SKÝRSLAN: Sannfærandi Þórsarar upp í umspilssæti en Afturelding í djúpum dal
Hvað réði úrslitum?
Leikurinn var opinn til að byrja með og bæði lið fengu færi, en munurinn til að byrja með var sá að Þórsarar nýttu sín færi. Þeir voru svo sterkir varnarlega eftir að þeir komust yfir og sýndu meiri liðsheild. Það var mikill andi í Þórsurum á meðan Mosfellingar voru fljótir að setja höfuðið ofan í bringu.
Bestu leikmenn
1. Birkir Heimisson (Þór)
Með meiri gæði en líklega allir aðrir leikmenn í þessari deild. Sendingin í þriðja markinu var algjört konfekt og svo varðist hann stórkostlega í seinni hálfleiknum.
2. Rafael Victor (Þór)
Var drjúgur fyrir Þórsara og skoraði tvisvar. Lagði líka sitt af mörkum í varnarleiknum í seinni hálfleik og bjargaði einu sinni á línu.
Atvikið
Vítaspyrnan auðvitað stórt atriði í leiknum en þriðja markið svolítið gerir út um leikinn. Það var stórkostlega útfært og sendingin frá Birki í því var í algjörum sérflokki.
Hvað þýða úrslitin?
Þórsarar eru komnir upp í fimmta sæti, umspilssæti, eftir frekar erfitt sumar framan af. Eru taplausir í síðustu fimm og stefna núna á að tengja saman tvo sigra í röð í fyrsta sinn í sumar. Afturelding hefur tapað fjórum af síðustu fimm og eru í djúpum dal þó það sé ekki langt á milli í þessari deild.
Vondur dagur
Varnarleikur Aftureldingar var slitinn í fyrri hálfleiknum og bakverðirnir báðir, Georg og Aron Elí, áttu ekki sinn besta dag. Það var svolítið spilað á bak við þá. Þessi varnarlína er ekki mjög traustverð þessa stundina og var Gunnar Bergmann klaufalegur í vítinu.
Dómarinn - 7,5
Mér fannst vítaspyrnan frekar soft við fyrstu sýn en eftir endursýningu er það réttur dómur. Mér fannst Pétur dæma leikinn vel.