Sanngjarn sigur Hollands staðreynd hér í kvöld. Okkar menn í Rotterdam með viðtöl og viðbrögð er líður á kvöldið.

Ísak vinnur horn fyrir Ísland. Kristian Nökkvi tekur Verbruggen grípur það.

Uppbótartími er að lágmarki fjórar mínútur. Eitt mark væri alveg góð gjöf heim í þessum seinni leik Icesave glugga íslenska landsliðsins. (já ég er svona gamall og bitur)

Skemmtileg sókn frá Hollandi sem finna Frimpong úti hægra megin er hann eltir bolta sem aö öllu jöfnu var ómögulegur. Ísak stígur hann bara út og skýlir boltanum útaf

Frimpong fær boltann úti hægra megin og setur boltann í svæðið milli varnar og markmanns. Þar mætir Memphis og setur boitann í netið af stuttu færi. Grikinn er samt að skoða þetta í VAR. MArkið er dæmt af þar sem Micky Van der Ven fær boltann í höndina í uppbygginguni.

Depay hendir í eina proper dýfu við vítateig Íslands. Túlipanafólkið í stúkunni ekki sátt en sá gríski með þetta allt á hreinu.

Góð fyrirgjöf úr aukaspyrnu frá hægri inn á teig Hollands frá Jóa Berg. Sverrir Ingi fyrstur á boltann en skalli hans framhjá markinu,

Stefán Teitur með skot upp úr engu af fáránlega löngu færi sem smellur í stönginni! Svei mér þá litli fingur á Verbruggen sá til þess að þetta varð ekki stórglæsilegt mark.

Depay með skemmtilega sendingu innfyrir vörnina á Gakpo en Hákon mætir úr markinu og hirðir boltann.

Heimamenn vinna boltann hátt á vellinum. Wijnaldum finnur Dumfries úti til hægri sem reynir fyrirgjöf en Valgeir skilar boltanum í horn. Ekkert kemur upp úr horninu

Gigi Wijnaldum og Micky van de Ven að gera sig klára á hliðarlínunni fyrir Holland

Tvöföld breyting frá Íslandi í vændum

Andri Lucas að komast í kjörstöðu við teig Hollands en missir boltann frá sér.

Xavi Simons með skot sem er nær því að enda á sporbraut en í markinu.

Jón Dagur vinnur boltann inn á teig Hollands eftir hornið en í stað þess að vera gráðugur og setja boltann á markið reynir hann að finna samherja í teignum. Hollendingar komast á milli en boltinn á Andra Lucas sem reynir skot sem fer í varnarmann. Flaggið að endingu á loft.

Jói Berg með skot af talsverðu færi sem fer af varnarmanni afturfyrir. Ísland fær horn.

Jón Dagur og Denzel Dumfries að kýtast á miðjum vellinum. Alvöru dólgur í Jóni Degi sem lætur Denzel heyra það. Grikkinn með flautuna eitthvað að reyna að tjónka við þeim en má sín lítils. Þessi slagur verður áhugaverður.

Denzel Dumfries sækir hornspyrnu fyrir heimamenn

Cody Gakpo í dauðafæri eftir sendingu frá Memphis en Hákon fljótur út og ver. Flaggið á loft líka svo það hefði ekki talið.

Hollendingar sparka okkur af stað á ný.

Skot á markið: 3-0 Skot ekki á markið: 8-0 Með boltann: 63% - 37% Hornspyrnur: 5-1 Rangstöður: 1-0

Ake skallar framhjá og dómarinn flautar til hálfleiks.

Dumfries með fyrirgjöf sem fer í Jón Dag og afturfyrir. Horn.

Jón Dagur með hættulega fyrirgjöf meðfram grasinu, Aké nær að koma boltanum frá.

Memphis komst í stórhættulega stöðu, skaut úr nokkuð þröngu færi og Hákon náði að loka á þetta.

Jón Dagur reynir að koma boltanum á Hákon en sendingin ekki nægilega góð. Það væri nú hressandi að ná eins og einni marktilraun bráðlega.

Gakpo með skot sem fer naumlega framhjá.

Valgeir Lunddal hrasar á vellinum en nær að sparka boltanum frá, hinsvegar dæmdur brotlegur. Braut á Memphis.

Bjarki Steinn með fyrirgjöf sem Van Dijk hreinsar frá.

Ísland lítið að ná að halda í boltann núna, erum ekki að ná að skapa okkur neitt.

De Vrij freistar gæfunnar, skýtur hátt yfir markið.

Memphis nálægt því að skora annað mark fyrir Holland en boltinn fer naumlega framhjá.

Stórhætta við mark Íslands, Hákon misreiknar eitthvað fyrirgjöf frá Dumfries og Memphis reynir að 'klippa' boltann inn en skotið fer framhjá.

Jói Berg með hornspyrnuna, fær boltann aftur til sín og tekur fyrirgjöf sem Verbruggen handsamar.

Mikael Anderson gerir vel og vinnur hornspyrnu. Fyrsta horn Íslands.

Dumfries reynir fyrirgjöf en Kolbeinn kemst fyrir og Holland fær hornspyrnu. Ekki verið að gera mikið úr hornunum hingað til.

Memphis með skot sem Hákon slær yfir markið.

Þessi ungi hæfileikaríki leikmaður hefur ekki fundið sig nægilega vel í landsleikjum með Hollandi en fær tækifærið í kvöld.

Valgeir undir þrýstingi frá Memphis og Hollendingar fá hornspyrnu.

Dumfries með skalla, þarf að teygja sig í boltann og skallar hátt yfir markið.

Mikael Anderson með fyrirgjöf en De Vrij kemur boltanum í burtu.

Memphis skaut í vegginn úr aukaspyrnunni, Veerman átti svo skot yfir í kjölfarið.

Holland fær aukaspyrnu á stórhættulegum stað. Brotið á Xavi Simons.

Jón Dagur brýtur á De Vrij í baráttunni um boltann við hliðarlínuna.

Memphis að setja pressuna á Hákon Rafn og brýtur á honum.

Ísland er að halda vel í boltann hér á fyrstu mínútunum.

Ísland sækir í átt að De Witte Aap í fyrri hálfleik.

Íslendingar alhvítir í þessum leik í kvöld.

Kári Árnason sérfræðingur á Stöð 2 Sport furðar sig á liðsvalinu í kvöld, og því að Valgeir Lunddal sé látinn spila miðvörð. „Ég var að lofsyngja Valgeir Lunddal í síðasta leik en mér finnst rosalega skrítið að hann sé tekinn inn í seinni bylgjunni. Þeir eru með hafsent sem er heill. Ef Brynjar er klár, af hverju valdiru þá ekki Valgeir á undan í hópinn?" sagði Kári í upphitun Stöðvar 2 Sport fyrir leikinn. Davíð Snorri Jónasson aðstoðarþjálfari landsliðsins sagði frá því í viðtali við Stöð 2 Sport að Valgeir hafi verið tekinn inn sem miðvörður og hafi hreinlega verið valinn framyfir Brynjar í dag.

Það eru reykvélar og lifandi tónlist, svið staðsett í stúkunni. Hollendingar kunna að halda partí!

Það hefur hellirignt síðustu klukkustundir en sú gula er farin að láta sjá sig og byrjað að birta til á góðum tímapunkti. Leikvangurinn er þannig byggður að það hafa ekki allir vallargestir fengið skjól fyrir rigningunni.

Memphis Depay er mættur með hvíta hárbandið sem hann spilaði með í sigrinum gegn Kanada og vakti mikla athygli hjá hollenskum fjölmiðlum. Ronald Koeman var sérstaklega spurður að því á fréttamannafundi hvað honum þætti um bandið. Koeman sagði að það truflaði sig afskaplega lítið. Memphis er án félags eftir að hafa yfirgefið Atletico Madrid og vill sýna sig fyrir mögulegum nýjum vinnuveitendum.

Ísland vann hreint út sagt stórkostlegan 1-0 útisigur gegn Hollandi í leik árið 2015 í undankeppni EM. Þá var leikið í Amsterdam og ég var einnig á vellinum þá. Íslenska landsliðið tryggði sér þennan sögufræga sigur með marki frá Gylfa Sigurðssyni úr vítaspyrnu sem Birkir Bjarnason fiskaði. Íslenska liðið átti í raun hættulegustu færi leiksins þó Hollendingar hafi verið meira með boltann og átt þó nokkur langskot. Með sigrinum sló Ísland áhugavert met. Ísland varð fyrsta landsliðið til að vinna Holland í báðum leikjum liðanna í riðlakeppni undankeppni stórmóts. Fyrri leikurinn á Laugardalsvelli fór 2-0 fyrir Íslandi. Þetta var jafnframt í fyrsta skiptið í sögunni sem Holland tapaði í undankeppni EM á heimavelli.

Það er íslenskt veður í Rotterdam þessa stundina. Rok og rigning. Ef þig langar í sturtu í stúkunni þá er það ekkert mál.

Valgeir Lunddal Friðriksson kemur inn í byrjunarliðið í stað Daníels Leó sem er meiddur. Það er eina breytingin frá byrjunarliðinu gegn Englandi. Valgeir er vanur því að spila sem bakvörður en leikur sem miðvörður í kvöld.

Fjórtán sinnum áður hafa Ísland og Holland mæst í A landsliðum karla, þar af voru tveir leikir í undankeppni ÓL 1988. Ísland hefur unnið tvo sigra og eru það einmitt síðustu tvær viðureignir liðanna – báðir leikir í undankeppni EM 2016. Tvisvar hafa liðin skilið jöfn og Hollendingar hafa unnið 10 sinnum.

Um er að ræða heimavöll Feyenoord en leikvangurinn var upphaflega vígður 1937. Hann hefur gengið í gegnum nokkrar endurbætur síðan. Hollenska landsliðið hefur spilað heimaleiki á vellinum alveg frá því hann var vígður. Úrslitaleikur Þjóðadeildarinnar í fyrra var leikinn á vellinum, Spánn vann Króatíu í vítakeppni eftir markalausan leik. De Kup, eða Potturinn, er sögufrægur völlur og er oft á listum yfir skemmtilegustu leikvanga Evrópu enda myndast þar oftast góð stemning. Hann tekur um 50 þúsund áhorfendur en mikil umræða hefur verið um að byggja nýjan leikvang enda er De Kuip að mörgu leyti barn síns tíma.

Við hvernig andstæðingum má búast? „Þetta verður kannski svipað (og gegn Englandi). Við eigum eftir að þurfa að verjast ansi mikið. Hollendingar elska að halda í boltann en við vitum að hægt er að nýta skyndisóknirnar og getum líka alveg haldið í boltann. Hvert einasta lið er með einhverja veikleika."

Ísland vann verðskuldaðan sigur gegn Englandi á föstudagskvöld á Wembley. Þegar ég vaknaði á hótelherberginu í London daginn eftir þá stakk ég niður penna.

   08.06.2024 08:54

Aukaleikarar sem öllum var sama um stálu sýningunni

Ísland átti frábæran leik og hér má sjá einkunnagjöf Fótbolta.net eftir leikinn:

   07.06.2024 20:37

Einkunnir Íslands: Ótrúlegt kvöld á Wembley

Ólíkt enska liðinu er það varnarleikurinn sem Hollendingar hafa minnstar áhyggjur af, þar er valinn maður í hverju rúmi og leikmenn á borð við Virgil van Dijk, Matthijs de Ligt, Daley Blind og Micky van de Ven. Í sókninni eru þó ekki eins mikil gæði og Hollendingar vildu hafa og mikið traust er sett á hinn sveiflukennda Memphis Depay.

   29.05.2024 15:34

Þrír frá Liverpool í EM hóp Hollands - Mæta Íslandi

Ronald Koeaman landsliðsþjálfari Hollands virðist þá ekki viss um hvaða leikkerfi henti hópnum sínum best. Hann hefur spilað með þriggja hafsenta kerfi en einnig 4-3-3 eins og í vináttulandsleiknum gegn Kanada á fimmtudaginn. Holland vann þann leik 4-0 en tölurnar segja ekki alla söguna. Markalaust var eftir fyrri hálfleik þar sem Kanada hefði getað komist yfir. Holland braut ísinn á 50. mínútu með marki frá Memphis og með því hófst þrettán mínútna þriggja marka kafli þar sem kanadíska liðið hrundi. Jeremie Frimpong tvöfaldaði forystuna áður en Wout Weghorst skoraði þriðja markið. Lokaorðið átti svo Van Dijk seint í leiknum eftir að hafa komið af bekknum. Athygli vekur Van de Ven, miðvörður Tottenham, var notaður sem vinstri bakvörður. Þessi hávaxni leikmaður er góður á boltann og býr yfir miklum hraða svo hann getur svo sannarlega leyst þá stöðu með miklum sóma. Það er þó Frimpong sem mest er í umræðunni eftir leikinn. Þessi 23 ára leikmaður var frábær á vængnum gegn Kanada og skilaði marki og stoðsendingu. Hann er nýkominn úr mögnuðu tímabili með Bayer Leverkusen þar sem hann fór hamförum í stöðu vængbakvarðar og hjálpaði liðinu að vinna deild og bikar í Þýskalandi. Frimpong var á sínum tíma í Manchester City akademíunni en spilaði ekkert fyrir aðalliðið. Hann fór til Celtic og svo til Leverkusen þar sem hann hefur þróast út í einn besta vængbakvörð Evrópu. Frimpong skoraði fjórtán mörk og átti tólf stoðsendingar á tímabilinu fyrir Leverkusen og hollenskir stuðningsmenn eru fullir tilhlökkunar fyrir því sem koma skal frá honum á EM. Holland er með Frakklandi, Póllandi og Austurríki í riðli á EM í sumar.

Dómari: Evángelos Manoúchos Aðstoðardómari 1: Konstandínos Psárris Aðstoðardómari 2: Konstandínos Nikola?dis Skiltadómari: Stéfanos Koumbarákis

Já kæru lesendur, nú erum við í Rotterdam þar sem Ísland mætir öðru liði sem ætlar sér að gera góða hluti á EM. Á föstudaginn var ekki eðlilega gaman að vera á Wembley og sjá okkur vinna England. Náum við líka að senda Hollendinga með vont veganesti á EM?

   07.06.2024 20:41

Ísland vann magnaðan sigur á Englandi á Wembley