Þá er þessum leik hér með lokið. Þakka samfylgdina í dag.

Viðtöl og skýrsla mæta inn á síðuna innan skamms.

Þangað til næst, takk fyrir mig.

Mjög rólegt hérna í Breiðholtinu

Grindvíkingar fá hornspyrnu sem Lovísa hreinsar frá.

Klaufagangur í vörn ÍR og skyndilega er Dröfn Einars komin ein í gegn á Esther. Hún tekur skotið en Esther er þá mætt úr markinu og gerir glæsilega vel að fverja frá henni.

Það eru heimakonurnar í ÍR sem byrja með boltann í þeim seinni og sækja í átt að ÍR-heimilinu en Grindvíkingarnir sækja í átt að Reykjanesbrautinni.

Þá er Sindri, sem hefur dæmt leikinn mjög vel, búinn að flauta til hálfleiks.

Tökum okkur korterspásu og mætum svo til baka að vörmu spori.

Ekkert að frétta úr Breiðholtinu. Hefur aðeins róast eftir tíðindamiklar upphafsmínútur.

Grindavík fær horn en ÍR-ingar standa vaktina vel

Sigríður tekur spyrnuna inn á teiginn sem fer til Michelle. Hún er í erfiðri stöðu og nær skotinu í fyrsta sem var alls ekki gott.

Mia með skot á nær sem Katelyn ver glæsilega í horn!

ÍR-ingar verjast horninu vel og hreinsa og uppskera markspyrnu

Anja gerir vel í vörn ÍR og hreinsar í horn í hættulegri stöðu Grindvíkinga

Ása Björg kemur með geggjaða sendingu inn á teiginn á Tinnu Hrönn sem er komin ein gegn Esther í markinu en hún hreinlega hittir ekki boltann þegar hún er að fara að skjóta.

Óheppin þarna hún Tinna en ÍR-ingar heppnir!

Ása keyrir upp völlinn og kemur með fyrirgjöf á að mér sýnist Mist sem er með markið galopið fyrir framan sig en rennur og fær boltann í höndina.

Dauðafæri hjá Grindavík!

ÍR-liðið byrjar af krafti. Sigríður fær boltann frá Önju og kemur boltanum í gegn á Michelle sem er komin ein í gegn á Katelyn. En áður en Katelyn ver glæsilega frá Michelle var flaggið farið á loft hjá AD.

Það eru gestirnir í Grindavík sem hefja hér leik og sækja í átt að ÍR heimilinu.

Sindri Snær A van Kasteren sér um flautukonsertið í suður Mjóddinni í kvöld. Ásgeir Sigurðsson og Heimir Árni Erlendsson verða honum Sindra til halds og trausts.

Í kvöld er versta sóknarlið deildarinnar í Grindavík að fara að mæta versta varnarliði deildarinnar í ÍR. Grindvíkingar hafa séð liðið sitt skora aðeins þrjú mörk í fyrstu fimm leikjum tímabilsins á meðan ÍR-ingar hafa þurft að sjá andstæðingin skora 16 sinnum í fyrstu fimm leikjunum. Þess má einnig geta að ÍR-liðið hefur ekki skorað í seinustu tveimur deildarleikjunum.

Fáum við 0-0 leik í kvöld eða 5-5 leik? Ég ætla að gerast svo djarfur að spá 1-1 jafntefli. Það er mín spá en innst inni held ég að annað liðið vinni 2-1 er bara ekki alveg viss hvoru meginn markið dettur.

Breiðhyltingar fara af stað með einn sigur og fjögur töp í upphafi móts. Eftir skell í fyrsta leik gegn Fram sigruðu ÍR-ingarnir ÍBV 2-0 í frábærum leik. En eftir það hafa þær tapað gegn Selfossi, Gróttu og núna seinast gegn ÍA. Eftir fimm leiki er ÍR-liðið með verstu vörnina í deildinni eða búnar að fá á sig 16 mörk.

Þær sýndu það vissulega í fyrra og í vetur að þær eiga heima í þessari deild með góðum frammistöðum og úrslitum. En í vetur unnu þær einmitt Grindavíkurliðið 3-0 í Breiðholtinu.

Það verður seint sagt að Grindvíkingar hafa verið að gefa okkur einhverjar flugeldasýningar í upphafi móts. En eftir fimm leiki eru þær með markatöluna 3-3 og sjö stig. Grindavíkurliðið hefur unnið HK og Gróttu en gert jafntefli við ÍBV í upphafi móts. Tapað þá gegn Aftureldingu og Skagakonum.

Allir leikir liðsins til þessa hafa farið 1-0 nema gegn ÍBV sem fór 1-1. Vægast sagt áhugavert að sjá hvort það opnast einhverjar flóðgáttir í Suður Mjóddinni í kvöld.

Heil og sæl ágætu lesendur og veriði hjartanlega velkomin í þessa þráðbeinu textalýsingu frá leik ÍR og Grindavíkur í Lengjudeildinni. Leikurinn fer fram í Breiðholtinu og byrjar á slaginu 19:15.