SKÝRSLAN: Auðmjúkur Djuric kláraði Fylki
Hvað réði úrslitum?
Það er einfaldlega stigsmunur á gæðum liðanna. Víkingar þurfa ekki tíu færi til að skora, þeir einfaldlega refsa fyrir því sem næst ölll mistök sem þú gerir í varnarleik gegn þeim og sú varð raunin í kvöld. Fylkismenn reyndu að gera sitt besta í að loka svæðum, vera þéttir og gera Víkingum erfitt fyrir en það er erfitt að ætla sér það í 90 mínútur plús.
Bestu leikmenn
1. Danijel Dejan Djuric
Tveggja marka maður í dag og fer í leikbann á góðum nótum eins og hann orðaði það sjálfur. Ótrúlega naskur að koma á ferðinni inn á teiginn og staðsetur sig oft mjög vel í sóknarleik Víkinga.
2. Helgi Guðjónsson
Ef hann hefði skorað úr úrvalsfæri sem hann fékk væri hann klárlega efstur á blaði. Ungir leikmenn mættu horfa á klippur af fyrirgjöfum hans í kvöld og læra af. Fastur bolti inn á hættusvæðið milli varnar og markmanns og úr þeim koma tvö mörk.
Atvikið
Auðvitað var það Danijel Dejan Djuric sem reyndist örlagavaldur í kvöld svo mörk hans standa upp úr. Hann er ekki týpan til að sprengja flugelda inn á baðherbergi heima hjá sér og ég veit að hann kann að klæða sig í vesti sjálfur á æfingum og í upphitun. Samt kom línan "Why always me" og Mario Balotelli upp í hugann í tengslum við Danijel og leik kvöldsins. Danijel var afskaplega einlægur í viðtali í kvöld og þótti vænt um þá ást sem Víkingar sýna honum og skil ég hann vel.
Hvað þýða úrslitin?
Víkingar fá Stjörnuna í heimsókn í undanúrslitum Mjólkurbikarsins sem eiga fara fram 3-4. júlí næstkomandi. Það má þó reikna með að leikdagar muni breytast vegna þáttöku í evrópukeppni. Fylkir getur á meðan einbeitt sér að deildinni.
Vondur dagur
Mögulega var sjálfsmarkið í deildarleik liðanna heldur ósanngjarnt fært á hann en Pálmi Rafn Arinbjörnsson á mark Fylkis í kvöld líklega skuldlaust. Ekki það eflaust erfitt að ætla sér að hlaupa í gegnum hálft fótboltalið til þess að grípa bolta sem kemur fyrir markið. Það hlýtur samt að vera sjaldgæf sjón að sjá leikmanna skora sjálfsmark tvo leiki í röð og hvað þá gegn sama liðinu. Hann fær því vondan dag á sig fyrir banterinn sem mun eflaust koma frá liðsfélögum í góðlátlegu gríni.
Dómarinn - 8
Erlendur átti fínt kvöld eins og flestir á vellinum. Engar stórar ákvarðanir að taka svo sem og nokkuð þægilegt kvöld.