SKÝRSLAN: Haukar í ham í þeirri yngstu og sprækustu
Hvað réði úrslitum?
Haukar fóru betur með sínar sóknir. Völsungur þurfti að elta frá því snemma leiks og í það fór mikil orka. Ian Jeffs setti ferska fætur af bekknum og kláraði dæmið á lokakaflanum.
Bestu leikmenn
1. Guðmundur Axel Hilmarsson - Haukar
Sóknarmaðurinn hávaxni bjó til alls konar vandræði fyrir Völsung og reyndist þeim erfiður viðureignar. Er nýkominn á láni frá Þrótti og var greinilega ákveðinn í að sýna sig og sanna. Tókst vel og opnaði markareikning sinn strax í fyrsta leik.
2. Magnús Kristófer Anderson - Haukar
Átti mjög öflugan leik gegn Víði í 32-liða úrslitum og var í sama ham í marki Hauka í kvöld.
Atvikið
Haukar voru komnir í 2-0 eftir 23 mínútur og báðir nýju mennirnir búnir að skora! Andri Már Harðarson sem kom á láni frá HK og svo Guðmundur Axel. Svona á að stimpla sig inn.
Hvað þýða úrslitin?
Haukar verða í pottinum þegar dregið verður í yngstu og sprækustu bikarkeppni landsins í hádeginu á föstudag. Þeir eru komnir nær Laugardalsvellinum á meðan Völsungur einbeitir sér að deildinni.
Vondur dagur
Völsungur fór illa að ráði sínu í færanýtingum og gerðu of dýrkeypt mistök varnarlega.
Dómarinn - 7,5
Guðni Páll Kristjánsson dæmdi þennan leik ansi vel. Einhverjir örlitlir hnökrar en þeir voru smávægilegir. Flott frammistaða.