrasi, sem er þurrt og gamalt að sögn leikmanna KA. Andri Fannar Stefánsson og Elfar Árni Aðalsteinsson ræddu við samfélagsmiðla félagsins og segja aðstæður krefjandi, þetta sé eins og að fara aftur í tímann. Klefinn sé lítill, fáir snagar og trébekkir.

Sigurvegarinn í einvígi KA og Dundalk mætir Club Brugge frá Belgíu eða AGF frá Danmörku. Club Brugge vann fyrri leikinn 3-0 en liðin mætast í Danmörku klukkan 18:00.

„Góð staða, þetta verður erfitt, verður hörkuleikur. Þeir eru gott lið og yfirleitt er munur á heima- og útileikjum í Evrópu. Þeir telja að þeir hafi átt meira skilið í fyrri leiknum, mæta klárir og við þurfum að eiga hörkuleik til að fara áfram," sagði Hallgrímur Jónasson. Dundalk náði að þrýsta KA svolítið niður að eigin vítateig í seinni hálfleiknum á fimmtudag. „Þeir náðu tökunum í seinni hálfleik og við kannski fórum að verja eitthvað í staðinn fyrir að halda áfram að spila. Svo er þetta hörkulið, lið sem er búið að fara í riðlakeppni og er í hörkuformi. Þeir voru bara góðir, en við náðum að standast áhlaupið. Það er ekkert launungarmál að ég hef ekki áhuga á því að við séum svona neðarlega í svona langan tíma, það má vera í smá stund en svo þurfum við að komast inn í leikinn. Okkar leið áfram er að spila boltanum framhjá þeim, þar finnst mér við geta sært þá. Ef þetta verða mikið af fyrirgjöfum og návígum þá verður þetta erfiður leikur." Mörkin sem KA skoraði í fyrri leiknum komu eftir gott spil. „Þetta var ótrúlega vel klárað hjá okkur, góðar sóknir og við vorum bara skilvirkir. Við eigum bara þrjú skot á markið og eitt í slána, við nýttum færin vel sem er bara frábært; setur okkur í góða stöðu. Við ætlum að fara út með sjálfstraust og klára þetta." Verandi með tveggja marka forskot, er hægt að fara verja eitthvað? „Nei, við ætlum ekki að fara út og verja þetta forskot. Við ætlum að fara út og enda ekki of neðarlega á vellinum og spila boltanum. Þeir þurfa að koma ofar, mér fannst fyrstu fimm leikmenn þeirra pressa hátt, hinir sátu aðeins eftir og það myndaðist pláss fyrir okkur að spila í. Við nýttum það og ætlum að gera það nákvæmlega sama í seinni hálfleik. Við ætlum ekki að falla svo oft aftarlega að þeir geti komist utan á okkur og komið með fullt af fyrirgjöfum. Þó að við höfum lifað það af í síðasta leik þá er það ekki einhver staða sem ég vil vera í í of langan tíma. Við leggjum leikinn mjög svipað upp, erum búnir að mæta þeim einu sinni og sáum enn betur hvar þeir eru sterkir og hvar við getum meitt þá. Við ætlum að nýta okkur það." Smelltu hér til að sjá viðtalið í heild sinni

KA-menn sýndu frábæra frammistöðu í fyrri leiknum og unnu 3-1 sigur. Öll mörk leiksins komu í fyrri hálfleik en það voru líklega bestu 45 mínútur KA á tímabilinu. Ég mætti sjálfur á völlinn og skemmti mér konunglega í Úlfarsárdalnum, þar sem KA spilar heimaleiki sína í Evrópu þar sem Greifavöllurinn stenst ekki kröfur.

Walter Altmann heitir maðurinn með flautuna. Roland Brandner og Robert Steinacher eru aðstoðardómarar og Daniel Pfister fjórði dómari.

Seinni leikur Dundalk og KA í forkeppni Sambandsdeildarinnar hefst klukkan 18:45, hann er sýndur beint á Stöð 2 Sport 5 og þessi lýsing er í gegnum þá útsendingu.