SKÝRSLAN: Valur og KR skildu jöfn og Víkingar urðu sófameistarar
Hvað réði úrslitum?
Bæði lið voru klaufar að klára ekki leikinn í dag. KR byrjuðu betur og hefðu átt að komast yfir snemma í leiknum en fóru illa með færin sín. Valsarar voru svo klaufar að missa forystu niður tvisvar í leiknum með því að fá á sig nokkuð ódýr mörk.
Bestu leikmenn
1. Benoný Breki Andrésson
Í leik þar sem enginn skaraði fram úr er auðvelt að fara í mennina sem skora mörkin og það er það sem ég ætla að gera í dag. Ekki bara er Benoný duglegur að skora heldur er hann bara gríðarlega öflugur fremsti maður í pressu og er alltaf að ógna vörn andstæðingsins.
2. Sveinn Sigurður Jóhannesson
Markmaður sem fær á sig tvö mörk væri skrýtið val í þennan flokk undir venjulegum kringumstæðum en Sveinn var besti maður Vals í leiknum. Hann hélt þeim inn í leiknum framan af með nokkrum góðum vörslum og greip oft vel inn í. Lítið sem hann gat gert í mörkunum sem voru skoruð.
Atvikið
Það var mjög falleg stund fyrir leikinn þegar goðsögnin Bjarni Fel var heiðraður með fögrum orðum og mínútu þögn. Það var svo kerti í fjölmiðlastúkunni þar sem Bjarni sat ósjaldan og greinilegt að hans verður saknað.
Hvað þýða úrslitin?
KR tekur stig og fara brattir inn í þessa síðustu leiki með Evrópusætið að leiðarljósi. Þeir eiga innbyrðis leiki eftir við öll þau lið sem þeir eru í baráttu við þannig að þetta er enn allt í þeirra höndum. Valsarar eru svo gott sem öruggir með annað sætið og þarf eitthvað mikið að fara úrskeiðis svo það klikki. Þessi úrslit þýða svo auðvitað það að Víkingar urðu sófameistarar.
Vondur dagur
Það á í rauninni enginn skilið að vera hent í þennan dálk eftir leikinn. Eins og áður segir hefðu bæði lið getað farið betur með færin sín í leiknum og verða líklega einhverjir svekktir með ákveðin augnablik en heilt yfir var þetta bara nokkuð góður leikur af fótbolta.
Dómarinn - 8
Mér fannst Jóhann og hans teymi gera þetta vel í dag. Það var ágætis flæði á leiknum og hann greip bara inn í þegar þess þurfti. Menn voru eitthvað ósammála um það hvort að vítaspyrnudómurinn hafi verið réttur en undirrituð er ekki búin að sjá atvikið aftur og getur því ekki sagt til um það.