SKÝRSLAN: Fjölnir fær fljúgandi start
Hvað réði úrslitum?
Fjölnismenn nýttu sín tækifæri í leiknum eða í það minnsta fleiri en Grindavík. Það má alveg segja að leikurinn hafi að mestu verið í járnum úti á velli en eftir stendur markatalan og þar eru Fjölnismenn sanngjarnir sigurvegarar.
Bestu leikmenn
1. Guðmundur Karl Guðmundsson
Alltaf heldur maður að tímabilið sé það síðasta hjá Gumma Kalla en alltaf mætir hann aftur og stendur fyrir sínu. Gríðarlega mikilvægur hlekkur í reynslulitlu Fjölnisliði og mun örugglega gefa mikið af sér inn í hópinn þetta sumarið. Skoraði virkilega gott mark.
2. Axel Freyr Harðarson
Fjölnisliðið átti heilt yfir rosalega jafna frammistöðu í leiknum og erfitt að taka einhvern útfyrir sviga. Axel olli usla oftar en einu sinni þegar hann hljóp á vörnina og fær prik frá mér í dag.
Atvikið
Annað mark Fjölnis. Eftir aukaspyrnu frá Reyni Haraldssyni nánast frá hornfána skalla Grindvíkingar boltann út beint fyrir fætur Guðmundar Karls sem hamrar boltann í netið örfáum sekúndum fyrir hálfleiksflautið og staðan 2-0 fyrir Fjölni í hálfleik.
Hvað þýða úrslitin?
Fjölnimenn með þrjú stig á toppi deildarinnar og fá að njóta þess í tæpa tvo sólarhringa hið minnsta. Grindvíkingar stigalausir á botninum yfir sama tímabil að minnsta kosti.
Vondur dagur
Kristófer Konráðsson kom Grindavík aftur inn í leikinn með góðu marki en misreiknaði svo boltann skömmu síðar sem varð til þess að Fjölnir komst í 3-1. Hefur ábyggilega verið ansi súr biti að kyngja það.
Dómarinn - 7
Ívar og hans teymi áttu heilt yfir ágætis dag. Læt vítaspyrnudóminn liggja á milli hluta. Er ekkert endilega viss um hann hafi verið réttur en hef að sama skapi ekkert í höndunum að hann hafi verið rangur heldur.