Afturelding var heilt yfir sterkari aðilinn í leiknum en Dalvík/Reynir hefur sýnt upp á síðkastið að liðið getur bitið frá sér. Heimamenn voru öflugir undir lok fyrri hálfleiks og byrjuðu síðari hálfleikinn vel. Jöfnunarmarkið kom eftir um klukkustundar leik en staðan var ekki jöfn nema í um fimm mínútur Tvö mörk á tæpum fimm mínútum frá Aroni Jóhannssyni gerðu út um leikinn. Heimamenn reyndu að klóra í bakkann undir lokin en án árangurs.

Fyrra mark Arons var frábærlega afgreitt. Fékk boltann fyrir utan teig, skapaði sér pláss með góðri hreyfingu til vinstri áður en hann lét vaða með vinstri fæti. Boltinn úti við stöng og gestirnir komnir með yfirhöndina á ný, stuttu eftir jöfnunarmark Dalvíkur/Reynis.

Botnbaráttan verður ekkert auðveldari fyrir Dalvík/Reyni sem sitja í neðsta sæti deildarinnar þegar þetta er ritað. Stigin þrjú þýða að Afturelding færir sig skrefi nær topppakkanum, en sitja enn í sjötta sæti deildarinnar.

Heimaliðið í heild verður að taka þetta á sig fyrir þær fáu mínútur milli þeirrar 65. og fram að þeirri 71. Öll sú vinna og barátta sem fór í að jafna leikinn varð til einskis og varð brekkan of brött á mettíma.

Aðalbjörn Heiðar Þorsteinsson og hans menn réðu ekki úrslitum í dag þrátt fyrir misglaða stuðningsmenn heimaliðsins. Hélt sig á hægri akrein allan leikinn en hann var ekki að spjalda menn fyrir að falla auðveldlega til jarðar, trekk í trekk, án þess að hann dæmdi aukaspyrnu. Gervigrasið á Dalvík blessunarlega lungamjúkt.