Víkingar spiluðu ekki sinn besta leik, en alvöru meistaralið vinna leikina sína þegar þau eru ekki upp á sitt besta. Víkingarnir voru talsvert betri í teigunum og það skilaði þeim þremur stigum í dag.

Fyrsta markið sem Víkingar skora breytti leiknum. Virkilega vel útfært mark sem kom stuttu eftir að FH hafði brennt af dauðafæri. Svo er auðvitað mikið rætt um það þegar Böðvar Böðvarsson tók Matthías Vilhjálmsson í höfuðlás, en það hafði ekki úrslitaáhrif að það fór ekki rautt spjald á loft þar.

Víkingar eru á toppnum með 15 stig og svöruðu slæmu tapi gegn HK vel. FH er með tólf stig og geta enn auðvitað leyft sér að dreyma um toppbaráttu.

Sigurður Bjartur Hallsson fór illa með góð færi í þessum leik. Verður að gera betur í svona leik. Ástbjörn Þórðarson lenti líka í talsverðum vandræðum í tvö skipti og var hann heppinn að það var ekki refsað með marki.

Hefði átt að gefa Böðvari Böðvarssyni rautt spjald og er dreginn niður fyrir það. Hefði getað endað illa en hafði samt sem áður ekki úrslitaáhrif. Annars fannst mér Erlendur dæma þennan leik vel. Rauða spjaldið á Nikolaj Hansen er hárréttur dómur að mínu mati.