Arnar Grétars á RÚV um Gylfa: ,,Allir vita hvað Gylfi getur. Hann er búinn að taka tvo leiki núna og vonandi klárar hann allavega 45 mínútur og svo skoðum við hvernig ástandið á honum er. Hann lítur alltaf betur og betur út, það er helvíti gott að vera kominn með hann og hann er á réttu róli. Það er jákvætt."

Lets go! Liðin ganga þá til vallar og þetta er alveg að byrja!

Hörkumæting líka!

Styttist Liðin ganga þá til búningsklefa og gera sig klár í slaginn!

Gunnlaugsson vs Grétarsson Arnar Gunnlaugs og Arnar Grétars hafa mæst 9 sinnum á þjálfaraferlinum. Arnar Gunnlaugs hefur oftar unnið þessa leiki en svona lítur þessi tölfræði út:

Arnar Grétarsson vinnur: 2
Jafntefli: 2
Arnar Gunnlaugsson vinnur: 5

Dómarateymið Ívar Orri Kristjánsson fær það skemmtilega verkefni að dæma þennan leik. Ívar er með Eystein Hrafnkelsson og Egil Guðvarð Guðlaugsson með sér til halds og trausts í dag. Twana Khalid Ahmed er varadómari en Gunnar Jarl Jónsson er eftirlitsmaður KSÍ.

Stór tíðindi í dag Það hrannast inn stórtíðindin í dag úr herbúðum Vals. Kristján Óli Sigurðsson í Þungavigtinni segir á Twitter í dag að Gylfi Þór Sigurðsson verði í byrjunarliði Vals í leiknum í kvöld.


Einnig er það orðið staðfest að miðjumaðurinn Bjarni Mark Duffield hefur gert samning við Val um að leika með félaginu næstu þrjú árin. Bjarni sem er 28 ára gamall kemur til Vals frá Start í Noregi.

Valsarar ætla sér stóra hluti Það er varla til íslenskt félagslið sem hefur verið meira í umræðunni í vetur en Valur. Þeir hafa átt hreint úr sagt magnaðan félagskiptaglugga og kröfurnar sem eru settar á Hlíðarendafélagið í sumar eru miklar. Valur áttu mjög skrítið sumar í fyrra. Duttu snemma úr bikarnum gegn 1. deildarliði Grindavíkur á heimavelli og áttu einhvernveginn aldrei séns í Víkinga en samt var 2. sætið aldrei í hættu hjá Valsmönnum. En eins og ég sagði áðan að þá hlýtur krafan að vera Íslandsmeistaratitill og bikarmeistaratitill á Hlíðarenda. Það er enginn húmor fyrir neitt annað þar þegar breiddin og hópurinn er orðin svona sterkur.


Vetur Valsmanna tíðindamikill
Valsmenn hafa verið allt í öllu í vetur á félagskiptamarkaðnum. Stærstu félagskiptin eru eflaust heimkoma Gylfa Þórs Sigurðssonar sem er ein stærsta heimkoma í sögu fótboltans hér á Íslandi. Einnig hafa þeir bætt við sig yngri leikmönnum eins og Gísla Laxdal, Jakobi Franz og Bjarna Guðjón til að nefna einhverja. Valsmenn töpuðu á dögunum gegn ÍA á heimavelli í vítaspyrnukeppni í undanúrslitum Lengjubikarsins.

En svona lítur þessi ágæti gluggi Vals út:

Komnir
Gylfi Þór Sigurðsson frá Lyngby
Jónatan Ingi Jónsson frá Sogndal
Bjarni Mark Duffield frá Start
Bjarni Guðjón Brynjólfsson frá Þór
Gísli Laxdal Unnarsson frá ÍA
Jakob Franz Pálsson frá Venezia
Stefán Þór Ágústsson frá Selfossi
Ólafur Flóki Stephensen frá Grindavík (var á láni)

Farnir
Hlynur Freyr Karlsson til Haugesund
Andri Rúnar Bjarnason í Vestra
Birkir Heimisson í Þór
Haukur Páll Sigurðsson orðinn aðstoðarþjálfari
Sveinn Sigurður Jóhannesson
Guy Smit til KR (var á láni hjá ÍBV)

Víkingar ennþá bestir? Víkingur R. unnu tvöfalt í fyrra og sýndu það þá að þeir eru besta liðið á landinu. Það verður mjög áhugavert að sjá hvernig Víkingarnir koma inn í þetta tímabil í mjög öflugri Bestu deild. Verður áherslan lögð á Evrópu frekar en á deildina eins og Blikar gerðu kannski í fyrra? Það er erfiðara að verja titil en að sækja hann eins og Arnar Gunnlaugsson, þálfari Víkinga, hefur oft sagt. En leikurinn í dag verður líka áhugaverður fyrir þær sakir að Valur mun eflaust vera að etja kappi við Víkinga um Íslandsmeistaratitilinn fram að sumri ef marka má alla virtustu sérfræðinga og sparkspekinga landsins.



Áhugaverður vetur Víkinga
Víkingar hafa átt mjög áhugaverðan vetur. Þeir unnu auðvitað Reykjavíkurmótið í vetur þrátt fyrir að hafa tapað úrslitaleiknum þar sem KR-ingar tefldu fram ólöglegum leikmanni. En þeir áttu ekki farsælan Lengjubikar. Þeir lentu í 3. sætinu í sínum riðli. KA og ÍA voru fyrir ofan þá. Víkingar kláruðu sín félagskipti frekar snemma miðað við önnuð lið. Það eru auðvitað alltaf einhver spurningarmerki með suma leikmenn sem hafa komið inn en það eru fá lið sem eru með jafn góða breidd og með jafn góðan strúktúr og lið Víkinga.

En svona lítur þessi ágæti gluggi Víkinga út:

Komnir
Jón Guðni Fjóluson frá Hammarby
Valdimar Þór Ingimundarson frá Sogndal
Óskar Örn Hauksson frá Grindavík
Pálmi Rafn Arinbjörnsson frá Wolves
Bjarki Björn Gunnarsson frá ÍBV (var á láni)
Sveinn Gísli Þorkelsson frá Fylki (var á láni)

Farnir
Birnir Snær Ingason til Halmstad
Logi Tómasson til Strömsgodset
Kyle McLagan í Fram
Þórður Ingason hættur
Arnór Borg Guðjohnsen til FH (var á láni - seldur)

Meistarar meistaranna! Heilir og sælir ágætu lesendur og veriði hjartanlega velkomin í þessa þráðbeinu textalýsingu frá leik Víkings R. og Vals. Meistari meistaranna er leikur þar sem Íslandsmeistararnir frá því í fyrra mæta bikarmeisturunum frá því í fyrra. Þar sem Víkingur R. tók báða þessa titla fá þeir Val, sem lenti í 2. sæti í fyrra, í heimsókn. Leikurinn fer fram á heimavelli hamingjunnar í Víkinni.