SKÝRSLAN: Stjörnuhrap á Hlíðarenda
Hvað réði úrslitum?
Þetta var frekar jafn leikur fram að fyrsta markinu en eftir það sá Stjarnan varla til sólar. Það voru mistök í uppspili og ákefð Valsara valtaði bara yfir þá. Gestirnir komu aðeins til baka í sinni spilamennsku eftir að þeir skoruðu sitt mark en það var bara 'too little too late'
Bestu leikmenn
1. Tryggvi Hrafn Haraldsson (Valur)
Það var allt annað að sjá til Tryggva í dag. Eftir að hann skoraði fyrra markið sitt þá var bara eins og Tryggvi hafi verið endurfæddur. Hann var sífellt hættulegur og átti skilið sín 2 mörk. Ég hef áræðanlegar heimildir fyrir því að einhver neðri deildar þjálfari hafi stappað í honum stálið í vikunni sem gæti hafa haft áhrif.
2. Kristinn Freyr Sigurðsson (Valur)
Kristinn var alveg frábær sérstaklega í fyrri hálfleik. Hann býr til fyrstu tvö mörkin upp á sitt einsdæmi og hefði örugglega gert meira ef hann hefði ekki farið af velli eftir 62 mínútur.
Atvikið
Ekkert risa atvik í þessum leik fyrir utan mörkin. Mark númer 3 hjá Val er kannski það stærsta þar sem Stjörnumenn hafa farið inn í hálfleikinn í 2-0 stöðu með von um að geta komið til baka. En þegar Tryggvi skorar á 54. mínútu þá var enginn möguleiki eftir fyrir gestina.
Hvað þýða úrslitin?
Þegar þetta er skrifað er enn markalaust í leik Breiðabliks og Víkings þannig Valur er enn í 3. sæti með 18 stig og Stjarnan aðeins fallnir frá topp pakkanum í 4. sæti með 13 stig.
Vondur dagur
Miðjan hjá Stjörnunni var í veseni með ákefð Valsara. Öll fyrstu 3 mörkin koma úr einhverri baráttu á miðjunni sem tapast og Valsarar keyra upp og skora. Jóhann Árni á líkast til verstu mistökin í marki númer 2 þar sem Kristinn Freyr stelur boltanum af honum á eigin vallarhelmingi.
Dómarinn - 8
Stjörnumenn féllu í teignum 2-3 sinnum en ekkert víti dæmt. Án þess að hafa séð endursýningar þá held ég að Erlendur og hans teymi hafi verið með það allt rétt. Annað var bara vel dæmt.