SKÝRSLAN: Yfirburðir í Vestmannaeyjum
Hvað réði úrslitum?
Einfaldlega mun meiri gæði í liði ÍBV. ÍR sáu í raun aldrei til sólar og áttu erfitt uppdráttar bæði varnar- og sóknarlega.
Bestu leikmenn
1. Olga Sevcova
Maður er kannski orðinn svolítið þreyttur á að segja þetta en sannleikurinn er sá að Olga er allt í öllu í sóknarleik ÍBV og það fer í raun og veru allt í gegnum hana, hvort sem það er að leggja upp, skora eða hefja sóknina. Hún átti til að mynda þátt í öllum þremur mörkum ÍBV í kvöld.
2. Natalie Viggiano
Hrikalega öflug á vinstri kantinum í liði ÍBV. Hún var góð í stutta spilinu og að ógna fyrir aftan vörn ÍR. Hún átti einnig hættulegar fyrirgjafir. Hún skoraði eitt og lagði upp eitt í kvöld.
Atvikið
Það var í raun ekkert sérstakt atvik sem átti sér stað í þessum leik þar sem að yfirburðir ÍBV voru það miklir og engin svona vá moment.
Hvað þýða úrslitin?
Úrslitin þýða það að ÍBV eru komnar í fjórða sætið með öðrum hagstæðum úrslitum en þær hafa unnið 4 af síðustu 5 leikjum sínum. ÍR aftur á móti eru enn á botni deildarinnar með 4 stig.
Vondur dagur
Sama og með atvikið þá er svakalega erfitt að taka einn leikmann út fyrir sviga. ÍR liðið í heild sinni átti mjög erfitt uppdráttar og réðu illa við spræka leikmenn ÍBV. Það virtist sem þær voru einungis að sækja á 1-2 leikmönnum allan leikinn og sjálfstraust lítið sem ekkert í sóknarleiknum. Skottilraunir voru máttlausar og lítið að gera hjá Guðnýju markmanni ÍBV.
Dómarinn - 8
Engin vafaatriði áttu sér stað og dómarinn var með góð tök á leiknum.