SKÝRSLAN: Að vinna alltaf 3-0 er ansi góð uppskrift
Hvað réði úrslitum?
Breiðablik tók forystuna snemma í leiknum en Tindastóll gafst ekki upp við það og þær gáfu Blikunum hörkuleik. Í seinni hálfleik fóru Stólarnir að þreytast og heimakonur hótuðu öðru markinu hvað eftir annað. En gestirnir fengu eitt frábært færi til að jafna undir lokin á venjulegum leiktíma og þá steig landsliðsmarkvörðurinn Telma Ívarsdóttir upp og varði frábærlega. Blikar fóru upp í sókn eftir vörslu Telmu og gengu frá leiknum.
Bestu leikmenn
1. Vigdís Lilja Kristjánsdóttir (Breiðablik)
Skoraði tvö í fyrsta leik og gerði eitt í dag. Lagði á sig ótrúlega mikið fyrir liðið og hljóp úr sér lungun. Alltaf hætta í kringum hana fremst á vellinum. Það stefnir í frábært sumar fyrir þennan efnilega leikmann.
2. Telma Ívarsdóttir (Breiðabik)
Eins og Nik Chamberlain, þjálfari Breiðabliks, sagði eftir leik þá bjargaði Telma stigunum þremur. Þurfti ekki að gera mikið en steig upp þegar liðið þurfti á henni að halda.
Atvikið
Varslan hjá Telmu undir lokin, engin spurning. Hugrún sloppin ein í gegn og hefði getað jafnað, en landsliðsmarkvörðurinn sá við henni.
Hvað þýða úrslitin?
Breiðablik er með fullt hús á toppnum eftir tvo leiki á meðan Tindastóll er án stiga eftir tap gegn FH í fyrstu umferð. Breiðablik vann Keflavík 3-0 í fyrstu umferð og það er góð uppskrift að vinna alltaf 3-0 bara. Maður segir ekki nei við því!
Vondur dagur
Jordyn Rhodes fann sig ekki alveg fyrir framan markið í þessum leik. Tindastóll fær ekki endalaust af færum í sumar og hún þarf að nýta þau betur. Hugrún Pálsdóttir gæti þá átt erfitt með svefn í nótt eftir að hafa klúðrað algjöru dauðafæri seint.
Dómarinn - 8
Býsna vel dæmdur leikur.