Patrik með fyrirgjöf sem endar í höndunum á Tasev og flautað til leiksloka stuttu eftir það. Ótrúlegur viðsnúningur hjá heimamönnum. Þetta var ekki í kortunum eftir fyrri hálfleikinn.

Ediz Spahiu í dauðafæri en Anton Ari sér við honum.

Patrik með sendingu inn á teig og Daniel Mojsov nálægt því að skora sjálfsmark. Hornspyrna sem Blikar fá!! Tasev handsamar knöttinn á endanum.

Fimm mínútur í viðbót!!!

Ísak Snær með skalla eftir aukaaspyrnu en hann nær ekki að koma boltanum á markið! Aukaspyrna dæmd á Blika í kjölfarið.

Heimamenn fá aukaspyrnu á hættulegum stað. Alexander Helgi dæmdur brotlegur.

Blikarnir í smá veseni að koma boltanum frá teignum sínum en það tekst að lokum. Tikves heldur þó í boltann.

Komið að vatnspásunni.

Kristinn Steindórs með skalla rétt framhjá eftir fyrirgjöf frá Damir. Damir hafði góðan tíma og hefði getað rennt boltanum á Ísak Snæ.

Patrik gerir frábærlega að komast framhjá einum varnarmanni en á svo skot í annan varnarmann. Blikar fá horn.

Leonardo Guerra fellur í baráttunni við Oliver á miðjum vellinum en ekkert dæmt. Guerra mótmælir ekkert en það gerir hins vegar Oliver sem vill væntanlega fá spjald á hann fyrir dýfu.

Damir í miklum vandræðum, missir boltann á stórhættulegum stað en Oliver kemur honum til bjargar og setur boltann í horn.

Útsendingin var í góðu lagi seinni hluta fyrri hálfleiks en það er aftur komið smá hökt á hana núna.

Hætta við mark Blika. Skalli eftir hornspyrnu, Damir nær ekki að sparka boltanum út en Tikves fær horn hinu megin. Ekkert kom út úr því.

Heimamenn fá horn. Blikar koma boltanum frá

Blikar með tveggja marka forystu eftir fyrsta leikhluta af fjórum í þessu einvígi! Komum með seinni hálfleikinn að vörum.

Þrjár mínútur í viðbót

Mile Todorov sleppur hér við spjald. Fer ansi hátt með fótinn og sparkar í Oliver.

Blikar fá aukaspyrnu á flottum stað rétt fyrir utan vítateiginn. Oliver með fyrirgjöfina en boltinn endar í höndunum á Tasev

Aron Bjarnason með skot af stuttu færi en boltinn beint á Stefan Tasev

Leikurinn farið að mestu leiti fram í og við vítateig Tikves. Þeim tókst núna að ná fínni sókn sem endaði með lausu skoti Ediz Spahiu sem Anton á ekki í vandræðum með.

Vatnspása! Rúmar 30 gráður í Norður Makedóníu.

Ediz Spahiu með skot hátt yfir. Staðan er enn 1-0 en það er búið að vera frosið undanfarnar mínútur.

Mikið vesen á útsendingunni því miður!

Kristófer Ingi með fína pressu, Stefan Tasev markvörður Tikves með stutta sendingu, fær boltann aftur og nær að koma honum frá áður en Kristófer kemst í boltann. Útsendingin frosin aftur..

Kristijan Stojkovski slapp í gegn í kjölfarið á hornspyrnunni en átti hræðilegt skot hátt yfir.

Komin aftur. Blikar fá horn.

Vesen á útsendingunni. Búið að frjósa mikið hér í upphafi. Allt frosið núna. Vonandi að þetta komist nú í lag hjá þeim!!

Heimamenn eiga fyrstu tilraunina. Gjorgi Gjorgijev með skallann beint á Anton Ara,

Ísak Snær Þorvaldsson sparkar þessu af stað!

Halldór Árnason, þjálfari Breiðabliks, gerir fjórar breytingar frá jafnteflinu gegn Vestra um liðna helgi. Viktor Örn, Kristófer Ingi, Arnór Gauti og Oliver koma inn í liðið fyrir þá Daniel Obbekjær, Patrik Johannesen, Alexander Helga Sigurðarson og Dag Örn Fjeldsted.

„Veit að hann getur spilað á töluvert hærra getustigi" https://t.co/ikAgBH8Vxw

— Fótbolti.net (@Fotboltinet) July 11, 2024

Halldór Árnason þjálfari Breiðabliks hikaði ekki þegar hann var spurður hvort hann héldi að Breiðablik væri betra lið en Tikvesh.

„Já, við erum með betra lið. En ég veit að það er mjög erfitt að koma hingað og spila, mikill hiti sem hefur auðvitað einhver áhrif á leikinn. Þetta er hörkulið og útileikir gegn liðum á þessu svæði hafa reynst okkur, og öllum liðum, erfiðir. Við erum ekki bara með betra lið heldur líka með mikla reynslu úr Evrópukeppni," segir Halldór við Fótbolta.net.

Dóri sjálfur er að fara inn í sinn 30. leik í Evrópu og verður leikurinn hans fimmti sem aðalþjálfari Breiðabliks.

„Flestir strákarnir hafa verið hér í liðinu síðustu ár. Það munar helling um það og mikilvægt að menn nýti sér þá reynslu í þessum leikjum. Ég held að reynslan sem liðið hefur úr Evrópuleikjum muni reynast dýrmæt."

„Þetta er fyrsti Evrópuleikur Tikvesh, en það er þó fjöldi af Evrópuleikjum hjá leikmönnum í liðinu og líka landsleikir."

Ætla halda í boltann
Dóri segir að Blikar ætli sér að fara inn í leikinn og ætli sér að reyna halda í boltann.

„Við viljum fara og halda boltanum. Við vitum kannski ekki alveg hvernig völlurinn, höfum auðvitað farið í útileiki í Evrópu þar sem það hefur verið ákveðið sjokk að koma á sjálfan leikvöllinn, en yfirleitt eru þetta fínustu vellir. Við gerum ráð fyrir því að þessi völlur sé góður, æfum á honum á eftir og þá vitum við betur. Planið er að halda boltanum og stýra leiknum bæði með og án bolta."

Lið á pari við Struga og Budocnost
Er þetta betra lið en Struga sem þið mættuð umspilinu um sæti í riðlakeppninni í fyrra?

„Á pappír er þetta ekki betra lið. Struga vann deildina og Tikvesh endaði í 4. sæti. Liðin spiluðu leik undir lok tímabilsins, mikilvægan leik fyrir bæði lið, þar sem Tikvesh vinnur 3-2. Liðin mættust svo aftur í æfingaleik fyrir tíu dögum þar sem Tikvesh vann 4-3. Það eru aðeins þekktari stærðir í Struga, landsliðsmenn Norður-Makedóníu, og það er stærsta og besta liðið í dag. En Tikvesh hefur verið að gera góða hluti og unnu t.a.m. meistarana frá Kósóvó um daginn. Þetta er alvöru lið, vel á pari við Struga og Budocnost."

Dýrmætt fyrir Ísak og Blika
Ísak Snær Þorvaldsson sneri til baka í síðasta leik eftir að hafa fengið höfuðhögg gegn KA.

„Ísak var á hraðri uppleið og spilaði leikinn gegn HK þar sem hann var stórkostlegur. Hann fær svo höfuðhögg á móti hálftíma gegn KA. Hann fékk sínar fyrstu mínútur í síðasta leik eftir höfuðhöggið og það var mjög dýrmætt fyrir hann og okkur að hann komst í gegnum þann leik án nokkurra einkenna. Hann hefur æft eins og ástand hefur leyft og haldið sér vel við á meðan hann var frá. Ég er ánægður með Ísak og hann verður mjög mikilvægur á morgun."

Steikjandi hiti
„Leikurinn verður klukkan 20:30 að staðartíma, þá verður sólin farin niður og mér sýnist hitinn vera þá kominn niður í 30-31 stig. Við höfum spilað við sambærilegar aðstæður í Bosníu, Svartfjallalandi og í Ísrael. Við erum öllu vanir. Það mikilvægasta er að það sé spilað eftir að sólin er farin niður."

„Það er mjög skýrt hvernig við hugsum um okkur hérna á hótelinu, menn eiga ekkert að vera fara út. Það er einn sjö mínútna göngutúr, annars eru menn bara inni að vökva sig og passa að taka inn sölt og steinefni og borða rétt. Það er stór hluti af undirbúningnum að hugsa vel um sig," sagði Dóri.

   10.07.2024 17:52

„Erum ekki bara með betra lið heldur líka með mikla reynslu úr Evrópukeppni"

GFK Tikvesh (Tikvesh), stofnaður af hópi ungra áhugamanna á fundi á Balkan veitingastaðnum í Kavadarci, 21. desember 1930, er atvinnumannaklúbbur frá Kavadarci í Norður-Makedóníu sem leikur í makedónsku deildinni.

Eftir flakk á milli heimvalla fyrstu 20 árin festi félagið rætur á Gradski Stadion Kavadarci í mars 1950 og hefur félagið verið þar síðan.

Besta tímabil félagsins var á sjöunda áratugnum og allan áttunda áratuginn þegar Tikvesh vann makedónsku lýðveldisdeildina tvisvar: 1971/72 og 1977/78. Liðið hefur fimm sinnum leikið í júgóslavnesku annarri deildinni: 1955/56, 1968/69,1969/70,1972/73 og 1978/79.

Tikvesh var eitt af 18 stofnfélögum makedónsku fyrstu deildarinnar árið 1992. Félagið vann sinn fyrsta á síðasta keppnistímabili keppnistímabilið þegar liðið endaði í 4. sæti í deildinni - besti árangur liðsins í bestu deild frá upphafi - og vann, í fyrsta sinn, makedónísku bikarkeppnina í leik gegn Voska Sport 22. maí 2024 og er þ.a.l. að taka þátt í Evrópukeppni í fyrsta sinn þegar þeir mæta Breiðabliki á heimavalli fimmtudaginn 11. júlí 2024.

Í fyrra vann Breiðablik 1-0 sigur á FC Struga frá N-Makedóníu í forkeppni Sambandsdeildar Evrópu á útivelli. Höskuldur Gunnlaugsson tryggði sigurinn. Síðari leikurinn fór fram á Kópavogsvelli og vannst einnig 1-0. Með sigrinum tryggði Breiðablik sér sæti í riðlakeppni Sambandsdeildarinnar.

Nánar tiltekið á Bestu deildarrás 2. Þessi textalýsing er í gegnum þá útsendingu.

Leikurinn fer fram á þjóðarleikvangi Norður-Makedóníu sem er skírður í höfuðið á tónlistarmanninum vinsæla Todor Proeski sem lést á sviplegan hátt í bílslysi í Króatíu 2007.

Dómarar kvöldsins eru frá Lúxemborg. Aðaldómari er Jérémy Muller. Aðstoðardómarar eru: Yannick Mentz og Tom Hansen. Fjórði dómari er Ricardo Morais.

Fyrsti Evrópuleikur Blika í ár er útileikur í undankeppni Sambandsdeildar UEFA, gegn Tikves í Norður-Makedóníu. Hér verður fylgst með öllu sem gerist í leiknum í beinni textalýsingu.