SKÝRSLAN: Evrópudraumar FH kramdir á Hlíðarenda
Hvað réði úrslitum?
Valsmenn voru heilt yfir betri aðilinn í leiknum fannst mér. Það kom kafli í fyrri hálfleik þar sem FH héldu meira í boltann en það vantaði bara að skapa færi opna vörn Vals. Davíð Snær náði að jafna fyrir FH í fyrri hálfleik en seinni hálfleikurinn var í eigu Vals. Valur gjörsamlega rúlluðu yfir FH. Það sást ekki á FH að þeir voru eina liðið á vellinum með eitthvað í húfi.
Bestu leikmenn
1. Aron Jóhannsson
Get alveg reynt að vera sniðugur og valið einhvern annan en Aron var bara einfaldlega besti maður vallarins. Leggur upp tvö og skorar eitt geggjað mark. Það er alveg búið að fara yfir gæðin hans og hversu góður hann er í þessari deild. Hann var stórkostlegur í dag og verðskuldar þessi heiðursverðlaun frá mér.
2. Patrick Pedersen
Skorara og leggur upp. Það er oftast nóg fyrir mig. En daninn var frábær í kvöld og sérstaklega í fyrri hálfleik. Maður sá hversu mikið honum langaði að skora þetta fimmta mark en það hefði verið mark nr 100 hjá honum fyrir Val skilst mér. Geggjaður eins og svo oft áður og FH-ingarnir réðu ekkert við hann, Adam Ægi, Lúkas Loga og Aron Jóh.
Atvikið
Klárlega markið hans Aron Jóh. Þriðja mark Valsmanna, kom skömmu eftir annað mark Valsmanna, en þetta var sturlað mark. AP ætlar að koma með bolta inn á teiginn sem er skallað frá, nema þá er Daði mættur úr markinu. Það virtist eins og hann ætlaði að taka boltann sjálfur. Hreinsunin fór beint í áttina að Aroni Jóh rétt fyrir utan vítateig FH sem tekur geggjað volley í fyrsta og í netið. Bingo!
Hvað þýða úrslitin?
FH þarf kraftaverk til að komast í Evrópu. Heimir Guðjóns sagði að það myndi vera mesta kraftaverk í sögu íslensks fótbolta ef þeir myndu ná í Evrópu. Úrslitin þýða svosem lítið fyrir val. Þeir fá þrjú stig á töfluna en sitja áfram í þessu öðru sæti sínu.
Vondur dagur
Erfitt að nefna einhvern einn í liði FH. Lið Vals er bara það gæðamikið að það á að vinna FH á heimavelli. Ef ég ætti að velja einhvern gæti ég tekið Finn Orra og Daða í marki FH. Leit út fyrir að vera eitthvað samskiptaleysi þegar Aron Jóh bombar boltanum í autt markið.
Dómarinn - 8
Ágætis dómgæsla fannst mér í kvöld. Lítið hægt að setja út á dómarateymið í kvöld og engar ákvarðanir hjá þeim réðu úrslitum í dag. Fær eina kósý áttu frá mér.