SKÝRSLAN: Nýr Grealish í Víkinni - Nýtt tímabil, sama sagan
Hvað réði úrslitum?
Víkingar tóku sín færi en góði kafli Stjörnunnar náði ekki að skila marki. Víkingarnir eru massífir og ef þú ætlar að særa þá verður heppnin að vera með þér í færunum en hún var það ekki Stjörnumegin í dag og Ingvar í góðum gír á móti þeim. Þrumuskot frá Gunnari og frábært annað mark skildi liðin af.
Bestu leikmenn
1. Karl Friðleifur Gunnarsson
Í fyrra talaði Arnar Gunnlaugs um Birni Snæ sem Jack Grealish. Í kvöld talaði hann um Karl Friðleif og Grealish í sömu setningu. Leysti vinstri bakvörðinn frábærlega, er gríðarlega snöggur bæði með og án bolta. Svo það sé tekið fram voru margar mjög góðar frammistöður hjá Víkingi og auðvelt að nefna svona 8 í þessu boxi.
2. Gunnar Vatnhamar
Saliba þeirra Víkinga fyrir utan kannski að hann er þeirra Gabriel þegar kemur að markaskorun. Færeyingurinn byrjar nýtt tímabil frábærlega og kom heimamönnum yfir í dag.
Atvikið
Markið frá Vatnhamar. Alvöru þruma í lok hálfleiksins sem breytti leikmyndinni.
Hvað þýða úrslitin?
Partíið í Víkinni heldur áfram, sama uppskrift og í byrjun síðasta tímabils þegar sömu lið mættust og Víkingur vann þá 0-2 í Garðabænum.
Vondur dagur
Örvar Eggertsson fékk ekki úr miklu að moða þegar kom að boltum til að elta fyrir framan sig. Hilmar Árni týndist á köflum og Þórarinn Ingi var í töluverðu brasi í fyrri hálfleiknum.
Dómarinn - 8,5
Fannst Pétur heilt yfir mjög góður í leiknum, leyfði mikið og flæðið í leiknum gott.