SKÝRSLAN: Afturelding sótti þrjú sterk stig til Njarðvíkur
Hvað réði úrslitum?
Í leik þar sem veðrið lék okkur grátt voru það gestirnir frá Mosfellsbæ sem hreinlega lögðu meira í þetta. Komust snemma tveimur mörkum yfir. Njarðvík gerði vel að jafna leikinn en svo um leið og Afurelding setti þriðja markið var eins og hausinn færi hjá heimamönnum og gestirnir gáfu bara í og fóru með sannfærandi sigur af hólmi.
Bestu leikmenn
1. Elmar Kári Enesson Cogic
Skoraði tvö og var alltaf eitthvað um að vera þegar hann komast á boltann. Var virkilega öflugur í kvöld.
2. Hrannar Snær Magnússon
Var frábær á vinstri vængnum hjá Aftureldingu í kvöld. Skoraði fyrsta markið og lagði upp þriðja markið með frábæru hlaupi. Var Njarðvíkingum erfiður í kvöld.
Atvikið
Þriðja mark Aftureldingar virtist rota Njarðvíkurliðið í kvöld. Einnig hægt að nefna þessa þvælu undir lokin þegar það fóru tvö rauð á loft.
Hvað þýða úrslitin?
Afturelding lyftir sér upp í fimmta sætið með 14 stig markatölunni á eftir ÍR í fjórða. Njarðvíkingar ná ekki að endurheimta toppsætið og sitja því í öðru sætinu með sín 20 stig.
Vondur dagur
Væri hægt að nefna nokkra Njarðvíkinga hérna en Joao Ananias verður bara að taka þetta á sig fyrir að missa hausinn og hrinda mönnum undir restina og fá rautt spjald. Njarðvíkingar mega ekki endilega við því að missa menn í bönn með þetta þunnan hóp svo þetta var dýrt spaug hjá Brasilíumanninum í kvöld.
Dómarinn - 5
Það vantaði svolítið upp á samræmi í dómgæslunni í kvöld. Virkaði á tíðum full tilviljunarkennt hvað væri dæmt á og hvað ekki. Stóru ákvarðanirnar voru líkast til allar réttar svo það er kannski það sem skipti mestu máli. Sleppur með fimm í kvöld.