SKÝRSLAN: HK-ingar eru fáránlega seigir
Hvað réði úrslitum?
KR eru á slæmum stað og voru ekki góðir í dag. HK vann alla seinni bolta frá fyrstu mínútu og gáfu gjörsamlega allt í verkefnið, liðið er mögulega betra en sparkspekingar halda fram. Auðvitað var fyrsta markið hálfgerð gjöf en við tökum ekkert af HK, þeir áttu sigurinn fyllilega skilið
Bestu leikmenn
1. Arnþór Ari Atlason
Hann er helvíti seigur. Hann dregur þetta lið oft á tíðum áfram og er líklega vanmetnasti leikmaður deildarinnar. Skoraði markið sem skildi liðin að í dag. Maður leiksins var þó í raun liðsheildin hjá HK, þeir börðust og börðust.
2. Arnar Freyr Ólafsson
Ég hef sjaldan átt í jafn miklum erfiðleikum með að velja menn leiksins, enginn stóð upp úr þannig séð. Arnar Freyr varði þó nokkrum sinnum ansi vel. Til dæmis frá Eyþóri Wöhler og frá Elmari eftir að hann kom inná.
Atvikið
Fyrsta markið var ansi skrautlegt. Samskiptaörðugleikar í öftustu línu og Atli Þór þakkaði pent fyrir og skoraði fyrsta markið, tognaði reyndar á læri við það að skora markið og verður því frá næstu vikurnar. Högg fyrir HK.
Hvað þýða úrslitin?
KR halda áfram á sinni sigurlausu hrini og þurfa að fara vinna sigur ef ekki á illa að fara. HK hinsvegar öllum að óvörum komnir í sjö stig, jafnmörg og KR.
Vondur dagur
Sigurpáll Sören í markinu hjá KR leit illa út þegar HK komst yfir. Ungur strákur sem fékk sénsinn í dag vegna þess að Guy Smit tók út leikbann og verður að gera betur.
Dómarinn - 9
Mér fannst Elías negla þetta. Var ekki að gefa óþarfa spjöld og negldi stóru atvikin í leiknum.