SKÝRSLAN: Færin komu en mörkin ekki
Hvað réði úrslitum?
Liðin nýttu ekki þau færi sem þau sköpuðu svo einfalt er það. Báðir hálfleikar voru í raun keimlíkir þar sem Víkingar byrjuðu af fítonskrafti í 15-20 mínútur en eftir það jafnaðist leikurinn mjög. Þegar maður lítur þó til baka eftir leikinn er lið Þróttar eflaust sáttara með stigið.
Bestu leikmenn
1. Jelena Tinna Kujundzic
Frábær í miðri vörn Þróttar, vann ófá einvígi við teiginn og stóð eins og klettur í mörgum áhlaupum Víkinga. Frábær leikur hjá henni.
2. Selma Dögg Björgvinsdóttir
Það er eitthvað annað að horfa á Selmu spila fótbolta. Þar er bara einn gír og það er áfram á 110% krafti. Ósérhlífin og dugleg og algjör drifkraftur í leik Víkinga.
Atvikið
Hvað hefði gerst ef að Freyja Karín hefði ekki verið dæmd rangstæð ranglega eftir 70 mínútur þegar hún var að sleppa í gegn? Erfitt að segja nokkuð til um það en það má velta vöngum yfir því.
Hvað þýða úrslitin?
Víkingar halda fjórða sæti deildarinnar og sitja þar með 20 stig. Þróttur í því sjöunda með fjórtán stig.
Vondur dagur
Verður að skrifast á sóknarlínur liðanna. Færin komu en mörkin ekki. Sóknarmenn eru dæmdir af mörkum sem þær skiluðu ekki í dag og þar við situr.
Dómarinn - 6
Leikurinn í sjálfur sér ekki illa dæmdur sem heild en það voru þó atvik sem stungu. Kannski sérstaklega þegar flaggið fór á loft þegar Freyja Karin var að sleppa í gegn fyrir lið Þróttar. Sá dómur var einfaldlega kolrangur og stóð ekki einu sinni tæpt. Tveir varnarmenn góðum meter fyrir innan Freyju i atviki sem hefði mögulega getað skipt einhverju máli.